Jona
4 Wachno ne owang’o i Jona ahinya, mi obedo gi mirima mager. 2 Omiyo, ne olemo konyiso Jehova niya: “Yaye Jehova, donge ma e gima nawacho ni dhi timore ka ne pod an thurwa? Mano e momiyo ne aringo mondo adhi Tarshish.+ Nang’eyo ni in Nyasaye mang’won, ma kecho ji, ma iye ok wang’ piyo, mogundho gi hera mosiko,+ kendo ma winjo lit sa ma odwaro kelo masira. 3 To koro, yaye Jehova, kaw ngimana, nimar ber ka atho moloyo bedo mangima.”+
4 To Jehova nopenje niya: “Be iparo ni en gima ber ka ibedo gi mirima kamano?”
5 Jona ne owuok e dalano modhi obet piny yo wuok chieng’. Ne ogero kiru kanyo mi obet e tipone ka orito neno gima dhi timore ne dalano.+ 6 Eka Jehova nomiyo otangwe otwi e wi kiruno mondo okel tipo ma nyalo miyo Jona obed gi kuwe. Otangweno ne omoro chuny Jona ahinya.
7 Kinyne gokinyi, Nyasaye madier ne ooro kudni moro mi ochamo otangweno, mi oner. 8 Ka chieng’ ne ochako tegno, Nyasaye ne ooro yamb ugwe, mi chieng’ ochako goyo wi Jona, mool ahinya. Nomedo mana kwayo ni mondo otho. Nosiko kowacho kama: “Ber ka atho moloyo bedo mangima.”+
9 Nyasaye nopenjo Jona niya: “Be iparo ni en gima ber ka ibedo gi mirima nikech otangweno?”+
Nodwoko kama: “Ee, ber ka abedo gi mirima, kendo ber ka atho.” 10 To Jehova nonyise kama: “Ka inyalo kecho otangwe ma ne otwi atwiya kende e otieno achiel kendo oner e otieno machielo, 11 donge ber ka akecho dala maduong’ mar Nineve+ ma nigi ji mokalo 120,000 ma ok ong’eyo pogo ber gi rach,* kaachiel gi jambgi mang’eny?”+