BUK MAR ARIYO MAR SAMUEL

1 Bang’ tho Saulo, Daudi ne oduogo koa loyo* Jo-Amalek kae to nobet Ziklag+ kuom ndalo ariyo. 2 E odiechieng’ mar adek, ng’at moro ne obiro kowuok e kambi mar Saulo ka lepe oyiech kendo wiye otimo buru. Ka ne ochopo ir Daudi, ne opodho piny auma.

3 Daudi ne openje niya: “Ia kanye?” Ne odwoke ni, “Awuok e kambi mar Jo-Israel.” 4 Daudi ne openje niya: “Weche ne odhi nade kuno? Wachna.” Ng’atno ne odwoke kama: “Ne olo jolweny mi giringo kendo ji mang’eny ne otho. Kata mana Saulo gi Jonathan wuode bende otho.”+ 5 Daudi nopenjo wuoyi ma nokelone wachno niya: “Ing’e nade ni Saulo gi Jonathan wuode otho?” 6 Wuoyino ne odwoke kama: “Ne apo ka an e Got Gilboa+ mi aneno Saulo kosirore e tong’ mare kendo geche lweny kod joidh farese ne osejuke.+ 7 Ka ne olokore mi onena, ne oluonga mi adwoke ni, ‘An ka!’ 8 Ne openja niya: ‘In ng’a?’ To ne adwoke ni, ‘An Ja-Amalek.’+ 9 Eka ne onyisa ni, ‘Bi mondo inega nimar an gi rem malit ahinya to pok atho.’ 10 Omiyo, ne adhi mi anege+ nikech nang’eyo ni odhi tho nimar ne osehinyore marach. Kae to ne akawo osimbo* ma ne nie wiye kod bangli ma ne nie bade mondo akelnigi ruodha.”

11 Gikanyono, Daudi ne oyiecho lawe kendo ji ma ne ni kode bende ne oyiecho lepgi. 12 Ne giywak matek kendo ne gitweyo chiemo+ nyaka odhiambo nikech tho Saulo, gi wuode Jonathan, gi jo Jehova, kod Jo-Israel+ duto ma ne ligangla onego chieng’no.

13 Daudi ne openjo wuoyi ma ne okelone wach tho Saulo niya: “Ija kanye?” Ne odwoke ni, “An wuod jadak ma Ja-Amalek.” 14 Eka Daudi ne openje kama: “Ang’o momiyo ne ok iluoro ting’o lweti mondo ineg ng’at ma Jehova owalo?”+ 15 Eka Daudi ne oluongo achiel kuom joge monyise niya: “Bi mondo inege.” Ng’atno ne ogoye motho.+ 16 Daudi ne owachone niya: “Rembi obed e wiyi iwuon nikech dhogi e ma ong’adoni bura kuom wacho ni, ‘An e ma ne anego ng’at ma Jehova owalo.’”+

17 Eka Daudi ne oywago Saulo gi Jonathan+ wuode gi wer 18 mowacho ni opuonj Jo-Juda wendno. Wendno ne iluongo ni, “Atung’” kendo ondike e bug Jashar:+

19 “Yaye Israel, oseneg jogi madongo kuonde moting’ore.+

Mano kaka jo madongo opodho!

25 Mano kaka jo ma roteke otho e lweny!

Jonathan onindo kuonde moting’ore!+

2 Bang’ kinde, Daudi nopenjo Jehova+ kama: “Be anyalo dhi e achiel kuom mier mag Juda?” Jehova nodwoke ni, “Dhiyo.” Kae to Daudi nopenje niya: “Adhi kanye?” Nodwoke ni, “Dhi Hebron.”+ 2 Omiyo, Daudi nodhi kuno gi monde ariyo ma ne gin Ahinoam+ nya Jezreel kod Abigail+ ma ne chi Nabal Ja-Karmel. 3 Daudi nodhi gi chwo ma ne ni kode+ kendo ng’ato ka ng’ato kuomgi nodhi gi joode, mi ne gidak e mier ma ne olworo Hebron. 4 Eka Jo-Juda nobiro mi giwiro Daudi mondo obed ruoth e wi dhood Juda.+

Kae to ne ginyiso Daudi niya: “Jo-Jabesh-gilead e ma noyiko Saulo.” 5 Omiyo, Daudi nooro joote ir Jo-Jabesh-gilead mowachnegi kama: “Jehova mondo oguedhu nikech ng’wono ma ne unyiso Saulo kuom yike.+ 6 Mad Jehova nyisu hera kinde duto. An bende abiro nyisou ng’wono nikech gima usetimo.+ 7 Koro beduru motegno kendo ma jochir nimar Saulo ruodhu koro osetho to dhood Juda oseketa ruodhgi.”

8 Kata kamano, Abner+ wuod Ner, jatend jolwenj Saulo noyudo osekawo Ishbosheth+ wuod Saulo mi odhi kode nyaka Mahanaim+ 9 kendo nokete ruodh Gilead,+ gi Jo-Asher, gi Jezreel,+ gi Efraim,+ gi Benjamin, kod Israel duto. 10 Ishbosheth wuod Saulo ne en ja higni 40 ka nobedo ruodh Israel kendo nolocho kuom higni ariyo. Kata kamano, dhood Juda to ne ni kor Daudi.+ 11 Daudi nolocho e wi dhood Juda kuom higni abiriyo gi dweche auchiel ka en Hebron.+

12 Bang’ kinde, Abner wuod Ner kaachiel gi jotij Ishbosheth ma wuod Saulo nowuok Mahanaim+ mi gidhi nyaka Gibeon.+ 13 To Joab+ wuod Zeruya+ kaachiel gi jo Daudi bende nodhi morado kodgi e yawo man Gibeon. Grup achiel nobet e bath yawo konchiel, to grup machielo nobet e bath yawo komachielo. 14 Gikone, Abner nonyiso Joab kama: “We mondo yawuoyi obi oked* e nyimwa.” Joab nodwoke niya: “Ee, we mondo gibi.” 15 Omiyo, yawuoyi 12 nowuok kor Jo-Benjamin kod Ishbosheth wuod Saulo, to 12 nowuok kor jo Daudi. 16 Ng’ato ka ng’ato nomako nyawadgi gi yie wiye mi ochuoyo ng’etne gi ligangla kendo ne githo riat. Omiyo, kanyo ne oluong ni Helkath-hazurim kendo en e Gibeon.

17 Bang’ mano, lweny mager nomuoch e odiechieng’no kendo gikone jotij Daudi noloyo Abner gi Jo-Israel duto. 18 Koro, yawuot Zeruya+ adek duto ne ni kanyo. Ne gin Joab,+ Abishai,+ kod Asahel.+ To Asahel ne tiende yot ka mwanda.* 19 Asahel nolawo Abner matek kendo ne ok obar korachwich kata koracham. 20 Ka ne Abner ong’iyo chien, nopenjo ni, “Asahel mano in?” to en nodwoke ni, “Ee, en an.” 21 Eka Abner nonyise kama: “Bar korachwich kata koracham imak achiel kuom yawuoyi kendo ikaw gimoro amora miyudo kuome.” Kata kamano, Asahel ne ok dwar we lawe. 22 Omiyo, Abner nonyiso Asahel kendo niya: “We lawa. Ang’o momiyo idwaro ni anegi? Ere kaka dachung’ e nyim Joab owadu kasetimo gima kamano?” 23 To en notamore weyo lawe, omiyo Abner nochuoyo bund iye gi pier tong’+ mi tong’ nowuok ka ng’eye kendo nogore piny motho kanyo gi kanyo. Ji duto ma ne kadho ka ma Asahel ne othoe ne chung’ kanyo ka bwok.

24 Eka Joab gi Abishai nolawo Abner matek. Ka ne chieng’ podho, ne gichopo e got Ama momanyore gi Gia man e yo mochomo thim mar Gibeon. 25 Kendo, Jo-Benjamin nochokore kaachiel bang’ Abner mi giduto ne gichung’ e wi got moro. 26 Eka Abner nokok ne Joab niya: “Wabiro dhi nyime negore gi ligangla nyaka karang’o? Donge ing’eyo ni sigu e ma biro betie? Ibiro rito nyaka karang’o ka pok ikwero jogi mondo owe lawo owetegi?” 27 Gikanyono, Joab nowacho niya: “Akuong’ora gi nying Nyasaye ni ka dine ok iwuoyo, jogi dolawo owetegi nyaka kiny okinyi.” 28 Eka Joab nogoyo tung’ mi joge noweyo lawo Jo-Israel, kendo lweny norumo.

29 Abner gi jo ma ne ni kode nowuotho e Araba+ otieno mangima mi ging’ado Aora Jordan kendo giluwo hoho* nyaka ne gichopo Mahanaim.+ 30 Ka ne Joab oseweyo lawo Abner, nochoko jolwenje duto. Jo Daudi ma notho ne gin ji 19 moriwo nyaka Asahel. 31 To jotij Daudi noloyo Jo-Benjamin gi jo ma ne luwo Abner kendo ji 360 kuomgi notho. 32 Ne gikawo Asahel+ kendo ne giyike e liend wuon-gi Bethlehem.+ Eka Joab gi joge ne owuotho otieno mangima nyaka ne gichopo Hebron+ ka piny yawore.

3 Lweny e kind jood Saulo gi jood Daudi nodhi nyime kuom ndalo mang’eny kendo jood Daudi nomedo bedo motegno+ ka jood Saulo to ne dok chien.+

2 Daudi nonyuolo yawuoyi ka en Hebron.+ Wuode makayo ne en Amnon+ ma nonyuolo gi Ahinoam+ nya Jezreel. 3 Mar ariyo ne en Kileab wuod Abigail+ ma ne chi Nabal Ja-Karmel, mar adek ne en Absalom+ wuod Maaka nyar Talmai+ ruodh Geshur. 4 Mar ang’wen ne en Adonija+ wuod Hagith, mar abich ne en Shefatia wuod Abital. 5 Mar auchiel ne en Ithream wuod Egla chi Daudi. Mago e yawuoyi ma Daudi nonyuolo ka en Hebron.

6 E kinde ma lweny ne dhi nyime e kind jood Saulo gi jood Daudi, Abner+ ne medo bedo gi teko e od Saulo. 7 Saulo ne nigi dhako moro ma nyinge Rizpa+ nyar Aia. Bang’e, Ishbosheth+ nopenjo Abner niya: “Ang’o momiyo ne inindo gi chi wuora?”+ 8 Abner iye nowang’ nikech penjo ma Ishbosheth nopenjeno mi odwoke niya: “Inena mana ka guok moa Juda? Nyaka chop sani asebedo ka amakora gi od Saulo wuoru, owetene, gi osiepene, kendo pok aketi e lwet Daudi, to e ma pod kawuononi idhawo koda e wach dhako. 9 Nyasaye mondo omiya kum mager ka ok atimo ne Daudi kaka Jehova nosingone+ 10 ni obiro golo pinyruoth e od Saulo kendo guro loch mar Daudi e wi Israel gi Juda kochakore Dan nyaka Beer-sheba.”+ 11 To Ishbosheth ne ok nyal dwoko Abner nikech ne oluore.+

12 Gikanyono, Abner nooro joote ir Daudi kopenje kama: “Piny duto en mar ng’a?” Nomedo niya: “Tim koda singruok, to abiro timo duto ma anyalo mondo alok Jo-Israel duto odog kori.”+ 13 Daudi nodwoke kama: “Mano ber. Abiro timo singruok kodi. Gimoro achiel kende e ma akwayi, kelna mana Mikal+ nyar Saulo sa ma ibiro ira, nono to kik item biro e nyima.” 14 Eka Daudi nooro joote ir Ishbosheth+ wuod Saulo kowachone kama: “Miya Mikal chiega ma ne anyuomo gi pien duong’ Jo-Filistia 100.”+ 15 Omiyo, Ishbosheth nooro wach mondo ogole kuom chwore ma Paltiel+ wuod Laish. 16 To chwore noluwo bang’e nyaka Bahurim+ ka oywak malit. Eka Abner nowachone kama: “Dog ka ma iaye!” Mi Paltiel nodok.

