Jona
1 Wach Jehova nobiro ne Jona*+ wuod Amitai niya: 2 “A malo idhi e dala maduong’ mar Nineve,+ mondo isiem jo dalano nimar richogi osechopona.”
3 To Jona noa malo moringo oa e nyim Jehova. Noridore nyaka Jopa moyudo yie ma dhi Tarshish. Eka ne ochulo pes wuoth moidho yie mondo odhi Tarshish kanyachiel gi jo ma ne dhi kuno. Nodwaro dhi mabor gi Jehova.
4 Eka Jehova nomiyo yamo okutho matek e nam. Ne nitie ahiti mager e nam, kendo yieno ne chiegni kethore. 5 Kibaji nogoyo jokwang’ yie mi ng’ato ka ng’ato ochako kwayo nyasache mondo okonye. Ne gichako wito gik ma ne gin-go e yie mondo yieno odong’ mayot.+ Noyudo Jona osedonjo nyaka piny e i yieno kendo nindo matut ne osekwanye. 6 Jatend yie nodhi ir Jona mopenje niya: “Ang’o momiyo inindo? A malo mondo ilam nyasachi! Di po ka Nyasaye madier okechowa mi oreso ngimawa.”+
7 Eka ne giwacho niya: “Wagouru ombulu+ mondo wang’e ni ng’ano mosemiyo masirani oyudowa.” Omiyo, ne gigoyo ombulu, mi ombulu nolwar kuom Jona.+ 8 Ne gipenjo Jona niya: “Wasayi, nyiswa ane ni ng’ano mosekelonwa masirani? Itiyo tich mane, to ia kanye? Nyiswa ane, ia e piny mane, to in ja oganda mane?”
9 Nodwokogi kama: “An Ja-Hibrania, kendo aluoro* Jehova Nyasaye manie polo, kendo ma ne ochueyo nam kod piny.”
10 Ka ne giwinjo kamano, ne gibedo maluor ahinya mi gipenje niya: “Ang’o momiyo itimo gima rach kamano?” (Jogo ne ofwenyo ni Jona ne ringo mondo oa e nyim Jehova, nimar ne osewachonegi kamano.) 11 Nam ne medo tugore marach moloyo, omiyo, ne gipenje niya: “Watimni ang’o mondo nam okuwe?” 12 Nodwokogi niya: “Ting’auru mondo ubola e nam, eka nam biro kuwe; nimar ang’eyo ni ahiti maduong’ni osebironu mana nikech an.” 13 Jogo ne otemo matek mondo gikwang’ yie giduoke e dho wath, to ne otamogi nikech nam ne medo tugore kendo ahiti ne ger ahinya.
14 Eka ne giywak ne Jehova niya: “Yaye Jehova, wasayi ni kik iyie watho nikech ng’atni! Kik ing’adnwa bura ni wanego ng’at ma onge ketho, nikech isetimo gima long’o e wang’i, yaye Jehova.” 15 Omiyo, ne giting’o Jona mi gibole e nam, mi nam nokuwe. 16 Bang’ mano, luoro maduong’ nomako jogo nikech Jehova,+ mi ne gichiwo ne Jehova misango kendo ne gikuong’orene.
17 To Jehova nooro rech maduong’ mi rechno nomuonyo Jona, kendo Jona nobedo e i rechno kuom ndalo adek, odiechieng’ gotieno.+