Isaya
31 Yaye, nobed malit ne jo ma dhi mwalo e piny Misri mondo gimany konyruok,+
Jo mogeno farese,+
Jo mogeno geche lweny mang’eny ma gin-go,
Kendo mogeno joidh farese nikech gin gi teko.
To ok gigeno Ng’at Maler mar Israel,
Kendo ok gimany Jehova.
2 Kata kamano, oriek kendo obiro kelo masira,
Ok obi loko gima osewacho.
To obiro a malo mondo oked gi od joricho
Kod jo ma konyo joricho.+
3 Jo-Misri gin mana dhano, ok gin Nyasaye;
Faresegi gin mana ringruok to ok roho.+
Kinde ma Jehova biro rieyoe lwete,
Jo ma konyogi biro chwanyore,
To jo ma ikonyo biro podho;
Gibiro lal nono kanyachiel.
4 Nimar Jehova osewachona niya:
“Mana kaka sibuor ruto, sibuor motegno momako le moro,
Sa ma jokwath mang’eny lawe,
Kendo dwondgi ok bwoge,
Kata koko maggi ok miye luoro,
E kaka Jehova Nyasach oganda lweny biro lor piny mondo oked
Ne Got Sayun kendo ne got man kuno.
5 Jehova Nyasach oganda biro rito Jerusalem,+ mana ka winyo ma fuyo koni gi koni.
Obiro rite kendo ware.
Obiro ng’wonone kendo rese.”
6 “Yaye un Jo-Israel, duoguru ir Ng’at ma ne upiemgo gi wang’-teko.+ 7 Chieng’no ng’ato ka ng’ato kuomu biro wito nyisechene manono mag fedha kod mag dhahabu ma ne uloso gi lweteu uwegi, momiyo utimo richo.
8 Jo-Asuria biro tho gi tho ligangla, to ok mar dhano;
Ligangla ma biro tiekogi ok nobed mar dhano.+
Obiro ringo koneno ligangla,
Kendo ibiro chun yawuote gi tich matek.
9 Lwandane biro lal nono nikech luoro,
Kendo bendera biro miyo jotende luoro,” Jehova owacho,
Nyasaye ma lerne ni Sayun, kendo maje mager ni Jerusalem.