17 Gie kindego, Abner nooro wach ne jodong Israel, niya: “Usebedo kudwaro ni Daudi obed ruodhu. 18 Koro kawuru okang’ nimar Jehova osewacho ne Daudi kama: ‘Abiro tiyo gi Daudi jatichna+ e reso Jo-Israel e lwet Jo-Filistia kendo e lwet wasikgi duto.’” 19 Eka Abner nowuoyo gi Jo-Benjamin.+ Nodhi bende Hebron mowuoyo gi Daudi owuon konyise wach winjruok ma Jo-Israel kod jood Benjamin notimo.

20 Ka ne Abner odhi Hebron ir Daudi ka en gi ji 20, Daudi nolosone nyasi mochiemo gi joge. 21 Abner nonyiso Daudi kama: “We adog achok Jo-Israel duto iri ruodha, mondo gitim kodi singruok e ka inibed ruodh pinywa duto kaka chunyi dwaro.” Omiyo, Daudi noweyo Abner modhi gi kuwe.

22 Gie kindeno, jotij Daudi kod Joab noa monjo jomoko ma giduogo gi gik mang’eny ma giyako. Ne giyudo ka Abner osea Hebron ir Daudi nimar Daudi noseweye modhi gi kuwe. 23 Ka ne Joab+ gi jolweny duto ma ne ni kode ochopo, ne onyise kama: “Abner+ wuod Ner+ ne obiro ir ruoth, to ruoth ne oweye aweya modhi gi kuwe.” 24 Omiyo, Joab ne odhi ir ruoth mopenje kama: “Ang’o misetimoni? Ang’o momiyo Abner ne obiro iri to iweye aweya modhi? 25 Donge ing’eyo Abner wuod Ner? Ne obiro mana wuondi mondo ong’e wuodheni kod gik moko duto mitimo.”

26 Omiyo, Joab nowuok e nyim Daudi mi ooro joote mondo olaw Abner, mit ne gijuke e soko mar Sira mi giduogo kode, to Daudi ne ok ong’eyo wachno. 27 Ka ne Abner oduogo Hebron,+ Joab nodhi kode tenge e dho rangach mondo giwuo kar kendgi. To ka ne gin kanyo, ne ochuoyo iye motho+ kochulo kuor nikech Abner nonego Asahel owadgi.*+ 28 Ka ne Daudi owinjo gima notimoreno, nowacho niya: “An kod pinyruodha waonge ketho e nyim Jehova nyaka chieng’ nikech remb+ Abner wuod Ner. 29 Remb Abner mondo obed e wi Joab+ gi od wuon-gi duto. Dhood Joab kik bed ma onge dichwo ma duong’ne chuer,+ kata jadhoho,+ kata dichwo ma tiyo tij nalo usi e luth,* kata ng’at ma tho gi tho ligangla, kata ng’at mochando chiemo.”+ 30 Omiyo, Joab gi Abishai+ owadgi ne onego Abner+ nikech Abner ne onego Asahel ka ne gin e lweny+ Gibeon.

31 Eka Daudi nonyiso Joab gi jomamoko duto kama: “Yiechuru lepu kendo urwak lep gunia* mondo uywag Abner.” Ruoth Daudi ne wuotho e tok jo ma noting’o ringre Abner. 32 Ne giyiko Abner Hebron kendo ruoth noywage gi dwol maduong’, mi ji duto bende noywage e liel kanyo. 33 Ruoth noywago Abner niya:

“Be owinjore Abner otho tho mar jo mofuwo?

Itho ka ng’at moneg gi jo mahundu.”+

Ka ne ji owinjo kamano, ne gimedo ywak.

35 Bang’e, ne gikelo ne Daudi makate mar hoch e odiechiengno, to Daudi nokuong’ore kama: “Nyasaye mondo omiya kum mager ka po ni achamo makate kata gimoro amora ka chieng’ pok opodho.”+ 36 Ka ne oganda owinjo wachno, ne gimor mana kaka ne gisemor gi gik mamoko duto ma ruoth nosetimo. 37 Omiyo, chieng’no Jo-Israel duto nong’eyo ni ruoth ok e ma nochiko mondo oneg Abner wuod Ner.+ 38 Eka ruoth nonyiso jotichne kama: “Be ung’eyo ni jatelo kendo ng’at maduong’ osetho e Israel kawuononi?+ 39 Kawuono anyap kata obedo ni osewira mondo abed ruoth,+ kendo yawuot Zeruyagi+ otamo wang’a gi gero.+ Jehova mondo ochul jaricho kaluwore gi richone.”+

4 Ka ne Ishbosheth+ wuod Saulo owinjo ni Abner osetho Hebron,+ tekone norumo kendo Jo-Israel duto nobwok. 2 Ne nitie ji ariyo ma notelo ne jomonj mag wuod Saulo: achiel ne nyinge Baana to machielo ne en Rekab. Ne gin yawuot Rimon Ja-Beeroth ma wuok e dhood Benjamin. (Nimar Beeroth+ bende ne ikwano e piny Benjamin. 3 Jo-Beeroth noringo modhi dak Gitaim+ kendo gin jodak kuno nyaka kawuononi.)

4 Jonathan+ wuod Saulo ne nigi wuoyi moro ma tiendene ong’ol.+ Ne en jahigni abich ka ne wach owuok Jezreel+ ni Saulo gi Jonathan otho, kendo japite noting’e moringo kode nikech kibaji nomake, to ka ne oringo, nyathino nogore piny mobedo rang’ol. Nyathino niluongo ni Mefibosheth.+

5 Rekab kod Baana ma ne gin yawuot Rimon Ja-Beeroth nodhi e od Ishbosheth godiechieng’ sa ma chieng’ kech ka oyueyo. 6 Ne gidonjo e ot ka gima gidwaro kawo ngano mi gichuoyo bund iye. Bang’ mano, Rekab gi Baana+ owadgi noringo. 7 Ka ne gidonjo e ot, ne giyude konindo e otandane kor nindo, ne gichuoye motho kendo ne ging’ado wiye oko. Ne giting’o wijno mi giwuothogo otieno mangima e yo madhi Araba. 8 Eka ne gikelo wi Ishbosheth+ ne Daudi ka en Hebron mi giwachone kama: “Eri wi Ishbosheth wuod Saulo ma jasiki+ ma ne dwaro negi.+ Kawuono Jehova osechuloni kuor kuom Saulo gi nyithinde.”

9 Kata kamano, Daudi nodwoko Rekab gi Baana ma ne gin yawuot Rimon Ja-Beeroth niya: “Akuong’ora gi nying Jehova, Nyasaye ma noresa e chandruogena duto,+ 10 ni ka ne ng’ato obiro Ziklag monyisa ni ‘Saulo otho’+ koparo ni okelona wach maber, ne amake mi anege.+ Mano e chudo ma ne oyudo kuom kelona wachno. 11 To nade ka jo maricho odonjo e od ng’at makare mi ginege e otandane? Donge onego achul rembe e wiu+ kendo agolu oko e piny? 12 Daudi nochiko joge mondo oneggi.+ Ne ging’ado bedegi kod tiendegi kae to gilierogi e yath+ e bath yawo man Hebron. Ne gikawo wi Ishbosheth ma giyiko Hebron ka ma ne oyike Abner.

5 Bang’ kinde, dhoudi duto mag Israel nodhi Hebron+ ir Daudi mi ginyise kama: “Wan mana oweteni.*+ 2 Kinde mokalo ka ne Saulo en ruodhwa, in e ma niteloga ne Jo-Israel e lweny+ kendo Jehova ne onyisi niya: ‘Ibiro tayo Jo-Israel kendo ibiro bedo jatendgi.’”+ 3 Omiyo, jodong Israel duto ne odhi Hebron ir Ruoth Daudi, mi notimo kodgi singruok+ kuno e nyim Jehova. Kae to ne giwiro Daudi mondo obed ruodh Israel.+

4 Daudi ne jahigni 30 ka nobedo ruoth kendo nolocho kuom higni 40.+ 5 Ne olocho e wi Juda kuom higni 7 gi dweche 6 ka en Hebron, to nobedo ruodh Israel duto kod Juda kuom higni 33 ka en Jerusalem.+ 6 Ruoth gi joge nodhi Jerusalem mondo gimonj Jo-Jebus+ ma ne odak kuno. Ne gijaro Daudi niya: “Ok inyal donjo kae! Muofni gi rong’onde kende oromo riembi.” Ne giwacho e chunygi ni, ‘Daudi ok nyal donjo kae.’+ 7 Kata kamano, Daudi ne okawo Sayun, ma tinde iluongo ni Dala Daudi.+ 8 Omiyo, Daudi nowacho kama odiechiengno: “Jo ma dhi kedo gi Jo-Jebus oluw otuchi* mondo gineg ‘rong’onde gi muofni ma ne ojaro Daudi.” Mano e gimomiyo iwachoga ni, “Muofni gi rong’onde ok nodonj e ot ngang’.” 9 Daudi nochako dak ka mochiel motegno kendo ne iluongo kanyo ni Dala Daudi. Nochako gero dalano duto chakre e Pith*+ kodhi iye.+ 10 Kamano Daudi nomedo bedo gi teko+ kendo Jehova Nyasach oganda lweny ne ni kode.+

11 Hiram+ ruodh Turo ne ooro joote ir Daudi. Bende, nokowone yiend sida,+ gi funde bao, gi jogedo ma gero ohinga gi kite, kendo ne gichako gero ne Daudi ot.+ 12 Omiyo, Daudi nong’eyo ni Jehova oseguro pinyruodhe motegno mondo oloch e wi joge Israel+ kendo ne oting’o pinyruodhe+ malo nikech joge Israel.+

13 Ka ne Daudi osea Hebron mobiro Jerusalem, nokendo mon mamoko mang’eny+ mi onyuolo nyithindo mamoko ma yawuoyi gi ma nyiri.+ 14 Magi e nyinge nyithinde ma nonyuolo ka en Jerusalem: Shamua, Shobab, Nathan,+ Solomon,+ 15 Ibhar, Elishua, Nefeg, Jafia, 16 Elishama, Eliada, kod Elifelet.

17 Ka ne Jo-Filistia owinjo ni oseket Daudi mondo obed ruodh Israel,+ giduto ne gidhi manye.+ Ka ne Daudi owinjo wachno, ne odhi pondo ka mochiel motegno.+ 18 Jo-Filistia nobiro mi gipong’o Paw Refaim.+ 19 Daudi nopenjo Jehova+ niya: “Be anyalo dhi kedo gi Jo-Filistiagi? To be ibiro chiwogi e lweta?” Jehova nonyiso Daudi kama: “Dhiyo, nikech abiro chiwo Jo-Filistiago e lweti.”+ 20 Omiyo, Daudi ne odhi Baal-perazim monego Jo-Filistia kuno. Eka nowacho niya: “Jehova osetieko jowasika+ e nyima mana ka pi momwomo ohinga.” Mano e momiyo noluongo kanyo ni Baal-perazim.+ 21 Jo-Filistia nojwang’o sanamugi kanyo mi Daudi gi joge nokawogi.

