Isaya
39 E ndalogo ruodh Babulon miluongo ni Merodak-baladan wuod Baladan, ne ooro barupe kod mich ne Hezekia,+ nimar ne owinjo ni yande otuo to koro osechango.+ 2 Hezekia ne orwako jootego gi mor, kendo nonyisogi mwandune ma ne nie ode mar keno,+ kaka fedha, dhahabu, mor balsam, gi modhi mamoko ma nengogi tek, kod gige duto mag lweny. Onge gima Hezekia ne ok onyisogi e ode kata e pinye.
3 Bang’ mano, janabi Isaya nodhi ir Ruoth Hezekia mopenje niya: “Jogi oa kanye, kendo en wach mane ma nokelogi kae?” Hezekia nodwoke niya: “Gia Babulon, piny man mabor ahinya.”+ 4 Isaya ne openje niya: “To ang’o ma ne gineno e odi?” Hezekia nodwoke niya: “Ne gineno gik moko duto manie oda. Onge gimoro amora e oda mar keno ma ne ok anyisogi.”
5 Eka Isaya ne owacho ne Hezekia niya: “Ma e gima Jehova Nyasach oganda lweny owacho, 6 ‘Winji! Ndalo biro ma gik moko duto manie odi, kendo ma kwereni ne okano nyaka chil kawuono ibiro ter Babulon. Onge gima ibiro we,’+ Jehova owacho.+ 7 ‘Kendo moko kuom yawuoti ibiro ter Babulon kendo gibiro bedo jotelo e od ruodh pinyno.’”+
8 To Hezekia ne odwoko Isaya niya: “Wach Jehova ma isenyisano ber.” Kae to nomedo niya: “Nikech kuwe biro betie e ndalona duto.”+