Tich Joote

6 Koro e ndalogo, ka kwan jopuonjre ne medore, Jo-Yahudi ma ne wacho dho Grik nochako ng’ur ne Jo-Yahudi ma ne wacho dho Hibrania nimar mond lietegi ne ijwang’o e wach chiemo ma ne ipogo pile ka pile.+ 2 Omiyo, ji Apar Gariyoka noluongo jopuonjre mi giwachonegi kama: “Ok en gima kare ni wawe wach Nyasaye mondo wapog chiemo.+ 3 Kuom mano, owete, yieruru chwo abiriyo e kindu ma nigi nying maber,+ mopong’ gi roho maler kod rieko,+ mondo waketgi e migawo mochunoni;+ 4 to wan wabiro chiwore chuth ne lamo kod tij puonjo.” 5 Gima ne giwachono ne omoro oganda duto, mi ne giyiero Stefano, ng’at ma nopong’ gi yie kod roho maler. Bende, ne giyiero Filipo,+ gi Prokoro, gi Nikanor, gi Timon, gi Parmena, kod Nikolao Ja-Antiokia, jal ma ne odonjo e din mar Jo-Yahudi. 6 Ne gikelogi ir joote, kendo bang’ lamo, jootego noketo lwetgi kuomgi.+

7 Nikech mano, wach Nyasaye nomedo landore,+ kendo kwan mar jopuonjre ne medore ahinya+ Jerusalem; oganda mang’ongo mar jodolo bende norwako yie.+

8 Koro Stefano ne opong’ gi ng’wono mar Nyasaye kod teko, kendo notimo tije madongo kod honni e kind ji. 9 To jomoko mowuok e Sunagogi mar Jo ma Ogony nobiro kaachiel gi Jo-Kurene, gi Jo-Aleksandria, gi jo ma oa Kilikia kod Asia, mondo gimin wach gi Stefano. 10 To jogo ne ok nyal loye gi wach nikech rieko kod roho maler ne taye.+ 11 Eka ne gisemo jomoko ling’ling’ mondo jogo owach niya: “Wasewinjo kowacho weche ma nyiso ni ochayo Musa gi Nyasaye.” 12 Kendo ne gimiyo oganda, gi jodongo, kod jondiko obedo gi mirima kode, mi jogo ne opoye kendo ne gimake gi thwon mi gitere e buch Sanhedrin. 13 Kae to ne gikelo joneno mag miriambo ma nowacho kama: “Ng’atni pod wacho weche maricho e wi kama lerni kendo e wi Chik. 14 Kuom ranyisi, wasewinjo kowacho ni Yesu ma Ja-Nazareth biro goyo kama lerni piny mi olok timbe kod chike ma Musa nomiyowa.”

15 Eka ji duto ma nobet e buch Sanhedrin nochomo wengegi kuome, mi ne gineno ka lela wang’e chal gi mar malaika.