22 Bang’ kinde, Jo-Filistia noduogo mi gipong’o Paw Refaim kendo.+ 23 Daudi nopenjo Jehova wach, mi nodwoke kama: “Kik ichomri kodgi tir to lwor ka tokgi kae to imonjgi e nyim bungu.* 24 To ka iwinjo tiend jo ma wuotho e wi bunguno, to ikaw okang’ mapiyo, nimar mano biro nyiso ni Jehova osetelo e nyimi mondo okonyi loyo jolweny mag Jo-Filistia.” 25 Omiyo, Daudi notimo mana kaka Jehova nochike kendo ne onego Jo-Filistia+ chakre Geba+ nyaka Gezer.+

6 Daudi nochoko kendo jolweny 30,000 molony duto mag Israel. 2 Eka Daudi nowuok gi joge mi gidhi Baale-juda mondo gikel Sandug Singruok mar Nyasaye.+ Sandugno e ma ji chung’ e nyime ka luongo nying Jehova Nyasach oganda lweny+ mobet e wi jokerubi.+ 3 Ne gigolo Sandug Singruok mar Nyasaye e od Abinadab e got ka giting’e e gari manyien,+ to Uza gi Ahio yawuot Abinadab e ma ne chiko garino.

4 Ne gigolo Sandug Singruok mar Nyasaye e od Abinadab e got ka Ahio otelo e nyim Sandugno. 5 Daudi gi Jo-Israel duto ne mor ahinya e nyim Jehova ka giwerne gi gige thumbe duto molos gi yiend junipa, nyatiti, gige thum ma nigi tonde migwelo,+ oyieke,+ kod nyidwonge.+ 6 To ka ne gichopo kar dino mar Nakon, Uza notero lwete mosiro Sandug Singruok mar Nyasaye mar adier+ nikech dhok ne chiegni goye piny. 7 Gikanyono, mirimb Jehova nobedo mager gi Uza mi nonege+ nikech ne ok omiyo Nyasaye luor.+ Uza ne otho e bath Sandug Singruok mar Nyasaye kanyo. 8 To Daudi iye nowang’ nikech Jehova nobedo gi mirima gi Uza. Omiyo, kanyo osebed kiluongo ni Perez-uza* nyaka sani. 9 Omiyo, Daudi nobedo maluor nikech Jehova+ e odiechieng’no, mopenjore kama: “Ere kaka dakel Sandug Singruok mar Jehova e dalana?”+ 10 Daudi koro ne ok dwar mondo okel Sandug Singruok mar Jehova e Dala Daudi ka ma nodakie.+ Omiyo, nochiko mondo oter Sandugno e od Obed-edom+ Ja-Giti.

11 Sandug Singruok mar Jehova ne obedo e od Obed-edom Ja-Giti kuom dweche adek, kendo Jehova ne guedho Obed-edom kod joode duto.+ 12 Nonyis Daudi niya: “Jehova osebedo ka guedho od Obed-edom kod gige duto nikech Sandug Singruok mar Nyasaye.” Omiyo, Daudi nodhi omo Sandugno e od Obed-edom mokele gi mor e Dala Daudi.+ 13 Ka ne joting’+ Sandug Singruok mar Jehova osegoyo ondamo auchiel, nochiwo misango mar ruath kod nyaruath machwe.

14 Daudi ne miel e nyim Jehova gi tekrene duto korwako efod* mar kitani.+ 15 Daudi gi Jo-Israel duto nokelo Sandug Singruok+ mar Jehova ka gigoyo tung’+ kendo ka giwer gi mor.+ 16 To ka ne Sandug Singruok mar Jehova ochopo e Dala Daudi, Mikal nyar Saulo+ nong’icho gie dirisa moneno ka Ruoth Daudi chikore kendo miel e nyim Jehova. Wachno nomiyo ochayo Daudi e chunye.+ 17 Kamano ne gikelo Sandug Singruok mar Jehova mi gikete e hema ma Daudi noselosone.+ Eka Daudi nochiwo misengni miwang’o+ kod misengni mag kuwe+ e nyim Jehova.+ 18 Ka ne Daudi osetieko chiwo misengnigo, ne oguedho ji e nying Jehova Nyasach oganda lweny. 19 Bende, nopogo Jo-Israel duto ma chwo kod ma mon makate molworore ma nigi bur e diere, gi kek molos gi olemb othith, kod kek mar mzabibu, kae to ji duto ne odok e miechgi.

20 Ka ne Daudi odok guedho joode owuon, Mikal nyar Saulo+ nodhi romone. Nowachone niya: “Mano kaka ruodh Israel ne ochare kawuono kolonyore duk e nyim nyiri ma jotichne mana ka ng’at mofuwo.”+ 21 Eka Daudi nodwoko Mikal kama: “Ne amiel e nyim Jehova ma noyiera kar wuoru kod joode duto mondo abed jatend oganda Jehova.+ Omiyo, pod abiro miel e nyim Jehova, 22 kendo pod abiro bolora moloyo ka adwokora piny. To nyiri ma jotich miwachogo biro miya duong’.” 23 Omiyo, Mikal nyar Saulo+ ne ok onyuol e ngimane duto.

7 Ka ne ruoth osechako dak e ode+ kendo Jehova nosemiye kuwe kuom jowasike duto, 2 ruoth nowacho ne janabi Nathan+ kama: “An adak e ot moger gi yiend sida+ to Sandug Singruok mar Nyasaye madier to nie hema.”+ 3 Nathan nodwoko ruoth niya: “Dhi itim gima chunyi dwaro nikech Jehova ni kodi.”+

4 E otienono, wach Jehova nobiro ne Nathan niya: 5 “Dhi iwach ne jatichna Daudi niya: ‘Jehova owacho kama: “Be inyalo gerona ot mondo adagie?+ 6 Nimar nyaka ne agol Jo-Israel e piny Misri pok adak e ot,+ to asebedo ka adar gi hema koni gi koni.+ 7 Kuom kinde duto ma asebedo ka awuotho gi joga Israel, be asepenjo jatelo moro amora ma ne aketo mondo otagi niya: ‘Marang’o pok igerona ot mar yiend sida?’”’ 8 Koro nyis jatichna Daudi kama: ‘Jehova Nyasach oganda lweny owacho niya: “Ne agoli e kwath+ mi aketi jatelo e wi joga Israel.+ 9 Anabed kodi kuonde duto ma nidhiye+ kendo abiro tieko wasiki duto e nyimi,+ kendo anami ibed gi nying maduong’+ mana kaka jomamoko madongo e piny. 10 Abiro yiero ne joga Israel ka ma ginidagie kendo onge ng’ama nochak ochandgi kanyo. Jo maricho ok nosandgi kendo kaka ne gisandogi chon,+ 11 chakre naketnegi jong’ad bura.+ Abiro miyi kuwe kuom jowasiki duto.+

“‘“Bende, Jehova osenyisi ni, Jehova biro geroni ot.+ 12 To ka chieng’ isetho+ minindo gi kwereni, anaket achiel kuom kothi, mana wuodi iwuon e pinyruoth mi anagur pinyruodhe motegno.+ 13 En e ma noger ot ne nyinga+ kendo anagur pinyruodhe nyaka chieng’.+ 14 Abiro bedo wuon mare kendo enobed wuoda.+ Kotimo marach, to abiro rieye gi del kaka dhano timo.+ 15 Ok nawe here kaka ne aweyo hero Saulo+ ma ne agolo e nyimi. 16 Odi gi pinyruodhi nosik nyaka chieng’ kendo lochni biro gurore nyaka chieng’.”’”+

17 Nathan nonyiso Daudi weche kod fweny duto ma ne onyise.+

18 Eka Ruoth Daudi ne odhi e nyim Jehova mowacho niya: “A Jehova, Wuon Loch Duto, an to an ng’a? To oda en ang’o momiyo isetimona magi duto?+ 19 To pod ikwano mano kaka gima tin, A Jehova, Wuon Loch Duto. Isenyisa ni oda nosik kuom ndalo mang’eny mabiro kendo mano osebedo chik ne ogendni duto, A Ruoth Jehova. 20 En ang’o kendo ma dawach ka in to ing’eya maber,+ A Jehova, Wuon Loch Duto? 21 Isetimo gik madongogi duto kendo isemiyo ang’eyogi nikech wach ma ne ichiko nimar mano e kaka chunyi dwaro.+ 22 A Jehova, Wuon Loch Duto, mano e momiyo adier in Nyasaye maduong’.+ Onge machal kodi+ kendo onge Nyasaye moro amora mak mana in.+ Gik moko duto ma wasewinjo nyiso mano. 23 To ere oganda minyalo pim gi jogi Israel?+ Ne iwarogi nikech gin jogi,+ miloso nying maduong’+ kuom timonegi honni kod gik madongo.+ Ne iriembo ogendni mamoko kod nyisechegi nikech jogi ma ne ireso e piny Misri. 24 Ne iketogi gibed ogandani kuom tienge duto;+ kendo in, A Jehova, isebedo Nyasachgi.+

25 “To koro, A Jehova Nyasaye, tim kaka isewacho ne jatichni kod ode e tienge duto, kendo tim mana kaka isesingo.+ 26 Nyingi oyud duong’ nyaka chieng’+ mondo ji owach ni, ‘Jehova Nyasach oganda lweny e Nyasach Israel,’ kendo od Daudi mondo osik kogurore e nyimi.+ 27 Nimar in, Jehova Nyasach oganda lweny isenyisa ni, ‘Abiro geroni ot.’+ Mano e momiyo jatichni nigi chir mar wuoyo kodi. 28 To koro, A Jehova, Wuon Loch Duto, in e Nyasaye madier kendo wecheni gin adier+ kendo isesingo ne jatichni weche mabeyogi duto. 29 Omiyo, yie iguedh od jatichni kendo obedie kuom tienge duto;+ nikech in, A Jehova, Wuon Loch Duto, isesingo kamano. Mad iguedh od jatichni gi wechegi duto nyaka chieng’.”+

8 Kinde moko bang’e, Daudi noloyo Jo-Filistia+ momayogi+ dala mar Metheg-ama.

2 Daudi noloyo Jo-Moab+ mochikogi mondo ginind piny mopimogi gi tol. Noriedogi e lainde adek; lainde ariyo ne idhi negi to lain achiel ne idhi we.+ Jo-Moab nobedo wasumbni Daudi kendo ne gigolone osuru.+

3 Daudi noloyo Hadadezer wuod Rehob ruodh Zoba+ ka ne odhi mondo obed gi loch kendo e alwora mar Aora Yufrate.+ 4 Daudi ne omako joidh farese 1,700 kod jolweny mamoko 20,000 ma wuotho. Nong’ado leche mag tiende farese duto ma ne ywayo geche lweny moweyo mana 100 kende.+

5 Ka ne Jo-Siria modak Damaski+ obiro konyo Hadadezer ruodh Zoba, Daudi nonego jolweny 22,000 mag Siria.+ 6 Daudi ne oketo kambi mar jolweny e Siria man Damaski, kendo Jo-Siria nobedo wasumbni Daudi ma golone osuru. Jehova nomiyo Daudi olocho kuonde duto ma ne odhiye.+ 7 E wi mano, Daudi nokawo okumbni molworore mag dhahabu kuom jotij Hadadezer mokelogi Jerusalem.+ 8 Ruoth Daudi noyako mula mang’eny miwuoro e dala mar Beta kod dala mar Berotha ma ne gin mier mag Hadadezer.

