Jeremia
49 Ma e gima Jehova owacho e wi Jo-Amon:+
“Iparo ni Israel onge gi yawuoyi?
Iparo ni oonge gi ng’at ma biro chamo mwandune?
To ang’o momiyo Malkam+ osekawo piny Gad?+
Kendo ang’o momiyo joge odak e mier mag Israel?”
2 “‘Omiyo, winjuru! ndalo biro,’ Jehova owacho,
‘Ndalo ma abiro miyo koko mar jo ma dhi kedo gi Raba+ man e piny Jo-Amon+ owinjre.
Obiro dong’ gunda,
Kendo ibiro wang’ mier matindo molwore.’
‘Bang’e, Israel biro kawo pinygi e lwet jo ma nomayogi,’+ Jehova owacho.
3 Yaye Heshbon, go nduru, nimar oseketh Ai!
Ywaguru matek, yaye un mier matindo molworo Raba.
Rwakuru ogunia.
Denguru kuwuotho koni gi koni e kund rombe,*
Nimar ibiro ter Malkam e tuech,
Kaachiel gi jodolone gi jotende.+
4 Yaye in nyako ma ja andhoga, mogeno mwandune,
Ang’o momiyo isungori gi hohni magi,
Gi peweni momewo
Kiwacho e chunyi niya: “En ng’ano ma dimonja?”’”
5 “‘Abiro kelonu masira malich,’ Jehova Wuon Loch Duto, Nyasach oganda lweny owacho,
‘Ma noa kuom jo mokiewo kodi.
Ibiro keyi kuonde duto,
Kendo onge ng’at ma biro choko jogi ma ringo.’”
6 “‘To bang’e, abiro choko Jo-Amon moter e tuech,’ Jehova owacho.”
7 Ma e gima Jehova Nyasach oganda lweny wacho e wi Edom:
“Dibed ni tinde rieko orumo e Teman?+
Rieko mag jong’adne rieko oselal, koso?
Dibed ni riekogi koro osetow?
8 Ringuru, baruru!
Yaye un Jo-Dedan, dhiuru udag e kuonde matut!+
Ka kinde ma akumoe Esau ochopo
Abiro kelone masira.
9 Ka jopon mzabibu e ma obiro iri,
Donge gibiro weyo mzabibu moko minyalo pon?
Ka jokuoge obiro iri gotieno,
Donge gibiro kawo mana gik ma gidwaro?+
10 Abiro lonyo Esau mi odong’ duk.
Abiro elo kuonde ma opondoe,
Mondo kik oyud ka ma dopondie.
11 Wena nyithindi ma kiye,
To abiro ritogi,
Kendo mond lieteu biro geno kuoma.”
12 Nimar ma e gima Jehova owacho: “Neuru! Ka jo ma ne ok owinjore omadh okombe mar mirimba e ma ne omadhe, be uparo ni ibiro weu ma ok okumu? Nyaka kumu. Nikech nyaka umadh okombe mar mirimba.”+
13 Jehova owacho ni, “An awuon asekuong’ora ni analok Bozra mi nodong’ ka gunda malich,+ mocha, mijaro, kendo mikuong’o; miechene duto biro dong’ kokethore chuth.”+
14 Asewinjo wach moa kuom Jehova,
Oseor jaote ir ogendni niya:
“Chokreuru mondo wadhi waked kode;
Ikreuru ne lweny.”+
15 “Ne! Asemiyo ibedo matin moloyo ogendni mamoko,
In ng’at ma ji ochayo.+
16 Ne imiyo ji oluori, kendo mano osewuondi,
Ne in gi sunga e chunyi,
Yaye in midak e i lwendni,
Idak e got mabor moloyo mamoko.
Kata obedo ni igero odi malo kaka otenga,
Pod abiro goli kuno mi akeli piny,” Jehova owacho.
