Tich Joote

21 Ka ne wasewere kodgi mi waidho meli, ne wadhi moriere nyaka Kos. Kinyne ne wadhi Rodo, to a kanyo ne wadhi Patara. 2 Ne wayudo meli moro ma dhi Foinike mi waidho. 3 Ka ne wachopo ka ma koro ne wanyalo nenoe chula mar Saipras ma ne ni koracham, ne wakale mi wadhi nyaka Siria, kendo ne wachopo Turo, nimar kanyo e ma ne onego olorie osike ma ne ni ei melino. 4 Ne wamanyo jopuonjre mi wayudogi kae to ne wabet kanyo kuom ndalo abiriyo. Eka roho maler notayogi mi giwacho ne Paulo nyadinwoya ni mondo kik onyon Jerusalem.+ 5 Omiyo, ka ndalogo noserumo, ne wawuok mi wachako wuodhwa, to jogo duto kaachiel gi mon kod nyithindo nokowowa nyaka oko mar dalano. Kendo bang’ goyo chongewa piny, ne walemo e dho wath 6 kae to wagore oriti. Bang’ mano, ne waidho meli to gin ne gidok e miechgi.

7 Ka ne watieko wuodhwa gi meli ka wawuok Turo mi wachopo Potolomai, ne wamoso owete mi wabet kodgi kuom ndalo achiel. 8 Kinyne ne wawuok mi wadhi Kaisaria, kendo ne wadonjo e od Filipo jayal-injili ma ne en achiel kuom ji abiriyoka,*+ mi ne wadak kode. 9 Jalno ne nigi nyiri ang’wen ma ne pok okendi* kendo ne gin jokor wach.+ 10 To bang’ bedo kanyo kuom ndalo mogwaro, janabi moro ma nyinge Agabo+ ne olor koa Judea. 11 Mi nobiro irwa kendo nokawo msip mar Paulo mi notueyogo tiendene kod lwetene owuon, kae to nowacho niya: “Roho maler wacho ni, ‘Jal ma en wuon msibni, Jo-Yahudi biro tueye ka ma Jerusalem,+ kendo gibiro chiwe e lwet ogendni mamoko.’”+ 12 Koro ka ne wawinjo wachno, wan kod jo ma ne ni kanyo, ne wachako sayo Paulo ni kik odhi Jerusalem. 13 Eka Paulo nodwoko kama: “Ang’o momiyo uywak kendo utemo nyoso chunya? Ng’euru ni aikora, ok mana ni mondo otueya, to aikora bende ne tho Jerusalem nikech nying Ruoth Yesu.”+ 14 Ka loko pache notamowa, ne wawere kode mi wawacho kama: “Dwaro mar Jehova* e ma mondo otimre.”

15 Koro bang’ ndalogo, ne waikore ne wuoth mi wawuok mondo wadhi Jerusalem. 16 Jopuonjre moko moa Kaisaria bende ne odhi kodwa, mi ne giterowa nyaka ir Manason ma Ja-Saipras, ma ne en achiel kuom jo ma nokwongo bedo jopuonjre. En e ma ne wadhi bedo wende. 17 Ka ne wadonjo Jerusalem, owete norwakowa gi mor. 18 Kinyne Paulo ne odhi kodwa ir Jakobo,+ kendo jodongo duto ne ni kanyo. 19 Eka nomosogi mochako leronegi adimba weche duto ma Nyasaye notimo ne ogendni mamoko kokalo kuom tije mar yalo.