9 Toi ruodh Hamath+ nowinjo ni Daudi oseloyo jolweny mag Hadadezer.+ 10 Omiyo, Toi nooro Joram wuode mondo odhi omos Daudi kendo opwoye kuom kedo gi Hadadezer moloye (nimar Hadadezer nosebedo ka kedo gi Toi), kendo nokelone gik molos gi fedha, dhahabu, kod mula. 11 Ruoth Daudi nowalo gigo ne Jehova kaachiel gi fedha kod dhahabu ma ne oyako kuom ogendni duto ma ne oseloyo.+ 12 Noyakogi kuom Jo-Siria kod Jo-Moab,+ Jo-Amon, Jo-Filistia,+ Jo-Amalek,+ kod kuom Hadadezer+ wuod Rehob ruodh Zoba. 13 Bende, Daudi noyudo pak ka noa nego Jo-Edom 18,000 e Hoho mar Chumbi.+ 14 Daudi noketo jolweny e piny Edom duto kendo Jo-Edom te nobedo wasumbnige.+ Jehova nomiyo Daudi olocho kuonde duto ma ne odhiye.+

15 Daudi nodhi nyime locho e Israel duto+ kendo nong’ado bura kare+ ne joge duto.+ 16 Joab+ wuod Zeruya ne en jatend jolweny, to Jehoshafat+ wuod Ahilud ne en jandiko. 17 Zadok+ wuod Ahitub kod Ahimelek wuod Abiathar ne gin jodolo, to Seraya ne en jagoro. 18 Benaya+ wuod Jehoyada notelo ne Jo-Kereth kod Jo-Peleth,+ to yawuot Daudi nobedo jotelo madongo.*

9 Daudi nopenjo niya: “Be nitie ng’at ma pod odong’ e od Saulo mondo anyise ng’wono nikech Jonathan?”+ 2 Ne nitie jatich moro e od Saulo ma nyinge Ziba.+ Omiyo, ne otere ir Ruoth Daudi mi openje niya: “In e Ziba?” Ne odwoke kama: “Kamano ruodha.” 3 Ruoth nopenje niya: “Be nitie ng’at ma pod odong’ e od Saulo mondo anyise ng’wono mar Nyasaye?” Ziba nodwoke kama: “Nitie wuod Jonathan moro modong’; tiendene duto ong’ol.”+ 4 Ruoth nopenje niya: “En kanye?” Ziba nodwoke kama: “En Lo-debar e od Makir+ wuod Amiel.”

5 Gikanyono, Daudi nooro joote Lo-debar mondo odhi oome e od Makir wuod Amiel. 6 Ka ne Mefibosheth wuod Jonathan ma wuod Saulo ochopo e nyim Daudi, nogoyo chonge piny mokulorene. Eka Daudi noluonge niya: “Mefibosheth!” to nodwoko kama: “An ka ruodha.” 7 Daudi nowachone niya: “Kik iluor, abiro nyisi ng’wono+ nikech Jonathan wuoru kendo anadwokni lop Saulo kwaru kendo ibiroga chiemo e mesana pile.”+

8 Gikanyono, nokulore e nyime mowacho niya: “An to an ng’a ruodha momiyo idewa kama to achal mana guok motho?”+ 9 Ruoth noluongo Ziba jatij Saulo mochike kama: “Mwandu Saulo duto amiyo nyakwar ruodhi.+ 10 Ibiro purone puothene, in gi yawuoti kod jotiji, kendo ubiro keyone mondo joode duto oyud chiemo. To Mefibosheth nyakwar ruodhi biro chiemo e mesana pile.”+

Ziba ne nigi yawuoyi 15 gi jotich 20.+ 11 Eka Ziba nodwoko ruoth niya: “Abiro timo duto misechika ruodha.” Kamano Mefibosheth ne chiemoga e mesa Daudi mana kaka yawuot ruoth mamoko. 12 Mefibosheth ne nigi wuoyi miluongo ni Mika;+ kendo ji duto ma nodak gi Ziba nobedo jotij Mefibosheth. 13 Mefibosheth nodak Jerusalem nikech koro nochiemoga e mesa ruoth;+ to tiendene duto ne ong’ol.+

10 Bang’ kinde, ruodh Jo-Amon+ notho kendo Hanun wuode nokawo kare.+ 2 Eka Daudi nowacho kama: “Abiro timo maber ne Hanun wuod Nahash mana kaka wuon-gi bende notimona maber.” Omiyo, Daudi nooro jotichne mondo odhi ohoye nikech tho wuon-gi. To ka jotich Daudi nochopo e piny Jo-Amon, 3 jotend Jo-Amon nowacho ne Hanun ruodhgi niya: “Be iparo ni Daudi ooroni jogi mondo omigo wuoru duong’? Donge oorogi mana mondo ginon dalani eka gibi gilowa? 4 Omiyo, Hanun nomako jotich Daudi molielo tikgi konchiel+ kendo ne ong’ado lepgi nus gie siandagi kae to oweyogi gidhi. 5 Ka Daudi nowinjo wachno, nooro ji mondo odhi oromnegi nikech wich-kuot maduong’no, mi ruoth nonyisogi kama: “Beduru Jeriko+ nyaka yie tiku dongi e ka uduogi.”

6 Bang’ kinde, Jo-Amon nofwenyo ni Daudi ojok kodgi. Omiyo, ne giluongo* jolweny 20,000 mag Siria man Beth-rehob+ kod man Zoba.+ Ruodh Maaka+ nobiro gi jolweny 1,000, to jolweny 12,000 nowuok Ishtob.+ 7 Ka ne Daudi owinjo wachno, nooro Joab gi jolweny duto moriwo nyaka jolweny maroteke moloyo.+ 8 Eka jolweny mag Jo-Amon nodhi mochanore e ranga dala, to jolweny mag Siria ma nowuok Zoba kod Rehob, kaachiel gi jolweny mag Ishtob kod Maaka nodong’ e pap kendgi.

9 Ka ne Joab oneno ka jolweny ni e nyime kendo e toke, noyiero jolweny mag Israel molony moloyo mondo gidhi giked gi Jo-Siria.+ 10 Jolweny mamoko to noweyo e lwet Abishai+ owadgi mondo giked gi Jo-Amon.+ 11 Eka nowachonegi kama: “Ka Jo-Siria ohewowa to nyaka ubi ukonywa; to ka Jo-Amon ohewou, to nyaka wabi wakonyu. 12 Nyaka wachung’ motegno kendo wabed jochir+ mondo waked ne ogandawa kod mier mag Nyasachwa, to Jehova biro timo gima oneno ni berne.”+

13 Eka Joab kod joge nodhi mondo giked gi Jo-Siria, to Jo-Siria noringo.+ 14 Ka ne Jo-Amon oneno ni Jo-Siria oseringo, gin bende ne giringo Abishai ma gidonjo e dala. Eka Joab nodok Jerusalem bang’ kedo gi Jo-Amon.

15 Ka ne Jo-Siria oneno ni Jo-Israel oseloyogi, ne gichokore kendo.+ 16 Omiyo, Hadadezer+ noluongo Jo-Siria modak e alwora mar Aora*+ kae to ne gichopo Helam kotelnegi gi Shobak jatend jolweny mag Hadadezer.

17 Ka ne Daudi oyudo wach, nochoko jolweny mag Israel duto mapiyo mi ging’ado Aora Jordan kendo ne gichopo Helam. Jo-Siria bende nochokore ne lweny mondo giked gi Daudi kendo ne gikedo kode.+ 18 To Jo-Siria noringo Jo-Israel kendo Daudi nonego jolweny 700 man gi geche kod jolweny 40,000 ma joidh farese. Kanyo bende e ma nonegoe Shobak jatend jolweny.+ 19 Ka ruodhi duto ma nobiro konyo Hadadezer noneno ni Jo-Israel oseloyogi, ne giloso kuwe kodgi kendo ne giyie bedo jotijgi.+ Jo-Siria koro noluor dhi konyo Jo-Amon.

11 E chak higa,* e kinde ma ruodhi ne thoro dhi e lweny, Daudi nooro Joab gi jotije kod jolweny duto mag Israel mondo gidhi gitiek Jo-Amon. Ne gilworo dala mar Raba+ ka Daudi to ne odong’ Jerusalem.+

2 Chieng’ moro godhiambo, Daudi nowuok e otandane mochako wuotho e tat ode. Noneno dhako moro ka lwokore, to dhakono ne jaber miwuoro. 3 Daudi nooro ng’ato mondo odhi onon wach dhakono mi nodwokone wach kama: “Dhakono en Bathsheba+ nyar Eliam+ ma chi Uria+ Ja-Hiti.”+ 4 Daudi nooro joote mondo odhi oome,+ to ka nosebiro, noterore kode.+ (Mani notimore e kinde ma ne pod opwodhore nikech ne ok oler.*)+ Bang’e, dhakono nodok e ode.

5 Dhakono nomako ich mooro wach ne Daudi kama: “An gi ich.” 6 Eka Daudi nooro wach ne Joab niya: “Nyisna Uria Ja-Hiti mondo obi ane.” Mi Joab notimo kamano. 7 Ka ne Uria obiro, Daudi nopenje wach Joab, gi jolweny, kod kaka lweny ne dhi. 8 Daudi nonyiso Uria niya: “Dhi e odi mondo iyue.”* Ka ne Uria oa kanyo, ruoth noorone mich.* 9 Kata kamano, Uria ne ok odhi e ode, to nonindo gi jotij ruoth mamoko e ranga dala. 10 Nonyis Daudi kama: “Uria ne ok odhi e ode.” Kuom mano, Daudi nopenjo Uria ni, “Donge ia e wuoth mabor? Obet nade ni pok idhi e odi?” 11 Uria nodwoko Daudi niya: “Sandug Singruok+ mar Nyasaye, Jo-Israel kod Jo-Juda odak e hembe, kendo Joab jatenda kod joge duto ni e pap. An e ma dadhi e oda mondo achiem, amethi, kendo anind gi chiega?+ Asingora ni ok anyal timo gima kamano!”

12 Daudi nonyiso Uria kama: “Kare bed kae kawuono to kiny abiro gonyi mondo idhi.” Omiyo, Uria noriyo Jerusalem chieng’no kod kinyne. 13 Daudi nooro wach mondo oluong Uria obi ochiem kendo ometh kode, mi nomiyo Uria omer. Kata kamano, ka nochopo godhiambo, Uria ne ok odhi nindo e ode, to nodhi nindo mana gi jotich ruoth mamoko. 14 Gokinyi, Daudi nondiko ne Joab barua momiyo Uria mondo okowne. 15 Nowacho e barua kama: “Ket Uria nyime ka ma lweny gerie moloyo, to un udog chien eka uweye mondo onege.”+

16 Nikech Joab nong’eyo dalano maber, noketo Uria ka ma nong’eyo ni jolweny mathuondi nitie. 17 Ka ne jodalano owuok mondo giked gi Joab, ne ginego jolweny moko mag Daudi. Uria Ja-Hiti bende ne ginego.+ 18 Bang’ mano, Joab nooro jaote ir Daudi mondo onyise wach lweny. 19 Nochike kama: “Ang’eyo ni ka isetieko nyiso ruoth wach lweny, 20 mirima biro make mopenji niya: ‘Marang’o ne usudo machiegni gi dalano kukedo? Ne ok ung’eyo ni jo ma nie wi ohinga dichielu gi asere? 21 Ng’ama nonego Abimelek+ wuod Jerubesheth?+ Donge mana dhako e ma nodiro nyapong’ kuome gie wi ohinga mar Thebez monege? Ang’o momiyo ne usudo machiegni gi ohinga?’ To nyise kama: ‘Uria Ja-Hiti ma jatichni bende otho.’”

