Isaya
64 Mad ibar polo kendo ilor piny,
Mondo gode oyiengni nikech in,
2 Mana kaka mach wang’o oswekle,
Kendo majno yienyo pi e kendo;
E kaka wasiki biro ng’eyo nyingi,
Kendo ogendni biro kirni e nyimi!
4 Nimar chakre chon onge ng’at mosewinjo
Kata moseneno Nyasaye moro amora mak mana in,
Nyasaye ma rito jo mogeno kuome,+
5 Isebiro mondo ikony jo ma timo gik makare gi mor,+
Jogo ma pari kendo ma luwo yoreni.
Ne! Mirima nomaki, to wan pod ne watimo mana richo,+
Ne watimo kamano kuom kinde malach.
Be koro diwarwa adier?
6 Waduto wasebedo ka ng’at ma ok ler,
Kendo timbewa duto makare chalo mana gi otamba ma dhako osedhigo e dwe.+
Waduto wabiro ner ka oboke,
Kendo richowa biro kwadhowa mana ka yamo.
7 Onge ng’ato ang’ata ma luongo nyingi,
Onge ng’at ma oseikore padore kuomi,
Nimar isepandonwa wang’i,+
Kendo isemiyo walal nono nikech richowa.
8 To koro A Jehova, in e Wuonwa.+
Wan e lop agulu, to in e Jachue-Agulni;+
Kendo waduto wan tich lweti.
9 A Jehova, kik ibed gi mirima mager kodwa,+
Kendo kik ipar richowa nyaka chieng’.
Rangwa, wasayi, nimar wan jogi.
10 Mier magi maler oselokore thim.
Sayun koro chalo mana gi thim,
To Jerusalem osedong’ gunda.+
11 Odwa ma ne ler kendo ma ne nigi duong’,
Ka ma kwerewa ne pakie,
Osewang’ gi mach,+
Kendo giwa duto ma ne wageno osekethore.
12 A Jehova, be ibiro pandonwa apanda wang’i nyaka chieng’?
Be ibiro mana ling’ kendo weyowa mondo wasandre malit kamano?+