Samuel Mokwongo

30 Chieng’ mar adek ka ne Daudi gi joge ochopo Ziklag,+ ne giyudo ka Jo-Amalek+ omonjo yo milambo kod Ziklag mi giwang’o Ziklag gi mach. 2 Ne gikawo mond+ dalano kod ji duto matindo gi madongo mi gidhigo ma ok ginego ng’ato ang’ata. 3 Ka ne Daudi gi joge ochopo e dalano, ne giyudo ka Jo-Amalek osewang’o dalano mi gikawo mondgi gi yawuotgi kod nyigi mi gidhigo. 4 Daudi gi joge ne oywak mi tekogi orumo ma ne ok ginyal ywak kendo. 5 Bende, Jo-Amalek ne odhi gi monde Daudi ma ne gin Ahinoam nya Jezreel kod Abigail ma ne chi Nabal Ja-Karmel.+ 6 Ji duto ma ne nigi Daudi nowinjo malit ahinya nikech ne okaw yawuotgi gi nyigi kendo ne gidwaro chiele gi kite. Omiyo, chuny Daudi ne ochandore ahinya. Kata kamano, Daudi ne oyudo teko kuom Jehova Nyasache.+

7 Eka Daudi ne onyiso Abiathar+ jadolo ma wuod Ahimelek niya: “Kelna efod* kae.”+ Mi Abiathar ne oterone efod.* 8 Daudi ne openjo Jehova kama:+ “Alaw jo ma ne omonjowagi? To be abiro jukogi?” Ne odwoke niya: “Lawgi nikech ibiro jukogi kendo ibiro reso gik ma ne gikawo.”+

9 Gikanyono, Daudi ne olawogi gi joge 600.+ Ne gidhi nyaka e Aora Besor ka ma joge moko ne odong’ie. 10 Daudi ne omedo lawo jomonjgo gi joge 400, to ji 200 ma ne ool ahinya ma ok nyal ng’ado Aora Besor ne odong’ chien.+

11 Ne giyudo Ja-Misri moro e pap mi gitere ir Daudi kendo ne gimiye chiemo kod pi modho. 12 Ne gimiye bende kek molos gi olemb ng’owo kod kek ariyo mag mzabibu. Ka ne osechiemo, tekone ne oduogo* nimar ne pok ochiemo kata modho kuom ndalo adek, odiechieng’ gotieno. 13 Bang’ mano, Daudi nopenje kama: “In ja kanye, to in jatij ng’a?” Ne odwoke niya: “An Ja-Misri kendo an misumba Ja-Amalek moro, en mana ni ruodha ne oweya nikech nyocha tuo ogoya ndalo adek mokalo. 14 Nyocha wamonjo yo milambo* mar Jo-Kereth+ kod piny Juda, gi yo milambo* mar piny Kaleb,+ kod Ziklag. To Ziklag ne wawang’o gi mach.” 15 Daudi ne openje kama: “Be inyalo tera ir jomonjgo?” Ne odwoke niya: “Abiro teri ka ikuong’orina gi nying Nyasaye ni ok ibi nega kendo ni ok ibi dwoka e lwet ruodha.”

16 Eka jalno ne otero Daudi ka ma jomonjgo ne okere e pap. Ne giyudo ka gichiemo kendo gimetho gi mor nikech gik mang’eny ma ne giyako e piny Jo-Filistia kod piny Juda. 17 Daudi ne onegogi chakre kogwen nyaka odhiambo. Onge kata ng’ato achiel ma ne otony+ mak mana ji 400 ma ne oringo gi ngamia. 18 Daudi ne oreso gik moko duto ma Jo-Amalek ne okawo+ kendo ne oreso monde ariyo bende. 19 Onge girgi moro amora maduong’ kata matin ma ne olal. Ne gireso yawuotgi gi nyigi kendo Daudi ne oduogo gi gik moko duto ma ne jogo oyako.+ 20 E wi mano, Daudi ne oyako jambgi, gi rombegi, kod diek duto mi giduogogo kaachiel gi mekgi ma Jo-Amalek ne oyako. Ji ne wacho kama: “Magi gin gik ma Daudi oyako.”

21 Eka Daudi ne oduogo ir joge 200 ma ne ool kendo ma ne ok nyal ng’ado Aora Besor.+ Jogo ne owuok mondo girom ne Daudi gi jo ma ne ni kode. Ka ne Daudi ochopo irgi, ne openjogi kaka gidhi. 22 To moko kuom jo ma ne oduogo gi Daudi ne gin jo manono kendo ma pachgi richo. Ne giwacho kama: “Nikech jogi ne ok odhi kodwa, ok wabi pogonegi gik ma waduogogo. Wabiro mana miyogi mondegi kod nyithindgi kae to gidhi.” 23 Kata kamano, Daudi ne odwokogi kama: “Ooyo owetena, kik utim kamano gi gik ma Jehova osemiyowa. Oseritowa kendo osekonyowa loyo jo ma ne omonjowa.+ 24 Be uparo ni nitie ng’ato ma biro yie gi wachuni? Jo ma ne odhi kedo kod jo ma ne odong’ ka rito osike+ biro yudo pok marom kuom gik ma waduogogo. Ji duto biro yudo pok maromre.+ 25 Chakre chieng’no, mano ne obedo chik ma Jo-Israel duto luwo nyaka kawuononi.

26 Ka ne Daudi oduogo Ziklag, ne ooro moko kuom gik ma ne oyako ne jodongo mag Juda mosiepene konyisogi niya: “Aoronu mich ma waseyako kuom wasik Jehova.” 27 Ne ooro michgo ne jodongo man Bethel,+ gi man Ramoth e piny Negeb,* gi man Jatir,+ 28 gi man Aroer, gi man Sifmoth, gi man Eshtemoa,+ 29 gi man Rakal, gi jodongo man e mier mag Jo-Jerameel,+ gi man e mier mag Jo-Keni,+ 30 gi man Horma,+ gi man Borashan, gi man Athak, 31 kod man Hebron.+ Ne oor mich kuonde duto ma Daudi gi joge ne jodhiye.