Mar Ariyo ne Jo-Korintho
3 Be dibed ni wan wawegi wasechako pwoyore kendo? Koso udwaro ni wamiu barupe ma wapwoyorenugo kata un e ma umiwa barupe ma upwoyowago, mana kaka jomamoko timo? 2 Un uwegi un e barupwa,+ mondik ei chunywa, mong’ere, kendo ma dhano duto somo. 3 Nikech nenore maler ni un barua mar Kristo ma wasendiko kaka jotichne,+ en barua ma ondik gi roho mar Nyasaye mangima to ok gi wino, barua mondik e chunywa+ to ok e kite mopa.+
4 Kokalo kuom Kristo, wan gadier ma kamano kuom Nyasaye. 5 Ok ni wan wawegi e ma wamiyo wabedo jo ma oromo chuth e tiyo tijni, to Nyasaye e ma miyo wabedo jo ma oromo chuth,+ 6 en e ma kuom adier osemiyo waromo chuth bedo jotich mag singruok manyien,+ ok mar chike mondiki,+ to mar roho; nimar chik mondik ng’ado ne ji buch tho,+ to roho miyogi ngima.+
7 Koro ka chike ma kelo tho kendo ma ne ondik gi nyukta e kite+ nobiro gi duong’ miwuoro ahinya ma ne omono kata Jo-Israel ng’iyo wang’ Musa tir nikech wang’e ne rieny gi duong’,+ ma en duong’ ma ne dhi rumo, 8 en ang’o ma nyalo mono tich ma roho+ chopo obed gi duong’ moloyo?+ 9 Nikech ka chike ma kelo buch tho+ ne nigi duong’+ miwuoro, tich ma miyo ikwano ji kaka jo makare nigi duong’ moloyo!+ 10 Kuom adier, gima ne omi duong’ chon, osema duong’ ma ne en-go nikech gima nigi duong’ ma loye koro nitie.+ 11 Nimar ka gima nonego orum nobiro gi duong’,+ mano kaka gima siko nigi duong’ momedore moloyo!+
12 Nikech wan gi geno ma kamano,+ wawuoyo ka wan thuolo ahinya, 13 kendo ok watim gima Musa notimo ka ne ojaumo wang’e gi law+ mondo nyithind Israel kik chom wengegi tir kuom gima ne dhi rumono. 14 To pachgi nodinore.+ Nikech nyaka kawuononi, sa ma ji somo singruok machon,+ rageng’no siko ka oumo pachgi, nimar inyalo mana gole kokalo kuom Kristo.+ 15 Kuom adier, nyaka chil kawuono, samoro amora misomo weche ma Musa nondiko,+ nitie rageng’ ma umo chunygi.+ 16 To ka ng’ato olokore oyie kuom Jehova,* igolone rageng’no.+ 17 Koro Jehova* en Roho;+ kendo ka ma roho mar Jehova* nitie, ji bedo thuolo.+ 18 To waduto, kaka jo ma wengegi onge gi rageng’, wachal kaka kio, ka wamiyo duong’ mar Jehova* nenore kuomwa, kilokowa mondo wabed e kite, kendo duong’no medo nenore kowuok e okang’ moro nyaka e machielo, mana kaka Jehova* ma en Roho* osemiyo mano otimore.+