Isaya
2 Ooro jootene gie yor nam,
Ging’ado pige gi yiedhi molos gi togo:
“Dhiuru un joote ma jong’wech,
E oganda ma joge roboche kendo dendgi poth,
Oganda ma ji oluoro kuonde duto,+
Oganda ma roteke kendo ma loyo ogendni mamoko,
Oganda ma aoche oywero pinye.”
3 Un jopiny, kendo un jo modak e iye,
Ubiro neno gima chalo gi bendera mong’aw malo e wi gode,
Kendo ubiro winjo dwol ma chalo gi mar tung’.
4 Nimar, ma e gima Jehova osewachona:
“Abiro bet ka akuwe mos ka arango kar dakna,*
Kaka piny mokuwe mos sa ma chieng’ rieny kogolo liet mager,
Kendo kaka tho moko e lum ndalo keyo ka piny liet.
5 Nimar ka pok keyo ochakore,
Kinde ma mzabibu osemoyo, kendo olembgi chiegni chiek,
Ibiro ng’ad bede mzabibu gi pelni mag keyo
Kendo bedegi molak ibiro ng’ad mi gol oko.
6 Ibiro wegi ne winy modak e gode ma chamo ring’o
Kaachiel gi le modak e piny.
Winyogo biro chamogi ndalo oro,
To lego biro chamogi ndalo keyo.
7 E kindego ibiro kel ne Jehova Nyasach oganda lweny mich,
Moa kuom oganda ma joge roboche kendo ma dendgi poth,
Oganda ma ji oluoro kuonde duto,
Oganda ma roteke kendo ma loyo ogendni mamoko,
Oganda ma aoche oywero pinye,
Gibiro terogi ka ma iluongo gi nying Jehova Nyasach oganda lweny, Got Sayun.”+