Samuel Mokwongo
24 Ka Saulo nosea kedo gi Jo-Filistia, ne onyise niya: “Daudi nie thim mar En-gedi.”+
2 Omiyo, Saulo ne okawo jolweny 3,000 ma noyiero e piny Israel duto mi gidhi manyo Daudi gi joge e lwendni maboyo ka ma diek mag gode odakie. 3 Ka ne Saulo ochopo e rogo moro ma ne ni but kund rombe mogeng’ gi kite, nodonjo e rogono mondo olosre, to Daudi gi joge ne obet ei rogono gi yo ka iye.+ 4 Jolwenj Daudi ne onyise kama: “Ma e odiechieng’ ma Jehova wachonie niya: ‘Kawuono aseketo jasiki e lweti+ kendo timne gimoro amora midwaro.’” Omiyo, Daudi nodhi mong’ado riak kandho mar Saulo mos ma ok owinjo. 5 Kata kamano, chuny Daudi nochande+ nikech nong’ado riak kandho mar Saulo. 6 Daudi nonyiso joge niya: “Ok anyal timo ne ruodha gima Jehova ok oyiego, ruoth ma Jehova e ma oyiero.* Ok anyal ting’o lweta mondo anege nimar Jehova e ma oyiere.”+ 7 Omiyo, Daudi notiyo gi wechego e kwero joge mondo kik gineg Saulo. Saulo to nochung’ mi owuok e rogono kendo ne odhi nyime gi wuodhe.
8 Eka Daudi nowuok e rogono mi oluongo Saulo matek niya: “Ruodha!”+ Ka ne Saulo ong’iyo chien, Daudi nogo chonge piny mi okulorene. 9 Daudi nonyiso Saulo niya: “Ang’o momiyo ichiko iti ne jo ma wuondi ka nyisi ni adwaro negi?+ 10 Kawuono iseneno gi wang’i kaka Jehova oketi e lweta e rogoni. Kendo ka ne ng’ato onyisa ni anegi,+ ne anenoni lit mi anyise ni, ‘Ok anyal ting’o lweta mondo anege nimar Jehova e ma oyiere.’*+ 11 Wuora, nee riak kandhoni ma ating’o e lwetani. Sa ma ne ang’ado kandhoni, be ne anegi? Koro inyalo neno maler ni an ok adwar timoni gima rach kendo pok ang’anyoni. Pok atimoni gimoro amora marach+ kata obedo ni imanya mondo inega.+ 12 Jehova e ma mondo ong’ad bura e kinda kodi+ kendo we Jehova e ma ochul kuor kuom gik ma isetimona.+ An to ok abi ting’o lweta mondo ahinyi.+ 13 Ngero moro machon wacho ni, ‘Richo wuok kuom jo maricho,’ to an ok naket lweta kuomi. 14 En ng’a ma ruodh Israel owuok mondo odhi omany? Imanyo ng’a? Imanyo mana an guok ma osethoni? Imanyo mana omboto achiel?*+ 15 Jehova e ma mondo obed jang’ad bura. En e ma obiro ng’ado bura e kindwa kendo en e ma obiro nono wachno mi ochung’na e bura.+ Obiro bedona jang’ad bura kendo obiro resa e lweti.”
16 Ka ne Daudi otieko wacho wechego, Saulo nopenje niya: “Daudi wuoda, mano en dwondi koso?”+ Kae to Saulo noyuak matek. 17 Nowacho ne Daudi niya: “In ng’at makare moloya nikech isetimona maber kinde duto, an to asetimoni mana marach.+ 18 Adier, kawuono isenyisa kaka itimona ng’wono kendo ok inega kata obedo ni Jehova ne oketa e lweti.+ 19 Nimar, en ng’a ma nyalo yudo jasike to oweye odhi ma ok otimone gimoro? Jehova mondo oguedhi+ nikech gima itimona kawuono. 20 Koro ne! Ang’eyo ni ibiro bedo ruoth+ kendo pinyruodh Israel biro siko e lweti. 21 Koro kuong’rina gi nying Jehova+ ni ok ibi tieko kotha ka asetho kendo ni ok ibi rucho nyinga e od wuora.”+ 22 Omiyo, Daudi ne okuong’ore ne Saulo kae to Saulo ne odok dalane.+ Daudi gi joge to nodok kuonde matek chopoe.+