Mar Ariyo ne Jo-Korintho
2 Nimar aseng’ado mondo kik aduog iru ka an gi kuyo. 2 Nikech ka amiyo ubedo gi kuyo, gin jomage ma biro miyo abed moil mak mana un ma asekelonu kuyo? 3 Omiyo, ne andikonu wechego mondo sa ma abiro, kik ukelna kuyo nikech un e monego umi abed gi mor, nimar an gadier ni gik ma kelona ilo e ma bende kelonu ilo uduto. 4 Nimar ne andikonu ka pi wang’a chuer ahinya kendo ka akalo e masiche kod lit mang’eny e chunya, ok ni mondo akelnu kuyo,+ to mondo ung’e kaka hera ma aherougo tut.
5 Koro ka ng’ato osekelo kuyo,+ ok osekelo kuyo ne an, to ne un duto e okang’ moro. Kata kamano, ok daher tiyo gi weche mager ahinya kuom wachni. 6 Kum ma osemi ng’atno gi ji mathoth koro oserome; 7 koro onego uwene kethone e yo mang’won kendo uhoye,+ mondo kik kuyo mokadho oloye.+ 8 Kuom mano, asayou ni mondo unyise herau.+ 9 Nikech mano bende e momiyo ne andikonu: mondo ang’e ka be unyalo nyiso ni uikoru luwo weche duto michikou. 10 Kuweyo ne ng’ato ketho kuom wach moro amora, an bende atimo kamano. Kuom adier, ka aseweyo ne ng’ato ketho moro amora (ka po ni aseweyo ne ng’ato e gimoro amora) atimo kamano kuom Kristo nikech un, 11 mondo Satan+ kik wuondwa, nikech waseng’eyo riekni motiyogo.+
12 Koro ka nachopo Troa+ mondo aland wach maber e wi Kristo, kendo ka noyawna dhoot e tij Ruoth, 13 ne aonge gi kuwe e chunya nikech ne ok ayudo Tito+ owadwa. Omiyo, ne agoyonegi oriti kae to ne awuok mondo adhi Makedonia.+
14 To agoyo ne Nyasaye erokamano ma kinde duto tayowa kanyachiel gi Kristo ka wan kaka oganda ma wuotho gi mor ka jo ma olocho, kendo omiyo suya mang’ue mamit mar ng’eyo mare landore kuonde duto kokalo kuomwa! 15 Nikech e wang’ Nyasaye, wan tik mang’ue mamit mar Kristo ne jo ma ireso kod jo mochomo kethruok; 16 kuom jo mochomo kethruok,+ wan tik mar tho ma tero ji e tho, to kuom jo ma ireso wan tik mang’ue mamit mar ngima ma tero ji e ngima. To ng’a gini mowinjore chuth gi tijni? 17 En wan, nikech ok walok ohala gi wach Nyasaye+ kaka ji mang’eny timo, to wayalo gi chuny matir chutho e winjruok achiel gi Kristo, kaka jo ma Nyasaye ooro kendo watimo kamano e wang’ Nyasaye.