20 Bang’ winjo wechego, ne gichako miyo Nyasaye duong’, to ne giwacho ne Paulo kama: “Owadwa, ing’eyo kaka nitiere Jo-Yahudi gana mang’eny moseyie, kendo giduto gin gi kinda ne Chik.+ 21 To gisewinjo wach moro kuomi ni isebedo kipuonjo Jo-Yahudi duto ma yudore e kind ogendni mamoko puonj ma kwedo chik Musa, kikwerogi ni kik giter nyithindgi nyangu, bende ni kik giluw timbe ogandawa.+ 22 To koro ang’o monego watim kuom wachno? Adier gibiro winjo ni isechopo kae. 23 Omiyo, tim gima wadwaro wachonini: Wan kae gi ji ang’wen mosekuong’ore. 24 Wuog idhi gi jogi kendo ipwodhri kodgi kaluwore gi chik, kendo ichulnegi chudo ma nyalo dwarore kuomgi, mondo oliel wigi. Eka ji duto biro ng’eyo ni kare onge gimoro marach kuom weche ma ne owach kuomi, to ni timbeni oriere kendo ni in bende irito Chik.+ 25 Jopuonjre moko moa e ogendni mamoko, wasendikonegi wach ma waseng’ado, ni onego giwere gi gik motimgo misango ne sanamu,+ kaachiel gi remo,+ gi gik mode,*+ kod terruok.”*+

26 Eka kinyne Paulo nokawo jogo mi ne opwodhore kodgi kaluwore gi chik,+ kae to nodonjo e hekalu mondo onyis kinde ma pwodhruokgi ne dhi rumoe mondo jadolo ochiw misango ne ng’ato ka ng’ato kuomgi.

27 Koro ka ndalo abiriyogo ne chiegni rumo, Jo-Yahudi ma noa Asia ne onene e hekalu, mi ne githuwo oganda duto kode, kendo ne gimake 28 ka gikok niya: “Yaye un Jo-Israel konywauru! Ma e ng’at ma puonjo ji duto kamoro amora mondo gicha ogandawa, Chikwa, kod ka malerni. Kendo e wi mano, oserwako kata mana Jo-Grik ei hekalu, kendo osechido kama lerni.”+ 29 Nimar noyudo giseneno Trofimo+ ma Ja-Efeso ka ni kode Jerusalem, kendo ne giparo ni Paulo ne oserwake ei hekalu. 30 Dalano mangima nobedo gi koko kendo ji noringo kanyachiel mi gimako Paulo kendo ne giywaye ka gitere oko mar hekalu, kae to gikanyono ne olor dhoudi. 31 Sa ma ne gitemo nege, ne oter wach ne jatend-jolweny maduong’,* mi ne ginyise wach chochni ma ne nitiere Jerusalem mangima; 32 mi gikanyono jatelono nokawo jolweny kod jotendgi* mi giringo nyaka ir jogo. Ka ogandano noneno jatend-jolweny maduong’no* kod jolweny, ne giweyo goyo Paulo.

33 Eka jatend-jolweny maduong’no* nosudo machiegni kendo nomako Paulo mi nochiko ni mondo otueye gi nyoroche ariyo;+ kae to ne openjo mondo onyise ni en ng’at manade kod gima dibed ni osetimo. 34 To jomoko ei oganda ne kok kuom wach achiel, to moko kuom wach machielo. Omiyo, ka ok nonyal ng’eyo wach moro malong’o nikech chochnino, nochiko ni mondo oter Paulo kama askeche odakie. 35 To ka Paulo nochopo ka miidhogo ot, askeche ne oting’e ka giidho kode nikech ogandano ne ger ahinya, 36 nimar ji mang’eny ne siko ka luwogi kendo kok niya: “Negeuru!”

37 Koro kane gichiegni rwako Paulo kama askeche ne odakie, nopenjo jatend-jolweny maduong’no* niya: “Be inyalo yiena mondo awachnie gimoro?” Eka jatelono nopenje kama: “Be inyalo wacho Dho-Grik? 38 Koso dibed ni in e Ja-Misri ma nomiyo ji ong’anyo ne sirkal e ndalo mokalo ka ne itayo ji 4,000 ma ne kedo gi ligangla kendo ne itelonegi nyaka e thim?” 39 Eka Paulo nodwoke kama: “Kuom adier an Ja-Yahudi+ moa e dala mar Tarso+ e Kilikia, ma en dala mong’ere ahinya. Omiyo, asayi, yiena mondo awuo gi ogandani.” 40 Bang’ ka jalo noseyiene, Paulo ne ochung’ kama iidhogo ot, mi nofwayo lwete ne oganda. Eka ka ji noseling’, nochako wuoyo kodgi gi dho Hibrania+ kowacho niya: