Weche mag Ndalo Mokwongo
17 Ka ne Daudi osechako dak e ode, nowacho ne janabi Nathan+ kama: “An adak e ot moger gi yiend sida+ to sandug singruok mar Jehova nie hema.”+ 2 Nathan nodwoko Daudi niya: “Tim gima chunyi dwaro nikech Nyasaye madier ni kodi.”
3 E otienono, wach Nyasaye nobiro ne Nathan niya: 4 “Dhi iwach ne jatichna Daudi niya: ‘Jehova owacho kama: “In ok ibi gerona ot mondo adagie.+ 5 Nimar nyaka ne agol Jo-Israel e piny Misri, pok adak e ot, to asebedo ka adar gi hema koni gi koni.+ 6 Kuom kinde duto ma asebedo ka awuotho gi joga Israel, be asepenjo jang’ad bura moro amora ma ne aketo mondo otagi niya: ‘Marang’o pok igerona ot mar yiend sida?’”’
7 “Koro nyis jatichna Daudi kama: ‘Jehova Nyasach oganda lweny owacho niya: “Ne agoli e kwath mi aketi jatelo e wi joga Israel.+ 8 Anabed kodi kuonde duto ma nidhiye+ kendo abiro tieko wasiki duto e nyimi,+ kendo anami ibed gi nying maduong’ mana kaka jomamoko madongo e piny.+ 9 Abiro yiero ne joga Israel ka ma ginidagie kendo onge ng’ama nochak ochandgi kanyo. Jo maricho ok nosandgi kendo kaka ne gisandogi chon+ 10 chakre naketnegi jong’ad bura.+ Abiro loyo jowasiki duto.+ Bende, awachoni ni, ‘Jehova biro geroni ot.’
11 “‘“To ka chieng’ isetho minindo gi kwereni, anaket achiel kuom kothi, mana achiel kuom yawuoti+ e pinyruoth mi anagur lochne motegno.+ 12 En e ma nogerna ot+ kendo anagur kom-lochne nyaka chieng’.+ 13 Abiro bedo wuon mare kendo enobed wuoda.+ Ok nawe here+ kaka ne aweyo hero jal ma ne okwongoni.+ 14 Abiro chunge e oda kod e lochna nyaka chieng’,+ kendo kom-lochne nosik nyaka chieng’.”’”+
15 Nathan nonyiso Daudi weche kod fweny duto ma ne onyise.
16 Eka Ruoth Daudi ne odhi e nyim Jehova mowacho niya: “A Jehova Nyasaye, an to an ng’a? To oda en ang’o momiyo isetimona magi duto?+ 17 To pod ikwano mano kaka gima tin, A Nyasaye. Isenyisa ni oda nosik kuom ndalo mang’eny mabiro+ kendo isekwana mana ka ng’at monego omi duong’, A Jehova Nyasaye. 18 En ang’o kendo ma dawach kuom duong’ misemiya ka in to ing’eya maber?+ 19 A Jehova, isetimo gik madongogi duto nikech an kendo isemiyo ang’eyogi nimar mano e kaka chunyi dwaro.+ 20 A Jehova, onge Nyasaye machal kodi+ kendo onge moro amora mak mana in.+ Gik moko duto ma wasewinjo nyiso mano. 21 To ere oganda minyalo pim gi jogi Israel?+ In Nyasaye madier ne iwarogi nikech gin jogi,+ miloso nying maduong’ kuom timonegi honni kod gik madongo.+ Ne iriembo ogendni mamoko kod nyisechegi nikech jogi+ ma ne ireso e piny Misri. 22 Ne iketogi gibed ogandani kuom tienge duto;+ kendo in, A Jehova, isebedo Nyasachgi.+ 23 To koro, A Jehova, tim kaka isewacho ne jatichni kod ode e tienge duto, kendo tim mana kaka isesingo.+ 24 Nyingi osik kendo oyud duong’+ nyaka chieng’ mondo ji owach ni, ‘Jehova Nyasach oganda lweny e Nyasach Israel,’ kendo od Daudi mondo osik kogurore e nyimi.+ 25 Nimar in, A Nyasacha, isenyisa ni ibiro gerona ot. Mano e momiyo jatichni nigi chir mar wuoyo kodi. 26 To koro, A Jehova, in e Nyasaye madier kendo isesingo ne jatichni weche mabeyogi duto. 27 Omiyo, yie iguedh od jatichni kendo obedie kuom tienge duto, nimar iseguedho oda, kendo nosik kamano nyaka chieng’, A Jehova.”