Isaya
37 Ka Ruoth Hezekia nowinjo wechego, ne oyiecho lepe, mi orwako lep gunia, kae to odhi e od Jehova.+ 2 Eka ne ooro Eliakim wuod Hilkia ma nochung’ ne od ruoth, gi Shebna jagoro, kaachiel gi jodong jodolo ir janabi Isaya+ wuod Amoz. Ne gidhi ire ka girwako lep gunia. 3 Ne giwachone niya: “Ma e gima Hezekia owacho, ‘Kawuono en chieng’ chandruok, ayany, kod wich-kuot; muoch kayo mine, to gionge gi teko mar nyuol.+ 4 Koro, wakwayi ni ilem+ ne jo ma pod odong’,+ nimar samoro Jehova Nyasachi biro winjo weche ma ruodh Asuria oseorogo Rabshake mondo oyany Nyasaye mangima,+ kendo Jehova Nyasachi biro kume nikech weche ma osewachogo.’”
5 Omiyo, jotich Hezekia ne odhi ir Isaya.+ 6 Eka Isaya ne owachonegi niya: “Dhiuru uwach ne ruodhu ni Jehova owacho kama: ‘Kik iluor+ nikech weche ma isewinjo ka joote mag ruodh Asuria+ yanyago. 7 Abiro loko pache, kendo obiro winjo wach moro mi nodog e pinye.+ Abiro miyo onege gi ligangla e pinye owuon.’”+
8 Ka ne Rabshake owinjo ni ruoth Asuria osewuok Lakish, ne odok ire mi oyude ka okedo gi Libna.+ 9 Eka ruodh Asuria nowinjo ni Tirhaka ruodh Ethiopia osebiro kedo kode. Omiyo, ka nowinjo wachno, ne ooro joote kendo ir Hezekia+ niya: 10 “Dhiuru unyis Hezekia ruodh Juda niya: ‘Kik iwe mondo Nyasachi ma igeno kuomeno owuondi ni Jerusalem ok bi podho e lwet ruodh Asuria.’+ 11 Isewinjo kaka ruodhi mag Asuria oseketho pinje duto ma ne gikedogo.+ Koro iparo ni in e ma ibiro kwo? 12 Ere Gozan, Haran,+ Rezef, kod jo Eden ma nodak Eden Tel-asar? Be nyiseche ma ogendnigo ne lamo noresogi adier e lwet kwerena?+ 13 Bende, ere ruodh Hamath, gi ruodh Arpad, gi ruodh mier mag Sefarvaim,+ gi Hena, kod Iva?”
14 Hezekia ne okawo barupe ma jootego nokelone, mi osomogi. Eka ne odhi e od Jehova mi oyaro barupego e nyim Jehova.+ 15 Ne ochako kwayo Jehova+ kowacho niya: 16 “A Jehova Nyasach oganda lweny,+ Nyasach Israel mobet e kom-lochne e wi* jokerubi. In kendi e Nyasaye madier e wi pinjeruodhi duto manie piny. In e ma ne ichueyo polo gi piny. 17 Yaye Jehova, chik iti mondo iwinji!+ A Jehova, yaw wang’i mondo ine!+ Winjie weche duto ma Senakerib oseoro mondo oyanygo Nyasaye mangima.+ 18 A Jehova, en adier ni ruodhi mag Asuria oseketho pinje mamoko duto+ kaachiel gi pinygi giwegi. 19 Kendo gisewito nyisechegi e mach,+ nikech ne ok gin nyiseche, to ne gin mana gik ma dhano oloso gi lwetegi+ ka gitiyo gi bao kod kite. Mano e momiyo ne gikethogi. 20 To koro, A Jehova Nyasachwa, wakwayi ni ireswa e lwete mondo pinjeruodhi duto mag piny ong’e ni in kendi e Nyasaye, yaye Jehova.”+
21 Eka Isaya wuod Amoz ne ooro wachni ne Hezekia kama: “Jehova Nyasach Israel owacho ni, ‘Nikech isekwaya mondo aresi e lwet Senakerib ruodh Asuria,+ 22 ma e gima Jehova osewacho kuome:
“Nyar Sayun ma silili osechayi, kendo ojari.
Nyar Jerusalem kinoni wiye.*
23 Ng’ano ma isejaro+ kendo yanyo kamano?
Ng’ano ma isekokne gi dwol maduong’ kamano?+
Ng’ano ma isejowone wengeni kamano?
Isetimo kamano ne Ng’at Maler mar Israel!+
24 Iseoro jotichni mondo ojar Jehova,+ kiwacho niya:
‘Abiro idho wi gode madongo+
Gi gechena mag lweny mokalo akwana,
Anachop nyaka kuonde maboyo mag Lebanon.
Abiro tong’o yiendene madongo mag sida kod yiendene mabeyo mag junipa.
Abiro chopo nyaka e i chuny bungu man iye mogik.
25 Abiro kunyo sokni, mi anamodh pige;
Ananyon aoche matindo mag Misri gi tiendena mi giduon.’
26 Dibed ni pok uwinjo? Noseng’ad wachno chon.
Asebedo ka aike chakre ndalo mokalo.+
Wang’ni to adhi kele.+
Ibiro muko mier mochiel motegno mi ginidong’ pidhe pidhe.+
27 Jo modak kuondego biro dhier nono;
Gibiro luor kendo wigi biro kuot.
Gibiro chalo gi yiende kod lum mang’ich manie pap,
Kaka lum motwi e wi tado ma ner ka yamb ugwe ogoyo.
28 To ang’eyo sa ma ibet, sa ma iwuok, sa ma iduogo,+
Kendo sa ma in gi mirima koda,+
29 Nikech mirima ma in-go koda+ kod koko migoyo osechopo e ita.+
Omiyo, abiro keto ramaki mara e umi kod ragayi+ e dhogi,
Kendo anaduoki gi yo ma ne ibirogo.”
30 “‘To in Hezekia, ma e ranyisi ma amiyi: Higani ubiro chamo gik motwi kendgi. Higa ma biro ubiro chamo orowe.* To e higa mar adek, ubiro komo mi unuka cham. Bende, ubiro pidho mzabibu mi unucham olembgi.+ 31 Jo-Juda ma biro tony, tiende ni jo modong’,+ biro chalo gi yath ma tero tiendene piny kendo nyago olembe e bedene. 32 Nimar jo manok modong’ biro wuok Jerusalem, kendo jo motony biro wuok e Got Sayun.+ Jehova Nyasach oganda lweny biro timo mano gi kinda.+
33 “‘Kuom mano, ma e gima Jehova owacho e wi ruodh Asuria:+
“Ok obi donjo e dalani+
Ok obi baye gi asere
Ok obi monje gi okumba
Kata loso pith mondo oidhgo ohingane.”’+
34 ‘Obiro dok gi yo ma nobirogo;
Ok nodonj e dalani,’ Jehova owacho.
36 Eka malaika mar Jehova nodhi monego jolweny mag Jo-Asuria 185,000 ka ma ne gigoyoe kambi. Ka ne ji ochiewo gokinyi ne gineno mana ringre jo motho kopie.+ 37 Omiyo, Senakerib ruodh Asuria noa kanyo modok thurgi Nineve.+ 38 To ka noyudo olemo e od Nisrok nyasache, yawuote ma Adramelek gi Sharezer nobiro monege gi ligangla.+ Bang’e, ne giringo mi gidhi e piny Ararat.+ Eka wuode ma Esarhadon+ nochako locho kare.