Barua Mokwongo ne Timotheo
1 An Paulo ma jaote Kristo Yesu kokalo kuom chik Nyasaye Jawarwa kod mar Kristo Yesu ma en genowa,+ 2 andikoni in Timotheo,*+ nyathina madier+ kuom yie:
Ng’wono mogundho gi kech kod kuwe mar Nyasaye Wuoro kod Kristo Yesu Ruodhwa mondo obed kodi.
3 Mana kaka ne ajiwi mondo idong’ Efeso sa ma ne achiegni dhi Makedonia, e kaka atimo sani bende, mondo ichik jomoko kanyo ni kik gipuonj puonj moro mopogore, 4 bende, kik giket chunygi kuom sigendni mag miriambo+ kod nonro mag anyuola. Weche kaka mago ok kony,+ to gikelo mana penjo ma miyo ji timo nonro to ok gichiw ne ji gimoro moa kuom Nyasaye ma nyalo gero yie. 5 Kuom adier, gima duong’ momiyo wachiko kamano en ni mondo wabed gi hera+ ma wuok e chuny maler, chuny ma ok ketnwa bura, kod yie+ ma onge wuondruok. 6 Jomoko oseweyo wechego kendo baro mi gidonjo e mbekni manono.+ 7 Gidwaro bedo jopuonj+ mag chik to ok ging’eyo tiend gik ma giwacho, kata tiend gik ma giramo ni gin adier.
8 Koro wang’eyo ni Chik long’o ka ng’ato tiyo kode e yo makare, 9 kendo wang’eyo ni chik ok olos ne ng’at makare, to olose ne joketh-chik,+ jong’anyo, jo ma ok oluoro Nyasaye kod jo maricho, jo ma ok makre gi jowetegi kod jo mochayo gik maler, jo ma nego wuone kod mine, jonek, 10 joterruok,* chwo ma terore gi chwo wetegi, jo ma mako ji, jomiriambo, jo ma kuong’ore gi miriambo, kod gik moko duto ma kwedo puonj mangima*+ 11 mar wach maber ma nigi duong’ moa kuom Nyasaye mamor, ma ne oket e lweta.+
12 Agoyo erokamano ne Kristo Yesu Ruodhwa ma nomiya teko, nikech nokwana kaka ng’at migeno kuom miya migawo e tij Nyasaye,+ 13 kata obedo ni chon ne an ja achaya, jasand ji, kendo ne akwiny.+ Kata kamano, ne okecha nimar ne ajatimo gigo ka akia, kendo nikech ne aonge gi yie. 14 To ng’wono mogundho mar Ruodhwa nomedore ahinya kaachiel gi yie kod hera moa kuom Kristo Yesu. 15 Wachni en wach migeno kendo ma ji onego oyiego chuth: Kristo Yesu nobiro e piny mondo ores joricho.+ To kuomgi, an e jaricho ma rachie moloyo.+ 16 Kata kamano, ne okecha mondo kokalo kuoma an ma ne arachie moloyo, Kristo Yesu onyis horuokne duto, koketa kaka ranyisi ne jo ma biro keto yiegi kuome mondo gibi giyud ngima ma nyaka chieng’.+
17 To koro luor kod duong’ ma nyaka chieng’ obed kuom Ruoth mochwere,+ ma ok nyal kethore,+ ma ok ne,+ ma en e Nyasaye kende.+ Amin.
18 In Timotheo nyathina, in e ma achiki wachni kaluwore gi weche ma ne okor chon kuomi mondo kokalo kuom wechego, idhi nyime kedo e lweny maberno,+ 19 ka imakori gi yie kendo ka in gi chuny maler,+ ma jomoko osewito, kendo mano osemiyo yiegi okethore mana kaka meli mokethore e nam. 20 Humenayo+ kod Aleksander gin moko kuom jo ma kamago, kendo asechiwogi e lwet Satan+ mondo giyud puonj kokalo kuom kum mondo kik gicha Nyasaye.