22 Omiyo, jaoteno nodhi monyiso Daudi weche duto ma Joab noorego. 23 Ne onyiso Daudi kama: “Jolweny mag dalano nohewowa gi teko mi gikedo kodwa e pap. Kata kamano, ne wadwokogi nyaka e ranga dala. 24 Kendo joba asere ne bayo aserini gi e wi ohinga mi ginego moko kuom jotij ruoth kendo Uria Ja-Hiti ma jatichni bende ne otho.”+ 25 Gikanyono, Daudi nonyiso jaoteno niya: “Dhi wachne Joab kama: ‘Wachni kik chandi nikech mano e kaka lweny chalga, kawuono ng’ato tho, to kiny ng’at machielo. Dhiuru mana nyime kedo gi dalano nyaka uloye.’+ Bende, ijiw Joab.”

26 Ka ne chi Uria owinjo ni chwore otho, ne oywage. 27 Ka ne kinde ywakne orumo, Daudi nooro ng’ato mondo okele e ode kendo nobedo chi Daudi+ monyuolone wuoyi. Kata kamano, Jehova nosin ahinya gi gima Daudi notimono.+

12 Koro, Jehova nooro Nathan+ ir Daudi+ mondo owachne niya: “Ne nitie ji ariyo ma nodak e dala moro, achiel ne jamwandu to machielo ne odhier. 2 Jamwanduno ne nigi rombe kod dhok mang’eny,+ 3 to ng’at modhierno ne nigi nyarombo achiel kende ma dhako ma nong’iewo.+ Ne opidhega maber korite kaachiel gi yawuote. Nyarombono ne chiemo kode kendo metho e okombene kendo nonindo mana e bade. Norite mana ka nyare. 4 Chieng’ moro, wendo nolimo jamwanduno, to ne ok okawo achiel kuom rombene kata dhoge mondo olosne. Kar mano, nokawo nyarombo ng’at modhiercha motedo ne wendone.”+

5 Ka Daudi nowinjo wachno, mirima nomake mowacho ne Nathan niya: “Akuong’ora gi nying Jehova+ ni ng’at motimo kamano owinjore gi tho. 6 Bende, onego ochul nyarombono nyading’wen+ nimar ne ok okeche.”

7 Eka Nathan nonyiso Daudi niya: “In e ng’atno! Koro ma e gima Jehova Nyasach Israel osewacho: ‘An e ma naketi ruodh Israel+ kendo ne aresi e lwet Saulo.+ 8 Ne aikora miyi od ruodhi,+ mondene duto,+ kendo namiyi dhood Israel gi dhood Juda.+ To ok mago kende, pod naikora timoni mathoth moloyo.+ 9 Ang’o momiyo ichayo wach Jehova kuom timo gima rach e wang’e? Isenego Uria Ja-Hiti gi ligangla,+ mikawo chiege iloko chiegi+ bang’ nege gi ligangla mar Jo-Amon.+ 10 Ligangla ok noa e odi iwuon+ nikech isechaya kuom kawo chi Uria Ja-Hiti miloko chiegi.’ 11 Jehova owacho kama: ‘Akeloni masira koa e odi iwuon.+ Abiro chiwo mondeni ne ng’at machielo+ kineno gi wang’i kendo obiro terore kodgi odiechieng’ alanga.+ 12 Kata obedo ni nitimo richono aling’ling’,+ an to abiro timo mae e nyim Jo-Israel duto odiechieng’ alanga.’”

13 Daudi nowacho ne Nathan niya: “Asetimo richo e wang’ Jehova.”+ Nathan nodwoko Daudi niya: “Jehova bende oseweyoni richoni.+ Koro ok ibi tho.+ 14 Kata kamano, nikech isenyiso Jehova achaya maduong’ kama, nyathi monyuolnino nyaka tho.”

15 Kae to Nathan nodhi e ode.

Kendo Jehova nomiyo tuo ogoyo nyathi ma chi Uria nonyuolo ne Daudi. 16 Daudi nosayo Nyasaye ahinya nikech nyathino. Ne oriyo kech* kendo ne onindo piny e lowo otieno kotieno.+ 17 Omiyo, jodongo ma ne rito ode notemo saye mondo ochung’, to notamore kendo nodagi chiemo kodgi. 18 E odiechieng’ mar abiriyo, nyathino notho to jotichne ne luor dhi nyise wachno. Ne giwacho kama: “Ka koro notamore winjowa ka nyathino ne pod ngima, ere kaka dwanyise ni nyathino osetho? Di po kotimo gima ok ber.”

19 Ka ne Daudi oneno ka jotije kuotho e kindgi, nofwenyo ni nyathino osetho. Omiyo, nopenjogi niya: “Dibed ni nyathino otho?” Ne gidwoke kama: “Ee, otho.” 20 Eka Daudi noa malo, nolwokore, nowichore mo,+ noloko lepe kae to odhi e od+ Jehova mokulore e nyime. Bang’e, nodok e ode mokwayo chiemo, mi nochiemo. 21 Jotichne nopenje kama: “Ang’o momiyo itimori kama? Ka ne nyathi pod ngima ne ok ichiem kendo ne iywak, to ka nyathi osetho, koro ia malo kendo ichiemo?” 22 Nodwokogi niya: “Ne atueyo+ ka ne nyathino pod ngima nikech nawacho e chunya kama: ‘Di po ka Jehova okecha moweyo nyathino obedo mangima.’+ 23 To nikech koro osetho, be nitie gimomiyo onego atue? Be anyalo chiere?+ An e ma abiro dhi ire,+ en to ok onyal duogo ira.”+

24 Eka Daudi nodhi mohoyo Bathsheba+ chiege. Nonindo kode mi bang’e nonyuolone wuoyi ma nochak ni Solomon.*+ Jehova nohero nyathino,+ 25 mi nooro Nathan+ mondo ochake ni Jedidia* nikech Jehova nohere.

26 Joab nodhi nyime kedo gi Raba,+ dala Jo-Amon+ mokawo dalano.*+ 27 Joab nooro wach ne Daudi niya: “Asekedo gi Raba+ mi akawo dala mar pige.* 28 Koro, chok jolweny mamoko duto mondo ibi ikaw dalani. Ka ok kamano, to di po ka an e ma akawe mi ayudo duong’.”*

29 Omiyo, Daudi nochoko jolweny duto mi odhigo kendo nokedo gi Raba mokawe. 30 Nogolo osimbo e wi Malkam. Pek mar osimbono ne en talanta* achiel mar dhahabu kendo ne en gi kite mabeyo ma nengogi tek. Ne osidh ne Daudi osimbono. Bende, noyako gik mang’eny miwuoro+ e dalano.+ 31 Nokawo ji duto ma ne ni e dalano moketogi e tich. Ne gipayo kite, ne gitiyo gi le mag nyinyo, kod gige tich mabith molos gi nyinyo kendo ne giloso matafari. Kamano e kaka Daudi notimo e miech Jo-Amon duto. Gikone, nodok Jerusalem gi jolwenje duto.

13 Absalom wuod Daudi ne nigi nyamin-gi moro ma jaber ahinya miluongo ni Tamar,+ to Amnon+ owadgi nohero Tamar. 2 Chuny Amnon nochande ahinya nikech Tamar nyamin mare. Tamar ne pod en nyako ma silili kendo onge gima Amnon ne nyalo timone. 3 Amnon ne nigi osiepne moro ma rieknige ne ng’eny ahinya. Nyinge ne en Jehonadab+ wuod Shimea+ owadgi Daudi. 4 Ne openjo Amnon kama: “Ang’o momiyo chunyi chandore kama pile ka pile to in wuod ruoth? Nyisa ane.” Amnon nodwoke niya: “Hera nega nikech Tamar ma nyamin+ Absalom owadwa.” 5 Jehonadab nonyise kama: “Dhi inind e otandani kiwuondori ni ituo, to ka wuonu obiro neni to inyise ni, ‘Yie mondo Tamar nyamera obi omiya chiemo. Ang’eyo ni kolosona chiemo mimiyo jotuo ka aneno, to abiro chiemo e lwete.’”

6 Omiyo, Amnon nodhi monindo e otandane kowuondore ni otuo mi ruoth nobiro nene. Eka nokwayo ruoth kama: “Yie mondo Tamar nyamera obi otedna kek ariyo ka aneno mondo acham e lwete.” 7 Omiyo, Daudi nooro wach ne Tamar kama: “Dhi e od owadu Amnon mondo ilosne chiemo.” 8 Tamar nodhi e od Amnon, ka ma nonindoe. Nokawo mogo modwalo kae to otedogo kek ka Amnon neno. 9 Bang’ mano, nokawo kekgo motero ne Amnon, to notamore chiemo mowacho niya: “Gol ji duto oko!” Omiyo, ji duto nowuok.

10 Amnon nowacho ne Tamar niya: “Kelna chiemo kor nindo koni mondo achiem e lweti.” Tamar nokawo kek ma noseloso motero ne Amnon owadgi kor nindo. 11 Sa ma noteronegi, Amnon nomake mowachone niya: “Bi inind koda nyamera.” 12 To Tamar nokwere kama: “Ooyo owadwa, kik ikuod wiya, nikech Jo-Israel ok timga kamano.+ Kik itim tim makweroni.+ 13 Abiro dak nade gi wich-kuot ma kama? Donge in bende ibiro kawi kaka ng’at mofuwo kendo manono e Israel? Koro, dhi iwuo gi ruoth nikech ang’eyo ni ok obi tami.” 14 Notamore winje, to nikech noloye gi teko, nonindo kode githuon mokuodo wiye. 15 Amnon koro nojok kode ahinya moloyo kaka nohere motelo. Amnon nonyise kama: “Chung’ iwuog kae!” 16 To nowachone niya: “Ooyo owadwa, kik iriemba nikech mano biro bedo marach moloyo kata gima isetimona.” To nodagi winje.

17 Noluongo jatichne moro monyise niya: “Gol nyakoni ka, kendo ilor dhoot.” 18 (Noyudo orwako nanga makende* ma nyi ruoth ma silili ne rwakoga) Omiyo, jatij Amnon nogole oko moloro dhoot. 19 Tamar nobuko wiye gi buru+ moyiecho law ma norwako, kendo nodhi koywak komako wiye.

