Ne Jo-Rumi
5 Kuom mano, nikech koro osekwanwa kaka jo makare kokalo kuom yie,+ wabeduru gi kuwe* e kindwa gi Nyasaye kokalo kuom Ruodhwa Yesu Kristo,+ 2 ma kuome bende waseyudoe thuolo mar chopo ir Nyasaye mondo wayud ng’wonone mogundho ma koro wan-go nikech yie;+ wamoruru* nikech wan gi geno mar yudo duong’ mar Nyasaye. 3 To ok mano kende, to wamoruru* bende sa ma wayudo masiche,+ nimar wang’eyo ni masira miyo wanano;+ 4 kae to sinani miyo Nyasaye yie kodwa;+ kae to bedo ng’at ma Nyasaye oyiego kelo geno,+ 5 to geno ok kel wich-kuot;+ nimar hera mar Nyasaye oseol ei chunywa kokalo kuom roho maler ma nomiyowa.+
6 Nikech adier ka ne pod wanyap,+ Kristo ne otho ne jo maricho e kinde sie ma ne oseket. 7 Nimar tek ahinya mondo ng’ato otho e lo ng’at makare; to samoro ng’ato nyalo yie tho ne ng’at maber. 8 Kata kamano, Nyasaye nyiso hera moherowago kama: ni ka ne pod wan joricho, Kristo ne othonwa.+ 9 Kuom mano, nikech wan gadier ni rembe osemiyo okwanwa kaka jo makare,+ ibiro reswa kokalo kuome, mondo mirimb Nyasaye kik binwa.+ 10 Nimar ka ne wan wasik Nyasaye, tho mar Wuode nomiyo wabedo gi winjruok kode,+ omiyo wan gadier ni ngimane biro resowa nikech koro wasebedo gi winjruok maber gi Nyasaye. 11 To ok mano kende, to wamor bende kuom Nyasaye ma koro wasebedogo gi winjruok maber kokalo kuom Ruodhwa Yesu Kristo.+
12 Mano e momiyo, kaka richo nodonjo e piny kokalo kuom ng’ato achiel, kendo tho nobiro kokalo kuom richo,+ tho nolandore kuom ji duto nikech giduto ne gisetimo richo+—. 13 Nimar richo ne ni e piny ka ne Chik pok obiro, to onge ng’at minyalo kwan kaka jaricho ka chik onge.+ 14 Kata kamano, tho nolocho kaka ruoth chakre gi Adam nyaka Musa, kata mana e wi jo ma ne ok otimo richo ma chal gi ketho mar Adam, ma en jal ma chalre e yore moko gi ng’at ma ne onego obi.+
15 Gima richo kelo opogore gi mich ma Nyasaye chiwo. Nikech ka kuom ketho mar ng’at achiel ji mang’eny ne otho, ng’wono mogundho mar Nyasaye kod mich mochiwo nono nokelo ber mathoth ne ji mang’eny.+ Michno ne ochiw kanyachiel gi ng’wono mogundho kokalo kuom ng’ato achiel,+ ma en Yesu Kristo. 16 E wi mano, mich ma Nyasaye chiwo nono opogore gi gima richo mar ng’ato achiel nokelo.+ Nikech bura ma ne ong’ad bang’ ketho mar ng’at achiel nokelo kum mar tho,+ to mich ma nobiro bang’ ketho mar ji mang’eny nomiyo okwan-gi kaka jo makare.+ 17 Nimar ka richo mar ng’ato achiel nomiyo tho olocho kaka ruoth,+ wanyalo bedo gadier ni ji biro bedo mangima mi giloch kaka ruodhi+ nikech ng’ato achiel, ma en Yesu Kristo.+ Mano en nikech giyudo mich michiwo nono ma miyo ikwanogi kaka jo makare+ kokalo kuom ng’wono mogundho mar Nyasaye.
18 Omiyo, mana kaka kokalo kuom richo mar ng’ato achiel, oganda dhano duto noyudo kum mar tho,+ e kaka bende kokalo kuom tim makare mar ng’ato achiel, oganda dhano duto+ ikwano kaka jo makare mondo giyud ngima.+ 19 Nimar mana kaka kokalo kuom tim ng’ato achiel mar ketho chik, ji mang’eny nobedo joricho,+ e kaka bende kokalo kuom tim ng’ato achiel mar luwo chik, ji mang’eny ibiro kwan kaka jo makare.+ 20 Koro Chik nobiro mondo richo obed mogundho.+ To kama richo nogundhoe, ng’wono mogundho mar Nyasaye ne omedore moloyo. 21 Mondo ang’o otimre? Mondo mana kaka richo nolocho ka ruoth kanyachiel gi tho,+ kamano bende ng’wono mogundho mar Nyasaye oloch ka ruoth gi tim makare, mondo okel ngima ma nyaka chieng’ kokalo kuom Yesu Kristo Ruodhwa.+