17 “Masira malich+ biro mako Edom. Ng’ato ang’ata mokadho kanyo biro bwok kendo liyo koneno masira ma noyud dalano. 18 Mana kaka notimore ne Sodom gi Gomora kod mier ma nokiewo kodgi,”+ Jehova owacho, “e kaka biro timore ne piny Edom. Kendo onge ng’at ma nodag kata bworo e pinyno.+
19 “Neuru! Ng’at moro nomonj lege morit maber, mana ka sibuor+ moa e bunge man bath Jordan, to anami oring ka oa e pinygi. Anaket ng’at ma ayiero mondo orit pinyno. Ere ng’at machal koda, kata ma nyalo piem koda? Ere jakwath ma nyalo chung’ e nyima?+ 20 Kuom mano, winjuru wach ma Jehova oseng’ado ne Edom kendo ne jo modak Teman:+
Adier, ibiro ywa nyirombe oko.
Gin giwegi e ma ginimi olok pinygi gunda.+
21 Piny biro yiengni sa ma gipodho.
Nitie koko maduong’!
Kokono winjore nyaka e Nam Makwar.+
Chieng’no, chuny thuondi mag Edom
Biro chalo gi chuny dhako ma muoch kayo.”
23 Wach e wi Damaski:+
Osekuod wi Hamath+ gi Arpad,
Gisewinjo wach marach.
Luoro maduong’ osemakogi.
Nam osetugore kendo ok nyal kueye.
24 Damaski oselalo chir.
Luoro maduong’ osemake, oselokore mondo oringi.
Chandruok gi rem osase ahinya,
Mana ka dhako ma muoch kayo.
25 Ere kaka pok ojwang’ dala ma nigi huma,
Taon mopong’ gi mor?
26 Yawuote biro podho e laru mage,
Kendo chieng’no jolwenje duto biro tho,” Jehova owacho.
27 “Abiro wang’o ohinga mar Damaski,
Kendo majno biro wang’o ohinga motegno mag Ben-hadad.”+
28 Ma e wach ma Jehova nowacho e wi Kedar,+ kod pinjeruodhi mag Hazor ma Nebukadnezar* ruodh Babulon noloyo:
“A malo, dhi nyaka Kedar,
Kendo ineg yawuot Ugwe.”
29 Ibiro kaw hembegi, kwedhegi,
Lep hembegi, kod mwandugi duto.
Ibiro kaw ngamia maggi,
Kendo gibiro kok matek ka ginyisogi ni, ‘Masira olworou koni gi koni.’”
30 “Ringuru, dhiuru mabor!
Yaye un Jo-Hazor, dhiuru udag e kuonde matut,” Jehova owacho.
“Nimar Nebukadnezar* ruodh Babulon osechano kaka obiro monjou,
Osechano kaka obiro tiekou.”
31 “A malo, dhi imonj oganda modak gi kuwe,
Ma nigi arita maber!” Jehova owacho.
“Oonge gi dhoudi kata rageng’; gidak kar kendgi.
32 Ibiro yak ngamia maggi,
Kendo jambgi mang’enygo ibiro pe.
Abiro keyogi kuonde duto,
Jogo ma tito bath yie wigi,+
Anakelnegi masira moa koni gi koni,” Jehova owacho.
33 “Hazor nobed kar dak mar bwe,
Gunda ma nyaka chieng’.
Onge ng’at ma nodag kanyo,
Kendo ma nobwor e pinyno.”
34 Ma e wach Jehova ma nobiro ne janabi Jeremia e wi Elam,+ ka ne Zedekia+ ochako locho e piny Juda: 35 “Ma e gima Jehova Nyasach oganda lweny owacho, ‘Abiro turo atung’ ma miyo Jo-Elam+ teko. 36 Anami yembe ang’wen moa e tunge polo okuthi kochomo Elam, kendo anakegi kuonde ma yamogo oaye. Onge piny ma Jo-Elam ok noringie.’”
37 “Abiro miyo Jo-Elam obed maluor e nyim wasikgi, kendo e nyim jo ma dwaro negogi; abiro kelonegi masira, ee, mana mirimba mager,” Jehova owacho. “Kendo liganglana biro lawogi nyaka chieng’ atiekgi pep.”
38 “Anagur kom-lochna e Elam,+ kendo abiro nego ruoth kod jotende duto,” Jehova owacho.
39 “Kata kamano, e ndalo mag giko abiro choko Jo-Elam moter e tuech,” Jehova owacho.