Tich Joote
23 Paulo nochomo wang’e tir kuom Sanhedrin mowacho kama: “Owetena, asewuotho e nyim Nyasaye gi chuny maler ma onge bura nyaka kawuononi.” 2 Gikanyono, Anania jadolo maduong’ nochiko jo ma ne ochung’ machiegni kode mondo gigo dhoge. 3 Eka Paulo nowachone kama: “Nyasaye biro goyi, in kor ot mobuk ma racharni. Ikelo nade bet piny mondo ing’adna bura kaluwore gi Chik, ka gie sano bende in iwuon iketho Chik kuom chiko mondo ogoya?” 4 Jo ma ne ochung’ bute nopenje kama: “Be ing’eyo ni iyanyo jadolo maduong’ mar Nyasaye?” 5 Eka Paulo nodwoko niya: “Owetena, ok ne ang’eyo ni en jadolo maduong’. Nikech ondik ni, ‘Kik iwuo marach e wi jatelo moro amora e ogandau.’”+
6 Koro ka Paulo nofwenyo ni jomoko kuomgi ne gin Jo-Sadukai to moko ne gin Jo-Farisai, ne okok e nyim buch Sanhedrin niya: “Owetena, an Ja-Farisai+ kendo wuod Jo-Farisai. Wach chier mar jo motho e momiyo sani ing’adona bura.” 7 Wachno nomiyo ywaruok obetie e kind Jo-Farisai gi Jo-Sadukai mi ne gipogore. 8 Nimar Jo-Sadukai ne wacho ni onge chier, kata malaike, kata chuech ma ok ne, Jo-Farisai to ne oyie kuom wechego duto.+ 9 Omiyo, koko maduong’ ne omuoch, kendo moko kuom jondiko e kind Jo-Farisai ne ochung’ mi ne gichako yware ka giwacho kama: “Ok wayudo ketho moro amora kuom ng’atni, to mana ka po ni chuech moro ma ok ne, kata malaika e ma owuoyo kode—.”+ 10 Koro ka ywaruokno nomedore ahinya, luoro nomako jatend-jolweny maduong’* koparo ni ne gidhi kidho Paulo matindo tindo. Omiyo, nochiko askeche mondo gidhi gigole gi thwon e dier oganda mondo gitere kama askeche odakie.
11 E otienono, Ruoth ne ochung’ bute mowachone niya: “Bed gi chir!+ Nimar mana kaka isebedo kichiwo neno kuoma e okang’ mong’ith Jerusalem, e kaka ibiro chiwo neno Rumi bende.”+
12 Ka piny ne oru, Jo-Yahudi nokuong’ore ling’ling’ ka giwacho ni ne ok gidhi chiemo kata metho ka pok ginego Paulo. 13 Ji mokalo 40 ne okuong’ore kamano. 14 Jogi ne odhi ir jotend-jodolo gi jodongo, mi ne giwachonegi kama: “Wasekuong’ore ni ok wadhi chamo gimoro amora ngang’ nyaka waneg Paulo. 15 Omiyo, koro un kaachiel gi buch Sanhedrin nyisuru jatend-jolweny maduong’* okelnu Paulo mondo onenre ka gima udwaro medo nono wachne e yo malong’o moloyo. Wabiro ikore kendo wabiro nege ka pok ochopo machiegni.”
16 Kata kamano, wuod nyamin Paulo nowinjo kichano wach ma ling’ling’no, omiyo nodonjo kama askeche ne odakie monyiso Paulo wachno. 17 Eka Paulo noluongo achiel kuom jotend-jolweny* ire, mowachone niya: “Kaw ane rawerani mondo itere ir jatend-jolweny maduong’,* nimar en gi wach moro modwaro nyise.” 18 Omiyo, nokawe motere ir jatend-jolweny maduong’no* kendo nowachone kama: “Paulo, jal motuecha ne oluonga mokwaya ni akel rawerani iri nikech en gi wach moro modwaro nyisi.” 19 Jatend-jolweny maduong’no* nomako lwete mi ne odhi kode tenge kar kendgi mopenje kama: “En wach mane midwaro nyisa?” 20 Nodwoke kama: “Jo-Yahudi osewinjore ni gidwaro kwayi mondo kiny iter Paulo e buch Sanhedrin mondo onenre ka gima gidwaro ng’eyo wachne e okang’ momedore.+ 21 Kata kamano, kik iyie. Nimar giseiko ji mokalo 40 ma kiye mondo gimonje, kendo gisekuong’ore ni ok gibi chiemo kata metho ka pok ginege.+ To koro sani giseikore ka girito wach moa kuomi.” 22 Jatend-jolweny maduong’no* ne oweyo rawerano mondo odhi bang’ chike kama: “Kik iwach ne ng’ato ni isenyisa wachno.”
23 Eka noluongo jotend-jolweny* ariyo kendo nochikogi niya: “Ikuru askeche 200 mondo gidhi Kaisaria, kendo uik joidh farese 70 kod ji 200 moting’o tong’. Utim kamano sa adek otieno. 24 Bende, miuru Paulo faras ma oidho mondo odhigo ir gavana Feliks, ma ok gima rach oyude.” 25 Eka nondiko barua ma wacho kama:
26 “An Klaudio Lusio, amosi in jal Moluor Moloyo, Gavana Feliks. 27 Jo-Yahudi nomako jali kendo ne gichiegni nege, to ne abiro apoya gi askechena mi arese,+ nimar ne afwenyo ni en Ja-Rumi.+ 28 Kendo ka nadwaro ng’eyo gimomiyo ne gidonjone, ne atere e buchgi mar Sanhedrin.+ 29 Eka ne anwang’o ni ne gidonjone e wi weche mag chikgi giwegi,+ to onge gima ne odonjnego mowinjore gi tho kata tuech e jela. 30 To nikech aseyudo wach ni gichano nege,+ ero aore iri mapiyo kendo achiko jo ma nigi wach kode mondo gidonjnego e nyimi.”
31 Omiyo, askechego nokawo Paulo+ kaka ne ochikgi mi ne gitere gotieno nyaka Antipatra. 32 Eka kinyne ne giweyo joidh farese mondo omed dhi kode, gin to ne gidok kama askeche ne odakie. 33 Joidh faresego nodonjo Kaisaria mi ne gimiyo gavana baruano kendo ne giketo Paulo e nyime. 34 Omiyo, gavana nosomo baruano kendo nopenjo alwora ma Paulo wuokie, mi nonwang’o ni ne owuok Kilikia.+ 35 Nowachone kama: “Abiro winji maber kuom wachni ka jo ma odonjoni osechopo.”+ Kendo nochiko ni orit Paulo e od ruoth Herode.