Samuel Mokwongo

6 Sandug Singruok+ mar Jehova ne obet e piny Jo-Filistia kuom dweche abiriyo. 2 Jo-Filistia noluongo jodolo gi ajuoke maggi+ mi gipenjogi niya: “Ang’o monego watim gi Sandug Singruok mar Jehova? Nyiswauru kaka onego wadwoke.” 3 Ne gidwokogi kama: “Sa ma udwoko sandug singruok mar Jehova Nyasach Israel, kik udwoke nono, to nyaka udwoknego gi misango mar ketho+ eka unuchangi, kendo eka ubiro ng’eyo gimomiyo osandou kama.” 4 Omiyo, ne gipenjo niya: “Waorne ang’o mondo obed misango mar ketho?” Ne gidwokogi niya: “Orneuru gik dhahabu abich machal gi buche* mokuodou gi oyieyo abich molos gi dhahabu. Orneuru gigo kaluwore gi kwan mag jotend Jo-Filistia,+ nimar tuoni osegoyou ute nyaka jotendu. 5 Losuru gik machal gi buche mokuodougo kod machal gi oyieyo+ ma ketho pinyu, kendo miuru Nyasach Israel duong’. Di po ka oweyo sandou kendo oweyo sando nyasachu kod pinyu.+ 6 Kik ubed gi tok matek kaka Jo-Misri gi Farao,+ ma ne omiyo Nyasach Israel osandogi malit+ nyaka ne giweyo Jo-Israel modhi.+ 7 Omiyo, losuru gari manyien kendo ukaw dhok* ariyo ma pok otwenega jok kendo man gi nyiroye. Tweuru dhogo e garino, to nyiroye udwok dala. 8 Keturu Sandug Singruok mar Jehova e garino, kae to gik museloso gi dhahabu ma udwaro oro ne Nyasach Israel kaka misango mar ketho, uket e sanduk moro e bathe.+ Kae to weuru garino odhi 9 kung’iyo ka ma ochomo. Ka oluwo yo ma dhi Beth-shemesh+ thurgi, kare Nyasach Israel e ma okelonwa masira maduong’ni. To ka ok oluwo yorno, wabiro ng’eyo ni kare ok en e ma osandowa, to masirani otimore atima kende.”

10 Jogo ne otimo kamano. Ne gikawo dhok* ariyo man gi nyiroye mi gitweyogi e gari, nyiroye to ne gitweyo dala. 11 Kae to ne giketo Sandug Singruok mar Jehova e garino kaachiel gi sanduk ma ne oting’o oyieyo mag dhahabu kod gik maket gi buche ma ne okuodogi. 12 Dhogo ne oluwo ndara ma dhi Beth-shemesh tir.+ Ne giluwo mana yo achielno ma ok gibaro korachwich kata koracham, kendo ne giywak ka gidhi. Jotelo mag Jo-Filistia to ne oluwo bang’gi nyaka ne gichopo e tong’ mar Beth-shemesh. 13 Jo-Beth-shemesh ne kayo ngano e pewe. Ka ne giting’o wang’gi ma gineno Sandug Singruok, chunygi ne opong’ gi mor. 14 Garino nodhi nyaka e puoth Joshua Ja-Beth-shemesh mi ochung’ but kidi moro maduong’. Ne gibaro yien ma ne olosgo garino mi gichiwo ne Jehova dhok ariyogo+ kaka misango miwang’o.

15 Jo-Lawi+ ne ogolo Sandug Singruok mar Jehova kaachiel gi sanduk ma ne oting’o gik dhahabu e garino ma giketogi e wi kidi maduong’no. E odiechieng’no, Jo-Beth-shemesh+ ne ochiwo ne Jehova misengni miwang’o kaachiel gi misengni mamoko.

16 Ka ne jotelo abich mag Jo-Filistia oneno kamano, ne gidok Ekron mana chieng’no. 17 Magi e kwan buche mag dhahabu ma ne Jo-Filistia otero ne Jehova kaka misango mar ketho:+ Achiel ne en mar Jo-Ashdod,+ achiel mar Jo-Gaza, achiel mar Jo-Ashkelon, achiel mar Jo-Gath,+ to achiel mar Jo-Ekron.+ 18 Kwan mar oyieyo mag dhahabu ne romre gi kwan mag mier duto mag Jo-Filistia ma ne jotelo abichgo lochoe. Miergo ne oriwo mier mochiel motegno kod gwenge ma ok ochiel.

Kidi maduong’ ma ne gikete Sandug Singruok mar Jehova nie puoth Joshua Ja-Beth-shemesh nyaka kawuononi kaka ranyisi mar gima ne otimoreno. 19 Kata kamano, Nyasaye ne onego Jo-Beth-shemesh nikech ne ging’iyo Sandug Singruok mar Jehova. Ne onego ji 50,070 mi Jo-Beth-shemesh ne oywak nikech Jehova ne onego joggi mang’eny ahinya.+ 20 Omiyo, ne gipenjore niya: “Ng’a ma dichung’ e nyim Jehova, Nyasaye malerni?+ Mad owere kodwa mondo odhi ir jomoko!”+ 21 Omiyo, ne gioro ji Kiriath-jearim+ mondo giter wach niya: “Jo-Filistia oseduoko Sandug Singruok mar Jehova. Biuru ukawe.”+