Ayub
11 Zofar+ Ja-Naamath nodwoko kama:
2 “Be ng’ato diling’ ma ok odwoko weche duto misewachogo,
Koso wuoyo mang’eny dimi ng’ato obed ng’at makare?
3 Be iparo ni wecheni manonogo nyalo mono ji wuoyo?
Koso iparo ni wecheni mag ajara dimon ji kweri?+
5 Mad a Nyasaye yawie dhoge
Mondo owuo kodi!
6 Dofwenyoni weche mopondo ma nyalo miyo ibed gi rieko,
Nimar rieko konyo e yore mang’eny.
Ibiro fwenyo ni kare Nyasaye ok kwanni richoni duto.
7 Be inyalo fwenyo rieko matut ma Nyasaye nigo
Kata ng’eyo gik moko te e wi Ng’at Manyalo Duto?
8 Riekone ni malo moyombo polo. Be dichopie?
Riekone tut moloyo Liel.* In to ing’eyo ang’o?
9 Rieko Nyasaye lach moloyo piny
Kendo olach moloyo nam.
10 Po nono Nyasaye okalo momako ng’ato mondo odhi oyale,
Be nitie ng’at ma ditame?
11 Ong’eyo sa ma ng’ato riambo.
Omiyo, koneno gima rach, donge obiro kawo okang’?
12 Kata kamano, weche nyalo donjo ne ng’at mofuwo
Mana ka po ni punda me thim nyalo nyuolo dhano.
13 Mad iikie chunyi
Kendo iting’ ne Nyasaye lweteni.
14 Ka lweti timo tim mamono, we timno,
Kendo kik tim ma ok kare bed e hembi.
15 Mondo iting’ wiyi kionge gi wich-kuot;
Kendo ichung’ motegno ka in gi chir.
16 Eka wiyi nowil gi chandruogeni;
Kendo gibiro chaloni mana ka pi ohula mosekadho.
17 Ngimani norieny mana ka ler mar chuny odiechieng’;
Kata mana mudho manie ngimani nobed ka ler mokinyi.
18 Ibiro bedo gi chir nikech geno nitie,
Kendo ibiro ng’iyo koni gi koni to iniyue gi kuwe ma onge chandruok.
19 Ibiro nindo ma onge ng’at ma bwogi,
Kendo ji mang’eny nobi iri mondo ikonygi.
20 To wang’ jo maricho nodinre;
Kendo onge ka ma giniringie,
Nikech tho kende e ma biro dong’ koritogi.”+