Isaya
36 E higa mar 14 mar loch Hezekia, Senakerib ruodh Asuria+ nomonjo mier duto ma ne ochiel motegno e Juda, mokawogi.+ 2 Eka ne ooro Rabshake*+ kod oganda lweny mang’ongo ka en Lakish+ mondo odhi Jerusalem ir Ruoth Hezekia. Ka ne gichopo kuno, ne gichung’ but freji ma golo pi e yawo ma malo+ man e yo mochomo puoth jalwok lewni.+ 3 Kendo Eliakim+ wuod Hilkia ma nochung’ ne od ruoth, gi Shebna+ jagoro, kaachiel gi Joa wuod Asaf jandiko, nodhi ire.
4 Eka Rabshake ne owachonegi niya: “Dhiuru unyis Hezekia ni ruoth maduong’ ma ruodh Asuria wacho niya, ‘Ere gima omiyo in gi chir ma kama?+ 5 Isewacho ni, “An gi rieko kod teko mar kedo e lweny,” kata kamano, mago gin weche manono. En ng’ano migeno momiyo sani itemo piem koda?+ 6 Winji! Ang’eyo ni iseketo genoni kuom Misri, to ng’e ni Misrino chal mana gi odundu motur ma ka ng’ato osiroree to ochuoyo lwete. Mano e gima Farao ruodh Misri timo ne ji duto mogeno kuome.+ 7 To ka iwachona niya: “Wan wageno Jehova Nyasachwa,” donge en e Nyasaye ma Hezekia nomuko kuonde moting’ore ma nogerne kaachiel gi kendo mag misangone?+ Donge Hezekia e ma nonyiso Juda gi Jerusalem ni nyaka gilem mana e nyim kendo mar misangoni, koso?’+ 8 Koro akwayi, tim singruogni gi ruodha ma en ruodh Asuria:+ abiro miyi farese 2,000 ka po ni inyalo yudo jo ma nyalo idhogi. 9 Ka igeno ni Jo-Misri e ma biro konyi gi farese kod joidh farese, be iparo ni inyalo loyo kata mana achiel kuom jotend ruodha matinie mogik? 10 Koso iparo ni abiro monjou amonja ka Jehova ok e ma oora? Jehova owuon e ma nonyisa ni abi aked gi pinyni kendo akethe chuth.”
11 Eka Eliakim, gi Shebna,+ kod Joa ne owacho ne Rabshake+ niya: “Wasayi, yie iwuo kodwa gi dho Aram,*+ nimar wawinjo dhokno; to kik iwuo kodwa gi dho Jo-Yahudi mochung’ e wi ohingagi.”+ 12 To Rabshake ne openjo niya: “Uparo ni un kod ruodhu kende e ma ruodha ne oora mondo awachnu wechegi? Donge ne oora bende ir jo manie wi ohingagi, ma biro chamo chiedhgi kendo madho lachgi giwegi mana kaka un bende ubiro timo?”
13 Bang’ mano, Rabshake ne ochung’ mi okok gi dwol maduong’ kowacho e dho Jo-Yahudi+ niya: “Winjuru gima ruoth maduong’, ma ruodh Asuria osewacho.+ 14 Ma e gima ruoth owacho, ‘Kik uwe mondo Hezekia owuondu, nimar ok onyal resou.+ 15 Kendo kik uyie Hezekia omi ugen Jehova+ kowachonu niya: “Jehova biro resowa, kendo dalani ok nopodh e lwet ruodh Asuria.” 16 Kik uwinj weche Hezekia, nimar ma e gima ruodh Asuria owacho: “Losuru kuwe koda kendo ubed e bwo lochna, mi ng’ato ka ng’ato kuomu biro chamo olemb mzabibune kod ng’ope owuon, kendo enomodh pi e yawone owuon, 17 nyaka chieng’ ma anabi, mi ateru e piny ma chalo gi pinyu,+ ee, e piny ma cham kod divai chiekie maber, kendo piny mopong’ gi makate kod puothe mzabibu. 18 Kik uyie mondo Hezekia owuondu ni Jehova biro resou. Be nitie nyasaye moro amora mosereso joge e lwet ruodh Asuria?+ 19 Nyiseche mag Hamath gi Arpad ni kanye?+ Bende, ere nyiseche mag Sefarvaim?+ Be gisereso Samaria e lweta?+ 20 Kuom nyisechego duto, ere mosereso joge e lweta? Koro, ang’o momiyo uparo ni Jehova biro reso Jerusalem?”’”+
21 Ne giling’ thi, onge ng’at ma ne odwoke kata wach achiel nikech ruoth Hezekia nosechikogi ni kik gidwoke.+ 22 Eka Eliakim wuod Hilkia ma nochung’ ne od ruoth, gi Shebna+ jagoro, kaachiel gi Joa wuod Asaf jandiko nodok ir Hezekia ka giyiecho lepgi, mi ne ginyise weche duto ma Rabshake nowachonegi.