Mokwongo ne Jo-Korintho

10 Owetena, koro daher ni ung’e ni kwerewa ne ni e bwo bor polo+ kendo giduto ne ging’ado nam.+ 2 Bende, giduto ne obatisgi kuom bedo e winjruok achiel gi Musa ka gin e bwo bor polo kod nam, 3 kendo giduto ne gichamo chiemb chuny machal+ 4 mi giduto ne gimodho pi chuny machal.+ Nikech ne gijomodho koa e lwanda mar chuny ma ne luwo bang’gi, to lwandano ne ochung’ ne Kristo.+ 5 Kata kamano, Nyasaye ne ok oyie gi thothgi, nimar ne oneggi e thim.+

6 Koro gigo nobedonwa kaka ranyisi mondo kik wagomb gik ma kelo hinyruok kaka jogo ne ogombo.+ 7 Bende, kik wabed jo ma lamo sanamu kaka moko kuomgi notimo; mana kaka ne ondik niya: “Ne gichiemo ma gimetho kendo ne gimor ahinya.”+ 8 Kendo kik waterre,* kaka moko kuomgi ne oterore* mi ji 23,000 kuomgi ne otho e odiechieng’ achiel.+ 9 Bende, kik watem Jehova*+ kaka moko kuomgi noteme mi thuonde nonegogi.+ 10 Bende, kik wang’ur kaka moko kuomgi ne ong’ur+ mi jachiw-kum nonegogi.+ 11 Koro gigo notimorenegi mondo obed ranyisi, kendo nondikgi mondo wayudgo siem,+ wan ma wadak e ndalo mag giko pinyni.*

12 Omiyo, ng’at ma paro ni ochung’, otang’ ahinya mondo kik olwar.+ 13 Onge tem moro amora mosebironu mak mana mano ma yudo ji duto.+ Kata kamano, Nyasaye en ja adiera, kendo ok obi weyo mondo otemu mokalo ma unyalo nanoe,+ to kaachiel gi temno obiro losonu yo mar wuok mondo ubed gi nyalo mar nano.+

14 Kuom mano, joherana, ringuru lamo mar sanamu.+ 15 Awuoyo kaka ng’at ma wuoyo gi jo ma nigi nyalo mar nono weche e yo matut; ng’aduru un uwegi ka be gima awacho en adier. 16 Donge okombe mar gueth ma waguedhogo miyo wan bende wayudo ber ma remb Kristo kelo?+ Donge makate ma wang’ingo miyo wan bende wayudo ber ma ringre Kristo kelo?+ 17 Nimar nitie makate achiel, to kata obedo ni wang’eny, wan ringruok achiel+ nikech waduto wachamo makate achielno.

18 Paruru ane Jo-Israel mag ringruok: Donge jo ma chamo misengni chamogi mana kaka kendo mar misango bende chamo?+ 19 Kare en ang’o ma atemo wacho? Uparo ni awacho ni misango ma otim ne sanamu en gimoro, kata ni sanamu en gimoro? 20 Ooyo; kata kamano gima awacho en ni misengni ma ogendni chiwo, gichiwogi ne jochiende, to ok ne Nyasaye;+ kendo ok daher ni un bende uchiem gi jochiende.+ 21 Ok unyal madho okombe mar Jehova* kod okombe mar jochiende; ok unyal chiemo e “mesa mar Jehova”*+ kendo e mesa mar jochiende. 22 Koso ‘wadwaro miyo Jehova* obed gi nyiego’?+ Waonge gi teko moloye, koso?

23 Oyienwa timo gimoro amora, to ok ni gik moko duto konyo. Oyienwa timo gik moko duto, to ok ni gik moko duto gero ng’ato.+ 24 Kik ng’ato odwar mana gik ma kelone ber owuon, to odwar ma kelo ber ne ng’at machielo.+

25 Chamuru ring’o duto miuso e chiro ma ok ubedo gi chich moro amora e chunyu, 26 nikech “Jehova* e wuon piny kod gik moko duto manie iye.”+ 27 Ka ng’at ma ok ni e yie ogwelou to duher dhi, chamuru gimoro amora moketo e nyimu ma ok ubed gi chich moro amora e chunyu. 28 To ka ng’ato owachonu ni, “Ma en gima osechiwgo misango,” kik uchame nikech ng’atno osewachonu kamano, kata nikech un gi chich moro amora e chunyu.+ 29 Ok awuo kuom chunyu uwegi, to mar ng’at machielo. Nikech ang’o ma dimi chuny mar ng’at machielo omona timo gima an gi thuolo mar timo?+ 30 Ka achamo gimoro ka agoyo erokamano ne Nyasaye, ang’o ma dimi ng’ato owuo kuoma marach kuom gima asegoyoe erokamano?+

31 Kuom mano, bed ni uchiemo, kata umetho, kata utimo gimoro amora, timuru gik moko duto ne duong’ mar Nyasaye.+ 32 Kik ubed jo ma kelo chwanyruok ne Jo-Yahudi gi Jo-Grik kod kanyakla mar Nyasaye,+ 33 mana kaka atemo timo gik ma moro ji duto e weche duto, ma ok amanyo mana gik ma kelona ber,+ to mago ma dikony ji mang’eny, di po ka oresgi.+