Mar Ariyo ne Jo-Korintho
10 Koro an Paulo, asayou gi muolo kod ng’wono mar Kristo,+ kata obedo ni jomoko kuomu wacho ni amuol sa ma an kodu wang’ gi wang’,+ to sa ma aonge e kindu abedo mager.+ 2 Asayo ni ka antiere kodu, kik abed gi chir ma nyalo miyo akaw okang’ mager ne jo ma nenowa kaka jo ma wuotho kaluwore gi ringruok. 3 Nikech kata obedo ni wawuotho e ringruok, ok waked e lweny kaluwore gi kaka wan e ringruok. 4 Nimar giwa mag lweny ok gin mag ringruok,+ to gin ma nigi teko Nyasaye+ kendo watiyo kodgi e muko gik mogurore motegno. 5 Wamuko paro ma ji nigo kod gik moko duto ma kedo gi ng’eyo mar Nyasaye;+ kendo waketo paro duto e tuech ka wamiyo giluwo kaka Kristo chiko; 6 bende, waikore kumo ji duto motamore luwo kaka ichikogi,+ bang’ ka usenyiso ni un uluwo kaka ichikou.
7 Ung’iyo gik moko kaluwore gi kaka ginenore gi oko. Ka ng’ato nigi adier chuth kuome owuon ni en mar Kristo, opar matut kendo kuom wachni: Ni mana kaka en mar Kristo, e kaka wan bende. 8 Nimar kata ka dapakra ahinya nikech teko mar telo ma Ruoth nomiyowa mar gerou to ok mukou,+ ok abi neno wich-kuot. 9 Nikech ok adwar ni onere ka gima atemo buogou gi barupena. 10 Nimar giwacho kama: “Barupene pek kendo nigi teko ahinya, to en owuon ka entiere, oyom yom kendo wechene ji ochayo.” 11 Ng’at ma kamano mondo ong’e ni gik ma wawacho e barupewa ka waonge, gigo e ma wabiro timo sa ma wantiere.+ 12 Nimar ok waketre e rang’iny mar jomoko kata pimore gi jomoko ma ting’ore malo gin giwegi.+ To sa ma gipimore kendo piem kaluwore gi pachgi giwegi, gibedo jo ma onge rieko mar ng’eyo tiend weche.+
13 Kata kamano, wan ok wabi pakore mokalo ka ma tong’ moseketnwa gikie, to mana ei tong’ mar ka ma Nyasaye osepimonwa moriwo nyaka un bende.+ 14 Kuom adier, ka ne wachopo iru ne ok wakalo tong’ moket, nimar wan e jo ma ne okwongo chopo iru gi wach maber e wi Kristo.+ 15 Ooyo, ok wapakre e wi tich ma ng’at machielo osechandorego ka wakalo tong’ moseketnwa, kar mano, wageno ni kaka yieu siko ka dongo, ubiro neno kaka tich ma wasetimo ei tong’ moketnwa medore. Eka wan bende wabiro timo momedore, 16 mondo waland wach maber e pinje mamoko man mabor kodu, mondo kik wapakre kuom tich mosetim ei tong’ mar ng’at machielo. 17 “To ng’at ma pakore, opakre kuom Jehova.”*+ 18 Nimar ng’at ma ketore owuon ok e ma iyiego,+ to mana ng’at ma Jehova* oketo.+