Samuel Mokwongo
21 Bang’e, Daudi ne odhi Nob+ ir Ahimelek jadolo. Ahimelek ne otetni ka ne oneno Daudi mi openje niya: “Ang’o momiyo ibiro mana kendi ma onge ng’at ma okowi?”+ 2 Daudi nodwoko Ahimelek kama: “Ruoth ne oora mondo atimne gimoro to nonyisa ni, ‘Kik inyis ng’ato ang’ata gima aori mondo idhi tim kendo kik iwe ng’ato ang’ata ong’e gima asechiki.’ Ne, asewinjora gi joga ni warom kamoro. 3 Omiyo, akwayi ni ka in gi makate abich to yie imiya, kata gimoro amora ma in-go.” 4 To jadolo nodwoke niya: “Makate ma nitie gin mana makate maler.+ Anyalo miyigi mana ka jogo pok oriwore* gi mon machiegnini.”+ 5 Daudi nonyise kama: “Pok wariwore gi mon mana kaka wajatimo ka wadhi kedo.+ Ka joga lerga kinde ma wadhi kedo e lwenje mapile, donge kawuono to giler moloyo?” 6 Omiyo, jadolo ne omiyo Daudi makate malergo+ nikech ne onge makate moko. Makate malergo ne ogol e nyim Jehova chieng’ ma ne oket moko manyien.
7 Ja-Edom+ moro ma jatij Saulo ne ni kanyo chieng’no nikech ne ogeng’ne e nyim Jehova. Ne iluonge ni Doeg+ kendo ne en jatend jokwadh Saulo.
8 Eka Daudi nopenjo Ahimelek niya: “Be in-gi tong’ kata ligangla moro amora kae? Ne ok ating’o liganglana kata giga mag lweny nikech ruoth ne ogola mapiyo ahinya.” 9 To jadolo nodwoke kama: “Ligangla mar Goliath+ Ja-Filistia ma ne inego e Paw Ela+ e ma ni kae. Oboye gi law kendo okane e tok efod.*+ Ka idware, to kawe nikech en e ligangla kende ma nitie kae.” Daudi nowachone niya: “Onge ligangla ma chalo gi mano, miyago!”
10 Chieng’no, Daudi ne odhi nyime ringo+ Saulo modhi nyaka ir Akish ruodh Gath.+ 11 Jotij Akish ne owachone niya: “Donge ma e Daudi, ruodh piny? Donge en e ma ji ne werne kendo mielne ka wacho ni,
“Saulo osenego ji alufe,
To Daudi osenego ji aluf pieche gi pieche?”+
12 Wechego ne odonjo ne Daudi mi ne obedo maluor ahinya+ nikech Akish ruodh Gath. 13 Omiyo, ne owuondore ni en janeko+ e nyimgi mi ochako gwaro rangach kendo noweyo olaw mondo ochuer e yie tike. 14 Eka Akish ne onyiso jotije niya: “Neuru! Ng’atni en janeko. Ang’o momiyo ukele kae? 15 Uparo ni aonge gi jonekni moromo ma dukelna mae bende? Be ng’atni owinjore odonj e oda adier?”