Jeremia
9 Mad wiya lokre soko mar pi,
Pi wengena ochuer ka aora!+
Eka daywag odiechieng’ gotieno
Nikech joga monegi.
2 Mad abed gi kar bworo e thim!
3 Giywayo lewgi ka atung’;
Miriambo kod gik ma ok kare e mopong’o piny.+
“Richogi medore ameda,
Kendo gisedagi winja,”+ Jehova owacho.
4 “Ng’ato ka ng’ato mondo otang’ gi nyawadgi,
Kendo kik igen kata mana owadu.
5 Ng’ato ka ng’ato wuondo jabute,
Onge ng’at ma wacho adier.
Gisepuonjo lewgi wacho miriambo.+
Timbegi maricho miyo gijony ahinya.
6 Idak e kind miriambo.
Gidagi ng’eya nikech miriambogi,” Jehova owacho.
7 Omiyo, ma e gima Jehova Nyasach oganda lweny owacho:
8 Lewgi chalo gi asere mager ma wacho miriambo.
Ng’ato ka ng’ato wuoyo gi kuwe gi jabute,
To e chunye ochikone obadho.”
9 “Donge onego akumgi kuom gik ma kamago?” Jehova owacho.
“Donge onego achul kuor ne oganda ma kamano?+
10 Abiro goyo nduru kendo ywago gode
Abiro wero wende mag ywago kuonde kwath manie thim,
Nimar osewang’gi ma ng’ato ok nyal kaloe,
Kendo onge dwond jamni miwinjo kuno.
Winy ma fuyo e kor polo kod ondiegi oseringo; gisedhi chuth.+
11 Abiro loko Jerusalem pidh kite,+ kar dak mar bwe,+
Abiro loko mier mag Juda gunda, onge ng’at ma nodagie.+
12 Ng’ano mariek ma nyalo winjo tiend wachni?
En ng’ano ma Jehova osenyiso wachno mondo odhi olande?
Ang’o momiyo piny osekethore?
Ang’o momiyo otwo mana ka thim
Ma koro onge ng’at ma nyalo kaloe?”
13 Jehova nodwoko kama: “En nikech gisedagi chik ma namiyogi, kendo gisetamore luwo chikno, to bende ok gidwar winjo dwonda. 14 Gisebedo ka giluwo gik ma chunygi dwaro,+ kendo giluwo nyiseche mag Baal mana kaka wuonegi ne opuonjogi.+ 15 Kuom mano, ma e gima Jehova Nyasach oganda lweny, kendo Nyasach Israel owacho, ‘Abiro miyo ogandani yath makech mondo gicham kod pi sum mondo gimodhi.+ 16 Abiro keyogi e ogendni ma gin kaachiel gi wuonegi ne ok ging’eyo,+ abiro oro ligangla mondo olawgi kendo otiekgi pep.’+
17 Ma e gima Jehova Nyasach oganda lweny owacho,
‘Beduru jo ma weche donjonegi.
Luonguru mon ma wero wende mag ywak,+
Oruru wach mondo mon mong’eyo ywak obi,
18 Gireti mapiyo mondo gikonywa ywak,
Mondo pi wengewa omol
Kendo pi wengewa ochuer.+
19 Nimar dwond ywagruok osewinjore koa Sayun:+
“Mano kaka waserumo chuth!
Mano kaka waseyudo wich-kuot maduong’!
Waseweyo pinywa, kendo gisemuko utewa.”+
20 Un mon, winjuru wach Jehova.
Chikuru itu ne wach moa e dhoge.
Puonjuru nyiu wend ywagruokni,
Kendo puonjreuru wend ywagruokni.+
21 Nimar tho osedonjo gie dirisewa,
Osedonjo e i ohinga magwa mochiel motegno
Mondo okaw nyithindwa e nderni
Kendo yawuotwa e laru mag dala.’+
22 Wach ni, ‘Ma e gima Jehova owacho:
“Ringre jo motho biro dhurore mana ka manyiwa e wi lowo,
Ginichal gi cham ma jakeyo osebeto,
To onge ng’at ma chokogi.”’”+
23 Ma e gima Jehova owacho:
“Ng’at mariek kik sungre nikech riekone;+
Ng’at ma ratego kik sungre nikech tekone;
Kendo ng’at ma nigi mwandu kik sungre nikech mwandune.”+
24 “To ng’at ma sungore mondo osungre nikech:
En gi rieko kendo ong’eya,+
Ni an Jehova, Ng’at mohero ji gi hera mosiko, ma ng’ado bura kare, kendo ma timo gik makare e piny,+
Nimar gigo e ma amorgo,”+ Jehova owacho.
25 “Neuru! Ndalo biro,” Jehova owacho, “ma abiro kumoe ng’ato ang’ata moseter nyangu e ringruok kende,*+ 26 kaachiel gi Misri,+ Juda,+ Edom,+ Jo-Amon,+ Moab,+ kod jogo duto motito yie wigi modak e thim;+ nimar ogendni duto pok oter nyangu, kendo dhood Israel duto pok oter nyangu e chunygi.”+