Ne Tito
2 Kata kamano, in to sik kiwacho weche ma luwore gi puonj mangima.*+ 2 Chwo ma hikgi ng’eny mondo obed jo ma ok kal tong’ e timbegi, jo ma kawo gik moko gi pek kaka dwarore, ma pachgi long’o, motegno e yie, e hera, kod nano. 3 Kamano bende, mon ma hikgi ng’eny mondo obed jo ma timbegi nyiso luor, ok jo ma ketho nying jomamoko, kik gibed wasumbni mag divai mang’eny, to gibed jopuonj mag gik mabeyo; 4 mondo gipuonj* mon matindo oher chwogi, oher nyithindgi, 5 obed jo ma pachgi long’o, jo ma timbegi ler, jo ma rito utegi e yo maber,* jo ma timo gik mabeyo, jo ma bolore ne chwogi,+ mondo ji kik wuo e yor achaya e wi wach Nyasaye.
6 Kamano bende dhi nyime jiwo chwo matindo mondo gibed jo ma pachgi long’o,+ 7 kiketo ranyisi kuom bedo gi timbe mabeyo e yore duto. Puonj gik maler* gi pek ma dwarore,+ 8 kitiyo gi weche mangima* ma ok nyal ketnie bura,+ eka mondo jo akwede oyud wich-kuot nimar gionge gi gima rach ma ginyalo wacho kuomwa.+ 9 Wasumbni mondo obolre ne ruodhigi e weche duto,+ kendo gitem morogi. Kik gibed jo ma dwokore kodgi, 10 kik gikwalgi,+ to ginyis ni gin jo minyalo gen chuth, mondo e yore duto gibidh puonj mar Jawarwa, ma en Nyasaye.+
11 Nimar ng’wono mogundho mar Nyasaye osenenore ayanga kuom kelo warruok ne ji duto mopogore opogore.+ 12 Ng’wonono puonjowa mondo watamre timbe ma ok nyis luoro Nyasaye kod gombo mag piny,+ kendo mondo wadag ka wanyiso ni wan gi paro malong’o gi tim makare kod chiwruok chuth ne Nyasaye e pinyni,*+ 13 sa ma warito geno ma kelo mor+ kod fwenyruok maduong’ mar Nyasaye maduong’ kod mar Yesu Kristo Jawarwa, 14 ma nochiwore owuon nikech wan+ mondo ogonywa+ a e kit ketho duto kendo mondo opwodhwa owuon wabedne oganda makende, ma nigi kinda ne timbe mabeyo.+
15 Sik kiwuoyo kuom wechego, kijiwo ji, kikwero ji, kendo itim kamano ka in gi teko duto mar chiko weche.+ Kik iwe mondo ng’ato ochayi.