Barua Mokwongo ne Jo-Thesalonika
3 Kuom mano, ka ne ok wanyal medo bet mos, ne waneno ni ber mondo wadong’ Athens kendwa;+ 2 omiyo ne waoro Timotheo+ owadwa kendo jatich Nyasaye* e tij wach maber e wi Kristo, mondo otegu kendo ohou e yieu, 3 mondo kik ng’ato dog chien nikech masiche.* Nikech un uwegi ung’eyo ni nyaka wayud sand kaka mago.+ 4 Nimar kata mana e kinde ma ne wan kodu, ne wajowachonu motelo ni ne wadhi yudo masiche, to adier mano e gima osetimore mana kaka ung’eyo.+ 5 Mano e momiyo ka ne ok anyal medo bet mos, ne aoro wach mondo ang’e kaka uchung’ motegno e yie,+ di po ka Jatem+ osetemou mi tich matek ma ne watiyo obedo kayiem nono.
6 To koro Timotheo osechopo sani koa iru+ kendo osenyisowa wach maber kuom yieu motegno kod hera, kendo ni kinde duto udhi nyime parowa gi mor, bende ni un gi siso mar nenowa mana kaka wan bende wan gi siso mar nenou. 7 Owetena, mano e momiyo e chandruokwa kod masichewa duto, waseyudo hoch nikech un, kendo nikech yie motegno munyiso.+ 8 Nikech udhi nyime chung’ motegno kuom Ruoth, mano duogo chunywa.* 9 Wanyalo goyo ne Nyasaye erokamano marom nade kuom mor maduong’ ma wan-go e nyim Nyasachwa nikech un? 10 Odiechieng’ gi otieno wasayo gi kinda kar nyalowa mondo wabi waneu wang’ gi wang’ mondo wapong’nu gik morem e yieu.+
11 Koro, Nyasachwa owuon kendo Wuonwa, kod Ruodhwa Yesu mondo olosnwa yo mar biro iru. 12 E wi mano, Ruoth mondo omi herau omedre, ee, mondo ugundh chuth gi hera e kindu+ kendo ne ji duto mana kaka watimonu, 13 mi chop kama chunyu bedoe motegno kendo maler ma onge bura e nyim Nyasachwa+ kendo Wuonwa e kinde ma biro yudo ka Ruodhwa Yesu nitie+ kanyachiel gi jo maler duto.