Samuel Mokwongo

2 Hana ne olemo niya:

Onge lwanda machal gi Nyasachwa.+

11 Bang’ mano, Elkana ne odok e ode Rama. To wuoyino ne odong’ ka tiyo ne Jehova+ e nyim Eli jadolo.

12 Yawuot Eli ne gin jo maricho,+ kendo ne ok giluoro Jehova. 13 Kar kawo pok mowinjore mar jodolo, ne gitimo kama:+ Sa moro amora ma ng’ato ne chiwo misango kendo ring’o ne chiek, jatij jadolo ne biro gi uma maduong’, 14 kae to ochwoye e agulu moro amora ma ne itede. Gimoro amora ma ne umano ochwoyo, jadolo ne kawo kaka pokne. Mano e kaka ne gitimo ne Jo-Israel duto ma ne biro Shilo. 15 Bende, ka pok ng’at ma ne golo chiwo owang’o bor,+ jatij jadolo ne biro ire kendo wachone niya: “Mi jadolo ring’o mondo odhi obul. Ok odwa ring’o ma isetedo, odwaro mana ring’o ma pok otedi.” 16 Ka ne ng’atno odwoke niya: “We awang’ bor duto mondi+ eka ikaw gima ihero,” jatij jadolo ne dwoke niya: “Ooyo, miya ring’o sani, ka ok kamano to abiro kawo githuon!” 17 Omiyo, richo ma jotij jodolo ne timono nobedo maduong’ ahinya e nyim Jehova,+ nimar ne gichayo chiwo ma ne igolo ne Jehova.

18 Gie kindeno, Samuel ne tiyo+ e nyim Jehova ka orwako efod mar kitani+ kata obedo ni ne en mana wuoyi matin. 19 Higa ka higa, min-gi ne twang’onega kandho matin ma onge bade kae to okelone kobiro gi chwore mondo gigol misango mar higa.+ 20 Eli ne oguedho Elkana gi chiege kowacho niya: “Mad Jehova miu nyathi kar nyathi ma usemiyo Jehova.”+ Kae to jonyuol Samuel ne odok dala. 21 Jehova ne oguedho Hana kendo mi nonyuol.+ Nonyuolo yawuoyi adek gi nyiri ariyo. Samuel to ne odhi nyime dongo e nyim Jehova.+

22 Eli ne hike oniang’ ahinya gie kindeno. Kata kamano, ne owinjo gik moko duto ma yawuote ne timo+ ne Jo-Israel. Ne owinjo bende kaka yawuotego ne terore gi mon ma ne tiyo e dho hema mar romo.+ 23 Eli ne janyiso yawuotego niya: “Ang’o momiyo utimo gik ma kama? Ji duto wacho gik maricho kuomu. 24 Ooyo yawuota, gik ma awinjo kiwacho kuomu e kind oganda Jehova ok gin gik mabeyo. 25 Ka ng’ato otimo richo ne dhano wadgi, ng’ato nyalo lemone mondo Jehova owene,* to ka ng’ato otimo richo ne Jehova,+ ng’ano ma nyalo lemone?” Kata kamano, yawuoyigo ne otamore winjo wuon-gi nikech Jehova ne oseng’ado ni obiro negogi.+ 26 Samuel to ne dhi nyime dongo kendo Jehova ne medo here kaachiel gi ji bende.+

27 Ng’at Nyasaye moro ne obiro ir Eli mowachone niya: “Ma e gima Jehova owacho: ‘Donge ne afwenyora maler ne od wuonu ka ne gin wasumbni mag Farao* e piny Misri?+ 28 Donge ne ayiero wuonu kuom dhoudi duto mag Jo-Israel+ mondo en e ma obedna jadolo, mondo ogol misengni e kendona mar misango,+ owang’ ubani, kendo orwak efod ka otiyona? Donge ne amiyo od wuonu chiwo duto ma Jo-Israel ne wang’o gi mach?+ 29 Koro ang’o momiyo uchayo* misengni kod chiwo ma achiko ni ogol ka ma adakie?+ Ang’o momiyo imiyo yawuoti duong’ moloyo ma imiya kendo ubedo machwe mana nikech uchamo gik mabeyo mogik ma Jo-Israel chiwo?+

30 “‘Mano e momiyo Jehova Nyasach Israel wacho niya: “Kuom adier, ne awacho ni odi kaachiel gi od wuonu nowuoth e nyima kinde duto.”+ Kata kamano, Jehova owacho niya: “Mano ok nyalre nikech jo ma miya duong’ e ma amiyo duong’,+ to jo ma ochaya akawo ka jo ma nono.” 31 Ne! Ndalo biro ma natiekie tekoni kod mar od wuonu kendo onge ng’ato e odi ma nodag ma bed moti.+ 32 Ibiro mana neno jasigu kinde ma atimone Jo-Israel maber.+ Kendo jaduong’ ok noyudre e odi ngang’. 33 To ng’atno ma ja dhoodi ma nodong’ ka tiyo e kendona, nobedni ng’at ma chido wang’i, kendo ma chando chunyi.* To thoth joodi ibiro neg gi ligangla.+ 34 Gima biro timore ne yawuoti ariyo Hofni gi Finehas nobedni ka ranyisi. Gibiro tho e odiechieng’ achiel.+ 35 Kae to abiro keto jadolo moluora+ ma biro timo gima chunya dwaro. Abiro gero ode mondo osiki, kendo kinde duto obiro wuotho e nyim jalno ma asewalo. 36 Ng’ato ang’ata modong’ e odi biro dhi kulore ne jadolo mondo oyud pesa gi makate. Obiro wachone niya: “Akwayi, yie imiya tij dolo mondo eka ayud kaka dachiem.”’”+