20 Absalom owadgi+ nopenje kama: “Dibed ni ne in gi Amnon owadu? Koro, we ywak nyamera. En owadu.+ Kik iparri ahinya nikech wachni.” Tamar nodhi modak kar kende e od Absalom owadgi. 21 Ka ne Ruoth Daudi owinjo wachno, iye nowang’ matek.+ Kata kamano, Daudi ne ok dwar chwanyo Amnon nimar ne en wuode makayo kendo nohere ahinya. 22 Absalom ne ok onyiso Amnon gimoro amora marach kata maber, to nosin ahinya+ gi Amnon nikech nosekuodo wi Tamar nyamin-gi.+

23 Chieng’ moro ka higni ariyo nosekalo, Absalom noluongo yawuot ruoth duto Baal-hazor machiegni gi Efraim,+ ka ma jotije ma lielone rombe ne nitie.+ 24 Omiyo, Absalom nodhi ir ruoth mowacho niya: “Ilielo rombena. Koro, akwayi ni wadhi kodi kaachiel gi jotichni duto.” 25 To ruoth nodwoko Absalom niya: “Ooyo wuoda, ok wanyal biro waduto. Di po ka waketoni ting’ mapek.” Kata obedo ni notemo saye, nodagi mi noguedhe aguedha. 26 Absalom nowachone kama: “Ka ok ibi, to kare we wadhi gi Amnon owadwa.”+ Ruoth nodwoke niya: “Ang’o momiyo idwaro ni udhi kode?” 27 To Absalom nosaye moyie ne Amnon kod yawuot ruoth mamoko duto mondo odhi kode.

28 Eka Absalom nochiko jotichne niya: “Sa ma Amnon osemer, abiro nyisou ni unege to kik uluor. Donge an e ma asechikou? Beduru motegno kendo ma jochir.” 29 Omiyo, jotij Absalom nonego Amnon mana kaka nosechikogi. Eka yawuot ruoth mamoko duto noidho nyumbugi* mi giringo. 30 Ka ne pod gin e yo, wach nochopo ne Daudi niya: “Absalom onego yawuot ruoth duto, kendo onge kata achiel modong’.” 31 Ka ne ruoth owinjo wachno, nochung’ moyiecho lepe kae to onindo e lowo, kendo jotichne duto ma nochung’ bute kanyo bende noyiecho lepgi.

32 Kata kamano, Jehonadab+ wuod Shimea+ owadgi Daudi nowacho niya: “Ruoth, kik ipar ni oneg yawuoti duto, Amnon kende e ma otho.+ Absalom e ma nochiko mondo onege, nimar osebedo kochano timo kamano+ chakre chieng’ ma Amnon nokuodoe wi Tamar+ nyamin-gi.+ 33 Koro, kik chunyi chandre kiparo ni yawuoti duto otho, Amnon kende e ma otho.”

34 Absalom to noringo.+ Bang’e, jarit moro nong’icho moneno ji mang’eny ka lor ka giluwo yo manie tiend got. 35 Eka Jehonadab+ nonyiso ruoth kama: “Yawuoti oseduogo mana kaka ne anyisi.” 36 Ka notieko atieka wuoyo ni i, yawuot ruoth nochopo ka giywak matek, to ruoth gi jotichne bende noywak malit. 37 Absalom noringo modhi ir Talmai+ wuod Amihud ruodh Geshur. Daudi noywago wuode kuom ndalo mang’eny. 38 Absalom noringo modhi Geshur+ kendo nodak kuno kuom higni adek.

39 Bang’e, ruoth Daudi nogombo neno Absalom nimar chunye koro ne osea kuom wach tho Amnon.

14 Koro Joab wuod Zeruya+ nofwenyo ni Daudi ne gombo neno Absalom.+ 2 Omiyo, Joab nooro wach Tekoa+ mondo okelne dhako moro mariek. Nonyiso dhakono kama: “Rwakri gi lep ywak mondo itimri ka ng’at ma ywago ng’at motho kendo kik iwirri mo.+ Timri ka dhako mosebedo ka ywago ng’at motho kuom ndalo mang’eny. 3 Kae to dhi inyis ruoth wechegi.” Eka Joab nonyise wechego.*

4 Nya Tekoano ne odhi ir ruoth mokulore e nyime kowacho kama: “Ruoth konya!” 5 Ruoth nopenje ni, “Ang’o marach?” Dhakono nodwoke niya: “An mana chi liel; nimar chwora osetho. 6 Ne an gi yawuoyi ariyo to chieng’ moro ka ne gigore e pap moro ne onego wadgi nikech onge ng’ama ne nyalo thegogi. 7 To koro joodwa duto olokore koda kendo giwachona ni, ‘Kel wuodi ma nonego nyawadgicha mondo wanege,+ kata ka obedo ni wadhi tieko jacham mwandu wuon-gi.’ Gidhi simo mach* ma adong’go* kendo nying’ chwora dhi lal nono.”

8 Eka ruoth nonyiso dhakono niya: “Dog adoga dala, abiro golo chik e wi wachno.” 9 Nya Tekoano nonyiso ruoth kama: “Yaye ruodha, ketho mondo obed kuoma kendo kuom od wuora, to in kod pinyruodhi ubed maonge ketho.” 10 Ruoth nodwoke niya: “Ka ng’ato ang’ata openji wachni kendo, kele ira to ok obi chandi kendo.” 11 To nowacho ne ruoth kama: “Mad Ruoth opar Jehova Nyasache mondo jachul kuor+ kik kel masira kendo oneg wuoda.” Ruoth nodwoke kama: “Akuong’ora gi nying Jehova+ ni onge yie wi wuodi kata achiel ma biro lwar piny.” 12 Dhakono nokwaye niya: “Yie amedie wach moro achiel.” Ruoth nodwoke ni, “Wach awacha!”

13 Dhakono nonyise niya: “Kare ang’o momiyo idwa timo gima kama ne oganda Nyasaye?+ Ka ma e kaka ruoth ng’ado bura, to ruoth miyo bura loye en owuon, nikech odagi omo wuode ma noriembo.+ 14 Wabiro tho mi wabed ka pi mopukore e lowo ma ok nyal tuom kendo. Kata kamano, Nyasaye ok mor ka oneg ng’ato, to onono gik ma nyalo miyo ng’at ma ne oseriemb odwog ire kendo. 15 Abiro mondo awuo kodi e wi wachni nikech ji miya luoro. Omiyo, nang’ado ni abi awuo gi ruodha, di po ka owinjo kwayona. 16 Di po ka ruoth owinja mi oresa e lwet ng’at ma dwaro tieka gi wuoda achiel modong’ kuom mwandu ma Nyasaye nomiyowa.+ 17 Eka nawacho niya: ‘Ang’eyo ni chik ruoth e ma nyalo konya,’ nikech ruoth chalo gi malaika mar Nyasaye kendo ong’eyo pogo gima ber kod gima rach. Mad Jehova Nyasachi bed kodi.”

18 Koro ruoth nowacho ne dhakono niya: “Kik ipanda wach moro amora ma adwaro penji.” Ne odwoke kama: “Penj apenja ruodha.” 19 Ruoth nopenje niya: “Dibed ni Joab e ma oori ira?”+ Dhakono nodwoke kama: “Akuong’ora gi nyingi ni en mana kaka isewachono ruodha, nimar Joab jatichni e ma ne ochika moketo wechegi duto e dhoga. 20 Joab e ma osetimo kama mondo gik mosetimore olokre, to ruodha riek ka malaika mar Nyasaye kendo ong’eyo weche duto ma timore e pinywa.”

21 Eka ruoth nonyiso Joab niya: “Onge wach, abiro timo kamano.+ Dhi iom Absalom mondo ikele kae.”+ 22 Eka Joab nokulore nyaka e lowo mopako ruoth kowacho niya: “A ruodha, kawuono ang’eyo ni kare iyie koda nikech isetimo kaka ne akwayi.” 23 Joab nodhi Geshur+ mokelo Absalom Jerusalem. 24 Kata kamano, ruoth nowacho niya: “We odhi mana e ode to kik obi ira.” Omiyo, Absalom ne odhi e ode kendo ne ok odhi e nyim ruoth.

25 Koro e Israel duto, ne onge ng’at ma ipako maloyo Absalom nikech ne ojachia miwuoro. Ne oonge gi mbala moro amora chakre e tiende nyaka e wiye. 26 Ne nyaka oliel yie wiye higa ka higa nikech yie wiye ne bedoga mapek ahinya. To ka ne opim yie wiyego, pekgi ne romo shekel 200* kaluwore gi rapim mar od ruoth. 27 Absalom ne nigi yawuoyi adek+ gi nyako achiel miluongo ni Tamar. Nyakono ne jaber ahinya.

28 Absalom ne odak Jerusalem kuom higni ariyo mangima, to ne ok odhi e nyim ruoth.+ 29 Omiyo, Absalom noluongo Joab mondo oore ir ruoth, to Joab ne odagi biro. Ne oluonge kendo, to ne otamore biro. 30 Gikone, ne ochiko jotichne konyisogi kama: “Joab nigi puoth shairi e bath puotha. Dhi uwang’ puodhono.” Omiyo, jotij Absalom ne odhi mowang’o puodhono. 31 Eka Joab nodhi ir Absalom mopenje niya: “Marang’o jotichni nowang’o puotha?” 32 Absalom nodwoko Joab kama: “Ne aluongi mondo idhi ipenjna ruoth kama: ‘Ang’o momiyo ne ioma Geshur?+ Dobedona maber moloyo ka adong’ kuno. Koro yiena abi iri kendo kiyudo ketho moro amora kuoma to inega.’”

33 Omiyo, Joab nodhi ir ruoth monyise wachno. Eka noluongo Absalom, mi nobiro ire mokulore nyaka e lowo e nyim ruoth. Kae to ruoth nonyodho Absalom.+

15 Bang’ magi duto, Absalom nobedo gi gari, farese, kod ji 50 ma ringo e nyime.+ 2 Absalom ne chiewoga gokinyi mang’ich kae to ochung’ e bath yo madhi e ranga dala.+ Ka ng’ato ne nigi wach moro modwaro ni ruoth okonyee,+ Absalom ne luongo ng’atno to openje niya: “Iwuok e dala mane?” Ng’atno ne nyise ni: “Jatichni a e achiel kuom dhoudi mag Israel.” 3 Absalom ne nyiso ng’atno kama: “Aneno ka adier onego okonyi, en mana ni onge ng’at ma ruoth oketo ma dikonyi.” 4 Absalom ne wacho niya: “Ma dine keta jang’ad bura e pinyni! Dang’ado bura makare ne ng’ato ang’ata man gi ywak!”

5 Ka ng’ato nobiro ire mokulorene, Absalom ne rieyo lwete kae to omose kendo onyodhe.+ 6 Ne otimo kamano ne Jo-Israel duto ma ne biro ir ruoth mondo okonygi e wach moro. Kamano e kaka Absalom ne ywayo chuny Jo-Israel.+

7 Bang’ higni ang’wen,* Absalom nokwayo ruoth kama: “Yiena adhi Hebron+ mondo atim kaka ne asingora ne Jehova. 8 Nimar ka ne an Geshur+ e piny Siria ne asingora+ kama: ‘Ka Jehova okonya mi aduogo Jerusalem, to abiro golo misango* ne Jehova.’” 9 Omiyo, ruoth nonyise kama: “Dhi gi kuwe.” Eka nowuok mi o dhi Hebron.

