Isaya
8 Jehova nowachona kama: “Kaw bao moro malach+ gi kalam mondo indik e wi baono ni ‘Maher-shalal-hash-baz.’* 2 Kendo Uria+ jadolo kod Zekaria wuod Jeberekia e ma mondo obedna joneno* nikech gin jo mogen.”
3 Ne anindo gi chiega ma ne en janabi, mi nomako ich monyuolo nyathi ma wuoyi.+ Eka Jehova nowachona niya: “Chak nyathino ni Maher-shalal-hash-baz, 4 nimar ka pok ong’eyo wacho ni ‘Baba!’ kata ‘Mama!’ to ruodh Asuria nomonj Damaski kod Samaria mi noyak mwandugi duto.”+
5 Jehova ne owachona kendo niya:
6 “Nikech ogandani osedagi modho pi mamol mos koa Shiloa*+
Kendo gimor gi Rezin kod wuod Remalia,+
7 Jehova biro kelonegi
Pi Aora* mang’eny ma ringo matek,
Ruodh Asuria+ gi duong’ne duto.
Obiro pong’o aochene matindo duto,
Mi omwom gengene duto
8 Kendo enoywe Juda.
9 Un ogendni, dhiuru uhinygi, to ng’euru ni ibiro ng’inju matindo tindo.
Winjuru un jo moa kuonde maboyo mag piny!
Ikreuru aika ne lweny, to ng’euru ni ibiro ng’inju!+
Ikreuru aika ne lweny, to ng’euru ni ibiro ng’inju!
10 Chanuru gima udwaro timo, to ung’e ni chenrono biro kethore!
11 Lwet Jehova ma nigi teko ne ni kuoma ka ne osiema ni kik aluw timbe ogandani. Nowachona niya:
12 “Gima ogandani luongo ni ndhogruok,* in kik iluong ni ndhogruok!
Kik iluor gima giluoro;
Gino kik bwogi.
13 Jehova Nyasach oganda lweny, en e monego ikwane ka Jal maler,+
En kende e ma onego iluore,
Kendo en kende e ma onego obwogi.”+
14 Obiro bedo kaka ka maler,
Kaka kidi ma ji chwanyoree,
Kaka lwanda ma chwanyo ji+
Dhoudi ariyo mag Israel,
Kaka obadho kendo otegu
Ne jo ma odak e Jerusalem.
15 Ng’enygi biro chwanyore mi gipodh kendo ginitur;
Obadhono biro makogi.
16 Dol buk mondikie wechegi;
Tue matek chik ma amiyo jopuonjrena!
17 Abiro rito Jehova+ ma osepando wang’e ne jood Jakobo.+ En e ma abiro gene.
18 Neuru! An kaachiel gi nyithindo ma Jehova osemiya,+ wan ranyisi+ kendo honni ma Jehova Nyasach oganda lweny modak e Got Sayun oseoro e piny Israel.
19 Kendo ka giwachonu niya: “Penjuru wach kuom ajuoke kod jokor wach ma jajni kendo ma dhum,” donge Nyasachgi e mowinjore gipenj wach? To be owinjore jo mangima openj wach kuom jo motho?+ 20 Ooyo. Kar mano, onego gipenj wach e wi chik kod gik mosendiki!
Ka ok giwacho gik mowinjore gi wachni, to ok ginine ler mokinyi.+ 21 Ng’ato ka ng’ato biro kadho e piny ka othagore kendo kodenyo,+ kamano iye biro wang’ mi oting’ wang’e malo mondo okuong’ ruodhe kod Nyasache. 22 Kae to kong’iyo piny obiro mana neno chandruok gi mudho, lit kod kuyo kaachiel gi mudho mandiwa.