Samuel Mokwongo
1 Ne nitie Ja-Ramathaim-zofim+ ma nodak e piny gode mag Efraim.+ Nyinge ne en Elkana,+ wuod Jeroham, ma wuod Elihu, ma wuod Tohu wuod Zuf, ma Ja-Efraim. 2 Elkana ne nigi mon ariyo, achiel ne iluongo ni Hana to machielo ne iluongo ni Penina. Penina ne nigi nyithindo to Hana ne ongego. 3 Higa ka higa, Elkana ne dhiga Shilo mondo olem kendo ogol ne Jehova misengni.+ Yawuot Eli ariyo miluongo ni Hofni gi Finehas+ ne tiyo kuno kaka jodolo mag Jehova.+
4 Chieng’ moro ka Elkana ne osechiwo misango ne Nyasaye, ne omiyo Penina pok mare kendo ne omiyo yawuot Penina gi nyige pok maggi.+ 5 Hana to ne omiyo pok makende nikech Hana e ma nohero ahinya. Kata kamano, Jehova ne ok omiyo Hana nyithindo. 6 Nyieke ne siko chuoyo chunye gi wachno mondo owinj malit nikech Jehova ne ok omiye nyithindo. 7 Kamano e kaka Penina ne jatimo higa ka higa ka ne Hana dhi e od Jehova.+ Ne ochwoye gi wachno kendo mano ne miyo Hana ywak malit ma kata chiemo ok nochiem. 8 Elkana ne openje niya: “Hana, ang’o momiyo iywak, to ang’o momiyo ok ichiem, en ang’o momiyo ikuyo kama? Ok aloyoni yawuoyi apar koso?”
9 Bang’ ka ne gisechiemo ma gimetho ka gin Shilo, Hana ne owuok. Eli jadolo to ne obet e kom manie dho hekalu*+ mar Jehova. 10 Chuny Hana ne lit ahinya kendo ne olemo koywak malit ne Jehova.+ 11 Ne osingore niya: “A Jehova, Nyasach oganda lweny, ka nine chandruokna kendo ipara an jatichni, mi imiya nyathi ma wuoyi,+ to anachiwe obed mari ndalo duto mag ngimane, A Jehova, kendo ok noliel wiye nyaka chieng’.”+
12 Hana ne olemo aming’a e nyim Jehova, kendo e kindeno duto Eli ne ng’iyo dhoge. 13 Ne olemo gi chunye kendo dwonde ne ok winjre. Dhoge kende e ma ne diemore. Omiyo, Eli ne paro ni omer. 14 Eli nonyise niya: “Ibiro mer kama nyaka karang’o? We kong’o.” 15 Hana ne odwoke niya: “Ooyo ruodha, an mana dhako ma chunye chandore malit. Pok amadho kong’o kata gimoro amora ma mero, aolo mana chunya ne Jehova.+ 16 Kik ikaw jatichni ka dhako ma nono, nimar asebedo ka alemo nyaka sani nikech lit gi chandruok ma an-go.” 17 Eli ne odwoke kama: “Dhi gi kuwe, mad Nyasach Israel owinj lamoni kendo omiyi gima isekwaye.”+ 18 Eka Hana nonyise niya: “Mad jatichni oyud ng’wono e wang’i.” Kae to Hana nowuok kanyo modhi chiemo kendo wang’e ne nyiso ni koro ok okuyo.
19 Elkana gi joode ne omondo chiewo mi gidhi kulore e nyim Jehova. Bang’ mano, ne giwuok ma gidok dalagi Rama.+ Bang’e, Elkana nonindo gi Hana chiege kendo Jehova ne odwoko lamo mar Hana.*+ 20 Ka higa pok orumo,* Hana ne omako ich mi onyuolo nyathi ma wuoyi kendo ne oluonge+ ni Samuel,* nimar ne owacho niya, “ne akwayo Jehova mondo omiya wuoyini.”
21 Bang’e, Elkana ne owuok gi joode duto mondo odhi ochiw misango migolonega Jehova higa ka higa+ kendo mondo ogol chiwo mochopogo singruokne. 22 Kata kamano, Hana ne ok odhi kodgi+ nikech ne onyiso chwore niya: “Ka wuoyini oseweyo dhoth, abiro tere e nyim Jehova, kendo abiro miyego nikech onego odag kuno kuom ngimane duto.”+ 23 Elkana ne odwoke kama: “Tim atima gima ineno ni ber. Bed abeda e dala nyaka nyathini owe dhoth. Mad Jehova otimni kaka isewacho.” Omiyo, Hana ne obedo dala mi opidho nyathino nyaka ne oweyo dhoth.
24 Ka ne nyathino oseweyo dhoth, Hana ne otere e od Jehova man Shilo.+ Ne odhi gi nyaruath ma jahigni adek, mogo efa achiel,* gi divai njagi achiel maduong’.+ 25 Ne oyang’ nyaruath kae to oter wuoyino ne Eli. 26 Hana ne onyiso Eli niya: “Ruodha, an e dhako ma ne ochung’ kodi kae ka lamo Jehova.+ 27 Wuoyini e ma ne akwayo kendo Jehova ne owinjo lamona mi omiyago.+ 28 Koro sani akele mondo achiwe ne Jehova. E ngimane duto, obiro bedo mar Jehova.”
Kendo ne okulore* e nyim Jehova kanyo.