Ne Jo-Hibrania

1 Chon ahinya, Nyasaye ne wuoyo gi kwerewa kotiyo gi jonabi, to nojatimo kamano kinde mang’eny kendo e yore mathoth.+ 2 To koro e giko mar ndalogi, osebedo kowuoyo kodwa kokalo kuom Wuode,+ ma en jal ma noketo mondo obed jayud pok mar gik moko duto,+ kendo ma kokalo kuome ne oloso piny.*+ 3 En e ma duong’ mar Nyasaye nenore kuome+ kendo en e ma en e kido ma chal gi Nyasaye chuth;+ bende, en e ma omiyo gik moko duto dhi nyime betie kokalo kuom teko mar wachne. Kendo ka nosepwodhowa kuom richo,+ nobet piny e bad Nyasaye korachwich e polo malo.+ 4 Omiyo, oseyudo duong’ moloyo malaike,+ mana kaka nying momiye nigi duong’ moloyo margi.+

5 Kuom ranyisi, en malaika mane ma Nyasaye osegawachone kama: “In Wuoda; kawuono asebedo wuonu”?+ Kendo niya: “Abiro bedo wuon mare kendo enobed wuoda”?+ 6 To ka kendo ooro Wuode makayo+ e piny, owacho kama: “Malaike duto mag Nyasaye mondo okulrene.”

7 Bende, Nyasaye wacho e wi malaike kama: “Omiyo malaikene bedo chuech ma nigi teko, kendo omiyo jotichne*+ bedo mach mager.”+ 8 To e wi Wuode owacho kama: “Nyasaye e kom-lochni+ nyaka chieng’, kendo ludh loch mar Pinyruodhi en ludh adiera. 9 Ne ihero tim makare, to nisin gi timbe maricho. Mano e momiyo Nyasaye ma Nyasachi osewiri+ gi mo mi oting’i malo moloyo joweteni.”+ 10 Kendo niya: “A Ruodhwa, e kar chakruok ne iketo mise mag piny, kendo polo en tij lweti. 11 Gibiro lal nono, to in ibiro siko nyaka chieng’; gibiro ti mana ka law, 12 kendo ibiro ban-gi mana kaka kandho, kaka nanga, kendo nolokgi kaka iloko nanga. To in ok ilokri, kendo ibiro siko nyaka chieng’.”+

13 To en malaika mane ma osegawachone niya: “Bed e bada korachwich nyaka chop aket wasiki obed raten tiendi”?+ 14 Donge malaike duto gin chuech ma nigi teko moket ne tich maler,*+ kendo oseorgi mondo giti ne jo ma biro yudo warruok?