10 Absalom nooro joote aling’ ling’ e dhout Israel duto kowachonegi niya: “Ka uwinjo tung’, to ukog gi dwol maduong’ ni, ‘Absalom osebedo ruoth e Hebron!’”+ 11 Koro, Absalom ne ogwelo ji 200 moa Jerusalem mondo odhi kode, to ne gikia gima timore. 12 Bende, ka ne Absalom odhi golo misango, ne ooro wach e dala mar Gilo+ mondo oluongne Ahithofel+ Ja-Gilo, jang’ad ne Daudi rieko.+ Kamano jo ma nong’anyo ka dok ne Absalom ne medore ameda.+

13 Bang’ kinde, ng’ato ne odhi monyiso Daudi kama: “Jo-Israel osedok ne Absalom.” 14 Gikanyono, Daudi nonyiso jotichne duto niya: “Wuoguru piyo wadhi,+ nono to Absalom biro negowa waduto! Wareturu, di po ka ojukowa mi okelo masira e dalani kuom negowa waduto!”+ 15 Ne gidwoko ruoth kama: “Ruoth, waikore timo gimoro amora miwacho.”+ 16 Omiyo, ruoth nowuok gi joode, to monde apar+ noweyo mondo orit dalane. 17 Kamano, ruoth nowuok ka joge luwe, kae to ne gichung’ Beth-merhak.

18 Jotichne duto ma ne luwe gi Jo-Kereth duto, gi Jo-Peleth+ duto, kod Jo-Giti+ 600 ma ne oluwe koa Gath,+ ne kalo e nyim ruoth ka onono kwan-gi. 19 Ruoth nowacho ne Itai+ Ja-Giti niya: “Be ochuno ni idhi kodwa? Dog ir ruoth manyien nimar in jadak ma noringo pinygi. 20 Eka nyocha ibiro, ere kaka dawuoth kodi kamoro amora, to an akiya ka ma adhiye? Dog gi oweteni kendo Jehova mondo onyisu ng’wono kinde duto!”+ 21 To Itai nodwoko ruoth kama: “Akuong’ora gi nying Jehova kendo gi nying ruoth ni abiro dhi gi ruodha kamoro amora modhiye, tek kata yot, obed tho kata ngima!”+ 22 Eka Daudi nonyiso Itai+ niya: “Kal idhi loka.” Omiyo, Itai Ja-Giti nodhi loka kaachiel gi joge duto moriwo nyaka nyithindo.

23 Jo ma nodak e pinyno duto ne ywak matek ka ji kadho, kendo ruoth ne ochung’ but Hoho mar Kidron;+ ji duto ma ne ni kode ne kadho ka gichomo yo ma dhi e thim. 24 Zadok+ bende ne ni kanyo gi Jo-Lawi+ duto ma noting’o sandug singruok mar Nyasaye.+ Ne giketo Sandugno piny to Abiathar+ bende ne ni kanyo sa ma ji duto ne kadho koa e dalano. 25 Kata kamano, ruoth nowacho ne Zadok niya: “Duok Sandug Singruok mar Nyasaye e dala.+ Ka po ni Jehova okecha, to adier obiro duoka mi ane sandugno kendo.+ 26 To koneno ni ok awinjora e nyime, to we otim atima kaka oneno ni berne.” 27 Eka ruoth nonyiso Zadok jadolo kama: “Donge in janen?+ Kaw Ahimaaz wuodi kaachiel gi Abiathar kod Jonathan+ wuode mondo udog dala. 28 To an abiro bet ka ma iyorogo aora kae nyaka chop ayud wach moa kuomu.”+ 29 Omiyo, Zadok gi Abiathar notero Sandug Singruok mar Nyasaye Jerusalem mi gibet kuno.

30 Daudi ne idho Got Zeituni+ koywak. Ne oumo wiye kendo ne owuotho gi tiende nono. Ji duto ma ne ni kode bende ne oumo wigi ka ywak. 31 Ne onyis Daudi kama: “Ahithofel bende osedok+ ne Absalom.”+ Eka Daudi nowacho niya: “A Jehova,+ lok rieko mar Ahithofel mondo obed fuwo lilo!”+

32 Ka ne Daudi ochopo e wi got ka ma ji ne lamoe Nyasaye, Hushai+ Ja-Arki+ ne oromone ka kandhone oyiech kendo wiye otimo buru. 33 Kata kamano, Daudi nowachone niya: “Ka adhi kodi, to idhi medona ting’. 34 To ka idok Jerusalem minyiso Absalom ni, ‘A ruoth, an jatichni. Yande an jatich wuoru, to koro sani an jatichni,’+ di po ka ikonya e ketho rieko mar Ahithofel.+ 35 Donge Zadok kod Abiathar jodolo ni kuno? Nyaka inyisgi weche duto ma iwinjo e od ruoth.+ 36 Ahimaaz+ wuod Zadok kod Jonathan+ wuod Abiathar bende ni kuno kendo ibiroga orogi mondo gikelna weche duto miwinjo.” 37 Kamano, Hushai osiep Daudi+ nodok Jerusalem sa ma Absalom bende ne donjo kuno.

16 Ka Daudi noselor matin koa e wi got,+ Ziba+ ma jatij Mefibosheth+ ne oromone ka en gi punde ariyo moting’o makate 200, kek 100 mag mzabibu, kek 100 molos gi olembe mag ndalo oro,* kod divai agulu maduong’.+ 2 Eka ruoth nopenjo Ziba niya: “Ang’o momiyo ikelo gigi?” Ziba nodwoke kama: “Pundegi akelo ne jood ruoth mondo oidhi. Makate gi olembegi gin mag jotichni, divai to akelo ne jo ma tekogi orumo e thim.”+ 3 Ruoth nomedo penje niya: “To wuod* ruodhi ni kanye?”+ Eka Ziba nodwoke kama: “Odong’ Jerusalem kowacho ni, ‘Kawuononi, Jo-Israel biro duokona loch wuora.’”+ 4 Ruoth nowacho ne Ziba niya: “Mwandu duto mag Mefibosheth gin magi.”+ Ziba nodwoke kama: “Erokamano ruodha. Mad adhi nyime yudo ng’wono e wang’i.”+

5 Ka ne Ruoth Daudi ochopo Bahurim, ng’at moro ma nyinge Shimei+ wuod Gera ja dhood Saulo nobiro ka yanye.+ 6 Ne obayo Daudi gi joge duto gi kite moriwo nyaka jotichne kaachiel gi jo ma thuondi ma ne olwore koni gi koni. 7 Shimei ne yanye kama: “Ai ka! Dhi kucha! In ng’at ma nono ma janekni! 8 Jehova osechulo kuor nikech remb joka Saulo ma ne ichuero mikawo lochne, kendo koro Jehova keto loch e lwet Absalom wuodi. Masira koro oseyudi nikech in janek!”+

9 Abishai wuod Zeruya+ nonyiso ruoth niya: “Marang’o iweyo guok mothoni+ yanyi kama?+ Yiena mondo adhi ang’ad wiye oko.”+ 10 To ruoth nodwoke kama: “Ang’o ma chandou koda un yawuot Zeruya?+ Weyeuru oyanya+ nikech Jehova osenyise+ ni, ‘Yany Daudi!’ Omiyo, ng’ano ma nyalo penjo ni, ‘Ang’o momiyo itimo kama?’” 11 Eka Daudi nonyiso Abishai kod jotichne duto niya: “Ka koro wuoda ma anyuolo e ma dwaro nega,+ to nade Ja-Benjamin!+ Weyeuru oyanya nikech Jehova e ma osenyise ni otim kamano! 12 Di po ka Jehova oneno chandruokna+ mi Jehova otimona maber kar ayany moyanyago kawuononi.”+ 13 Daudi gi joge nodhi nyime gi wuoth to Shimei ne wuotho e bath got ka ma omanyore kodgi koyanyogi,+ kobayogi gi kite kendo kokironegi buru.

14 Gikone, ruoth gi joge duto nochopo ka ma ne gidhiye ka giol ahinya kendo ne giyueyo.

15 Gie kindeno, Absalom gi Jo-Israel duto nochopo Jerusalem, to Ahithofel+ bende ne ni kode. 16 Ka ne Hushai+ Ja-Arki+ ma osiep Daudi odhi ir Absalom, nowachone kama: “Ruoth odag aming’a!+ Ruoth odag aming’a!” 17 Absalom nopenjo Hushai niya: “Ma e kaka inyiso ni ihero osiepni? Ang’o momiyo ne ok idhi kode?” 18 Omiyo, Hushai nodwoko Absalom kama: “Ooyo, ng’at ma Jehova, kod oganda man kae, gi Jo-Israel duto oyiero e ma an kore kendo anasik kode. 19 To bende ere ng’at monego atine? Donge en mana wuod ruoth? Abiro tiyoni mana kaka ne atiyo ne wuonu.”+

20 Bang’e, Absalom nowacho ne Ahithofel niya: “Ng’adnae rieko.+ Ang’o monego watim?” 21 Ahithofel nodwoko Absalom kama: “Dhi iterri gi mond wuoru+ ma ne oweyo mondo oritne dala.+ Eka Jo-Israel duto biro ng’eyo ni isejogo wuoru chuth kendo jogo ma riwi lwedo biro bedo gi chir.” 22 Omiyo, ne giloso ne Absalom hema e wi ot malo,+ kendo Absalom ne oterore gi mond wuon-gi+ e wang’ Jo-Israel duto.+

23 E kindego, rieko ma Ahithofel+ ne ng’ado ne ikawo kaka wach moa kuom Nyasaye. Kamano bende e kaka Daudi gi Absalom ne neno rieko ma Ahithofel ne ng’adonegi.

17 Ahithofel nokwayo Absalom kama: “Yiena ayier jolweny 12,000 mondo alawgo Daudi kawuono gotieno. 2 Abiro juke ka ool kendo ka chunye onyosore.+ Abiro miye luoro kendo jo ma ni kode duto biro ringo, to ruoth kende e ma abiro nego.+ 3 Eka anadwok ji duto iri. Gima abiro timo ne ng’at ma wamanyoni e ma biro miyo ji duto oduog iri, to mano e ma biro miyo ji duto obed gi kuwe. 4 To parono ne ber ne Absalom kod jodongo duto mag Israel.

5 Kata kamano, Absalom nowacho niya: “Luongnauru Hushai+ Ja-Arki mondo wawinj ane paro ma en-go.” 6 Omiyo, Hushai nobiro ir Absalom mi Absalom nonyise rieko ma Ahithofel noseng’adone. Eka nopenje kama: “Be onego watim gima owachono? Ka ok kamano, to wachnwa ane.” 7 Hushai nodwoko Absalom kama: “Rieko ma Ahithofel ong’ado e wachni ok ber.”+

8 Hushai nomedo nyise kama: “Ing’eyo ni wuoru kod joge gin jolweny ma thuondi+ kendo giger ka ondiek* ma olalo nyathine e pap.+ To bende wuoru en jalweny molony+ kendo ok obi nindo ka ma joge onindoe. 9 Sani ang’eyo ni koro opondo e bur moro kata kamoro machielo,+ to ka en e ma okwongo monjowa, jo ma owinjo nowach niya: ‘Oselo jo ma luwo Absalom!’ 10 Eka kata mana ng’at ma jachir kendo mager ka sibuor+ nobed maluor nikech Jo-Israel duto ong’eyo ni wuoru en thuon+ kendo joge gin jochir. 11 An ma e paro ma an-go: Chok Jo-Israel duto chakre Dan nyaka Beer-sheba,+ ji mang’eny ka kuoyo manie dho nam,+ kae to in iwuon itelnegi e lweny. 12 Wabiro juke kamoro amora ma entie mi wamok kuome mana ka tho momoko e lum kendo onge kata ng’at achiel kuom joge ma biro tony. 13 Koringo odonjo e dala moro, Jo-Israel duto biro dhi kuno gi tonde mi giywa dalano nyaka e pap kendo onge kata kidi achiel ma biro dong’ e dalano.”

