Barua mar Ariyo ne Jo-Thesalonika
3 Mogik, owetewa, dhiuru nyime lamonwa+ mondo wach Jehova* omed landore mapiyo+ kendo yudo duong’ mana kaka adier timore kuomu, 2 kendo mondo oreswa waa e lwet jo maricho+ kod jo ma timbegi mono, nikech yie ok en mar ji duto.+ 3 Kata kamano, Ruoth en ng’at migeno, kendo obiro tegou koritou kuom ng’at marach. 4 E wi mano, wan gadier kodu kuom Ruoth ni sani utimo weche duto ma wasechikou kendo ubiro dhi nyime timo kamano. 5 Ruoth mondo odhi nyime tayo chunyu e yo maber mondo uher Nyasaye+ kendo ubed gi chuny mar nano+ nikech Kristo.
6 Koro owetewa, wachikou e nying Ruodhwa Yesu Kristo ni uweru gi owadwa moro amora ma wuotho e yo ma ok owinjore,+ kendo ma ok luw puonj ma ne uyudo* koa kuomwa.+ 7 Nimar un uwegi ung’eyo ni onego uluw timwa+ nikech ne ok wawuotho e yo ma ok owinjore ka ne wan kodu, 8 bende, ne ok wachamo chiemb ng’ato ma ok wachulo.+ Kar mano, ne wajotiyo matek ka wachandore odiechieng’ gi otieno mondo kik waket ting’ mapek ne ng’ato kuomu.+ 9 Ne watimo kamano, ok nikech ne waonge gi ratiro mar yudo kony moa kuomu,+ to ne wachiwore mondo waketnu ranyisi munyalo luwo.+ 10 Kuom adier, ka ne wan kodu, ne wajochikou niya: “Ka ng’ato ok dwar tiyo, ng’atno ok onego ochiem.”+ 11 Nimar wasewinjo ni jomoko kuomu wuotho e yo ma ok owinjore,+ ni ok giti tich moro amora kata matin, to gidonjore e weche jomoko.+ 12 Wachiko kendo wasayo jo ma kamago kuom Ruoth Yesu Kristo ni mondo gitim tijegi mos, kendo gicham chiemo ma gin giwegi gitiyone.+
13 To un owetewa, kik uol gi timo gik mabeyo. 14 To ka nitie ng’at ma ok luw weche ma wasechikou e baruani, tang’uru ahinya gi ng’at ma kamano kendo uwe riworu kode+ mondo oyud wich-kuot. 15 Kata kamano, kik ukwane kaka jasigu to udhi nyime rieye+ kaka owadwa.
16 Koro, kinde duto Ruodh kuwe mondo omi ubed gi kuwe e yore duto.+ Ruoth mondo obed kodu uduto.
17 An Paulo, kendo ma e mos mara ma andikonu gi lweta awuon,+ ma en ranyisi e barupena duto; mano e yo ma ajandikogo.
18 Ng’wono mogundho mar Ruodhwa Yesu Kristo mondo obed kodu uduto.