Jeremia
13 Ma e gima Jehova nowachona: “Dhi ing’iew msip mar kitani, kendo itueye e nungoni, to kik inyume e pi.” 2 Omiyo, ne ang’iewo msip mana kaka Jehova nosechika, mi atueye e nungona. 3 Eka Jehova ne owuoyo koda kendo: 4 “A malo idhi nyaka Yufrate, mondo ipand msip ma ne ing’iewo mitueyo e nungonino. Ibiro pande e bur manie lwanda.” 5 Kuom mano, ne adhi mi apande but Yufrate mana kaka Jehova nosechika.
6 To bang’ ndalo mogwaro, Jehova nowachona niya: “A malo idog Yufrate mondo ikaw msip ma ne achiki ni ipand kuno.” 7 Omiyo, ne adhi nyaka Yufrate mi akunyo ka ma ne apandoe msibno, ne ayudo ka koro nosekethore kendo ne oonge tich.
8 Eka wach Jehova nobirona niya: 9 “Ma e gima Jehova owacho, ‘Kamano e kaka abiro ketho sunga mar Juda, kaachiel gi sunga marach mar Jerusalem.+ 10 Oganda marach ma odagi winjo wechenani,+ kendo ma luwo chunygi+ mopong’ gi richo, kod nyiseche mamoko ma gilamo kendo tiyonegi, biro chalo mana gi msip mosekethore ma onge tichni.’ 11 ‘Nimar mana kaka msip makoga nungo ng’ato matek, e kaka ne adwaro ni Jo-Israel kod Jo-Juda omaka matek, mondo gibedna oganda,+ nying,+ pak, kendo gimoro ma jaber. To ne gidagi winja,’+ Jehova owacho.
12 “Kendo onego inyisgi wachni, ‘Ma e gima Jehova Nyasach Israel owacho: “Onego opong’ agulni duto madongo gi divai.”’ To gibiro dwoki ni, ‘Donge wang’eyo ni onego opong’ agulni madongo gi divai, koso?’ 13 Eka iniwachnegi ni, ‘Ma e gima Jehova wacho: “Abiro miyo jopinyni duto obed momer,+ chakre gi ruodhi mobedo e kom-loch Daudi, jodolo kod jonabi, kaachiel gi ji duto modak e Jerusalem. 14 Abiro dhirogi mondo gituomre giwegi, wuone gi yawuotgi,” Jehova owacho.+ “Ok anakechgi, kata weyonegi, kata ng’wononegi; onge gima biro geng’a tiekogi.”’+
15 Winjuru, kendo chikuru itu.
Kik ubed josunga, nimar Jehova osewuoyo.
16 Miuru Jehova Nyasachu duong’
Ka pok okelo mudho
Kendo ka pok uchwanyo tiendeu e gode sa ma piny yuso.
17 To kutamoru winjo,
Abiro ywak ka mopondo nikech sungau.
18 Wach ne ruoth kod min ruoth,+ ‘Beduru piny,
Nimar osimbo magu mabeyo biro lwar piny.’
19 Oselor* mier man yo milambo, kendo onge ng’at ma diyawnegi.
Jo-Juda duto oseter e tuech, ee, osetergi giduto e tuech.+
20 Ting’ wang’i malo mondo ine jo mabiro koa nyandwat.+
Ere kueth ma nomiyi, rombeni mabeyo?+
21 Ibiro wacho ang’o ka jo ma yande iparo ni osiepeni
E ma koro kumi?+
Donge muoch biro kayi mana kaka dhako ma nyuol?+
22 Kendo ka di po iwacho e chunyi ni, ‘Ang’o momiyo gigi timorena?’+
En nikech timni marach e mosemiyo olonyi duk+
Kendo e mosemiyo ogo ofunj tiendi.
23 Be Ja-Kush* nyalo loko pien dende, koso kwach dilok kit dende?+
Ka en kamano, to kara un bende unyalo timo gik mabeyo,
Un jo mosetieg timo richo.
24 E momiyo abiro keyogi kaka lum motwo ma yamo moa e thim keyo.+
25 Ma e gima biro timoreni, pok ma asepogoni,” Jehova owacho,
26 Omiyo, abiro ting’o lawi malo,
Kendo ji biro neno dugi.+
27 Gibiro neno timbeni mag terruok,+ gomboni moowore,
Kaachiel gi timbeni mag chode modwanyore.
Aseneno kaka isedwanyori+
E wi gode, kendo e pap.
Yaye Jerusalem, nobedni malit!
Inisik ka ok iler nyaka karang’o?”+