14 Absalom gi Jo-Israel duto nowacho kama: “Rieko ma Hushai Ja-Arki ong’ado ber+ moloyo mar Ahithofel!” Mano notimore nikech Jehova noseng’ado ni rieko mar Ahithofel obed fuwo+ mondo Jehova okel ne Absalom masira.+

15 Bang’e, Hushai nonyiso Zadok gi Abiathar+ jodolo niya: “Ahithofel ne ong’ado ne Absalom kod jodong Israel rieko kama, to an to ne anyise kama. 16 Koro or ne Daudi wach mapiyo kinyise niya: ‘Kik inind ka ma iyorogo aora manie thim, to idh lokacha, nono to idhi negi gi jogi duto.’”+

17 Noyudo Jonathan+ gi Ahimaaz+ ni En-rogel.+ Omiyo, noor nyako moro ma jatich mondo oternegi wach monego gidhi ginyis Ruoth Daudi, nimar ne giluor ni di po ka ng’ato onenogi ka gidonjo e dala. 18 Kata kamano, rawera moro nonenogi monyiso Absalom. Omiyo, ji ariyogo noringo nyaka Bahurim+ e dala ng’at moro ma ne nigi soko e laru. Ne gidonjo e i sokono, 19 kendo chi ng’atno nomoyo cham e dho sokono, to onge ng’at ma nofwenyo mano. 20 Jotij Absalom nobiro e od dhakono mi gipenje niya: “Ahimaaz gi Jonathan ni kanye?” Dhako nodwokogi kama: “Ne gikalo ka gichomo yo aora.”+ Eka jogo nomanyogi to ne ok giyudogi, mi ne gidok Jerusalem.

21 Ka jogo nosedhi, Ahimaaz gi Jonathan nowuok e soko mi gitero ne Ruoth Daudi wach. Ne ginyise niya: “A malo mondo ing’ad aora mapiyo, nimar Ahithofel oseng’ado ne Absalom rieko mar tieki.”+ 22 Gikanyono, Daudi gi joge duto nong’ado Aora Jordan. Piny noru ka giduto giseng’ado aorano.

23 Ka ne Ahithofel oneno ni ok oti gi rieko ma nong’ado, noidho pundane modok thurgi.+ Bang’ chiko joode e weche moko,+ nodhi modere+ kendo noyike ka ma noyikie kwerene.

24 Gie kindeno, Daudi nochopo Mahanaim+ to Absalom gi Jo-Israel duto nong’ado loka Jordan. 25 Absalom noketo Amasa+ jatend jolweny kar Joab.+ Amasa ne en wuod Ja-Israel ma nyinge Ithra ma nonindo* gi Abigail+ nyar Nahash ma nyamin Zeruya min Joab. 26 Absalom gi Jo-Israel nogo kambi e piny Gilead.+

27 Ka ne Daudi ochopo Mahanaim, Shobi wuod Nahash Ja-Amon ma wuok Raba,+ Makir+ wuod Amiel ma wuok Lo-debar, kod Barzilai+ Ja-Gilead ma wuok Rogelim 28 nokelo otendni, besende, agulni, ngano, shairi, mogo, cham mobul, oganda, ng’or, cham moyoki, 29 mor kich, mor dhiang’, rombe, kod mo mabuo. Ne gitero gigo mondo Daudi gi joge ocham.+ Ne giwacho kama: “Wang’eyo ni gidenyo kendo riyo omakogi e thim.”+

18 Daudi nokwano joge mi oketo jotelo e wi jolweny aluf achiel-achiel, to moko noketo e wi jolweny mia-mia.+ 2 Nopogogi e grube adek. Grup achiel noketo e lwet Joab,+ grup machielo e lwet owadgi Joab miluongo ni Abishai+ ma wuod Zeruya,+ to grup mar adek noketo e lwet Itai+ Ja-Giti. Eka ruoth nonyisogi ni, “An bende abiro dhi kodu.” 3 To ne gidwoke kama: “Ooyo, in kik idhi kodwa,+ nimar ngimani rom gi mar ji 10,000.+ Wan kata ka waringo, ok gibi dewo; bende kata ka nus mar jolwenjwa otho, pod ok gibi dewo. Omiyo, in inyalo konyowa akonya ka in e dala kae.” 4 Ruoth nonyisogi kama: “Abiro timo gima uneno ni ber.” Omiyo, ruoth nodhi mochung’ e dho rangach, to joge duto nodhi ka gichanore ji mia-mia, kod ji aluf-aluf. 5 Eka ruoth nochiko Joab, Abishai, kod Itai kama: “Akwayou ni kik uhiny Absalom.”+ Ji duto nowinjo ka ruoth chiko jotend lweny ni kik gihiny Absalom.

6 Eka jolweny mag Daudi nowuok e dala mi gidhi kedo gi Jo-Israel e bungu mar Efraim.+ 7 Jolweny mag Daudi+ noloyo Jo-Israel+ mi ginego ji 20,000 e odiechiengno. 8 Lweny nolandore e pinyno duto kendo jo ma notho e bungu ne ng’eny moloyo jo ma jolweny nonego.

9 Absalom nopo koromo gi jolweny mag Daudi. Noidho nyumbu* mi nyumbuno noringo mokadho e bwo yath ma bedene ogar. Wi Absalom nomoko e bad yath moliero e kor yamo, nyumbu to nodhi adhiya. 10 Eka ng’ato nonene mowacho ne Joab+ niya: “Aneno Absalom koliero e yath.” 11 Joab nopenjo ng’atno niya: “Ka adier ne inene, marang’o ne ok igoye mondo olwar piny gi kanyo? Dine amiyi fedha apar kod msip.” 12 Nodwoko Joab niya: “Kata dine miya fedha 1,000 ok dater lweta kuom wuod ruoth, nimar ne wawinjo maber ka ruoth nyisi kod Abishai gi Itai ni ‘Kik uhiny Absalom.’+ 13 Ka dine ok awinjo chik ruoth mi anege, ruoth dong’eyo wachno, to in ok diresa.” 14 Joab nonyise niya: “Ikethona seche!” Omiyo, nodhi koting’o aserni adek kendo nochwoyogo chuny Absalom ka pod oliero kongima e wi yath maduong’no. 15 Eka ji apar ma noting’o ne Joab gige lweny nobiro mogoyo Absalom nyaka otho.+ 16 Joab nogoyo tung’ moluongo jolweny ma ne lawo Jo-Israel mondo giwe lawogi. 17 Ne gikawo ringre Absalom mi gibolo e bur moro matut e bungu kendo ne gibolo kite kuome mobedo pith mang’ongo.+ Kae to Jo-Israel duto nodok e miechgi.

18 Ka ne Absalom pod ngima, nochungo siro moro e Hoho mar Ruoth+ kowacho niya: “Aonge wuoyi ma biro ting’o nyinga malo.”+ Omiyo, noluongo sirono gi nyinge owuon kendo pod iluonge ni Rapar mar Absalom nyaka kawuononi.

19 Ahimaaz+ wuod Zadok nowacho niya: “We aring ater ne ruoth wach nikech Jehova osetimone maber kuom rese e lwet wasike.”+ 20 To Joab nodwoko niya: “Kawuono ok ibi tero wach ne ruoth. Inyalo timo kamano chieng’ machielo nikech kawuono wuod ruoth owuon e ma otho.”+ 21 Eka Joab nowacho ne Ja-Kush moro+ niya: “Dhi inyis ruoth gima iseneno.” Ja-Kushno nokulore ne Joab kae to owuok gi ng’wech. 22 Ahimaaz wuod Zadok nokwayo Joab kendo niya: “Akwayi, yiena aring aluw Ja-Kushno.” Kata kamano, Joab nopenje niya: “Nang’o idwa dhi to onge wach mitero?” 23 To nomedo saye niya: “Yiena ayiea adhi.” Omiyo, Joab noyiene modhi. Ahimaaz noringo koluwo yo Aora Jordan mokalo Ja-Kush.

24 Noyudo Daudi obet e kind dho rangeye ariyo mag dala.+ To jarit+ noidho malo e ohinga manie rangach. Nong’icho moneno ng’ato ka biro gi ng’wech. 25 Omiyo, jarit nokok gi dwol maduong’ monyiso ruoth. Ruoth nodwoke niya: “Ka en kende, to okelo wach moro.” Ka jalno ne chiegni chopo, 26 jarito noneno ng’at machielo ka biro gi ng’wech. Jaritono nokok ne jarit rangach niya: “Ng’at machielo bende biro!” Ruoth nowacho niya: “Ng’atno bende kelo wach moro.” 27 Jaritno nowacho niya: “Ng’at motelo ringo mana ka Ahimaaz+ wuod Zadok.” Ruoth nowacho, “Mano ok ng’at marach, oting’o wach maber.” 28 Ahimaaz nokok ne ruoth niya: “Weche beyo!” Eka nopodho piny auma e nyim ruoth mowachone niya: “Opak Jehova Nyasachi mosegolo jo ma nong’anyoni ruodha!”+

29 Kata kamano, ruoth nopenje kama: “Absalom ni kare koso?” Ahimaaz nodwoke niya: “Seche ma Joab ne ora kod jatich ruoth moro, ne awinjo koko moro to ne ok ang’eyo ni en mar ang’o.”+ 30 Omiyo, ruoth nonyise niya: “Kadh ichung’ kacha,” mi notimo kamano.

31 Eka Ja-Kush nochopo+ mowacho niya: “Ruoth, akeloni wach maber. Kawuono Jehova oseng’ado bura kare kuom golo jogo duto ma nong’anyoni.”+ 32 To ruoth nopenjo Ja-Kush niya: “Absalom ni kare koso?” Ja-Kush nodwoke kama: “Mad wasiki kod jogo duto ma ng’anyoni obed mana ka wuodino!”+

33 Wachno nochando chuny ruoth modhi e wi tat ot man but rangach kendo noywak kowuotho koni gi koni e wi tado niya: “Yaye, Absalom wuoda, wuoda! Absalom wuoda, mad an e ma ne atho ma kari, Absalom wuoda, wuoda!”+

19 Ne onyis Joab niya: “Ruoth ywak malit kendo okuyo nikech Absalom.”+ 2 Omiyo, ji duto nokuyo e odiechieng’no nikech ne giwinjo ni ruoth ywak malit nikech wuode. 3 Chieng’no jolweny noduogo e dala ka giling’+ mana ka jo ma wigi okuot nikech ologi e lweny. 4 Ruoth noumo wang’e kendo nodhi nyime ywak gi dwol maduong’ niya: “Yaye, Absalom wuoda! Absalom wuoda, yaye wuoda!”+

5 Joab nodhi ir ruoth e ode mowachone kama: “Kawuono to ikuodo wi jotichni duto mosereso ngimani kaachiel gi ngima yawuoti,+ gi nyingi,+ kod mondeni duto.+ 6 Ihero jo ma osin kodi, to isin gi jo ma oheri. Isemiyo ji oneno ayanga kawuono ni jolweny gi jotendgi gin jo ma nono e wang’i, nimar an gadier ni ka dabed ni Absalom ngima kawuono, to wan watho, dobedoni mana maber. 7 Koro a malo idhi iwuo gi jotichni kendo ijiwgi nikech akuong’ora gi nying Jehova ni ka ok itimo kamano, to onge ng’at ma biro dong’ kori otienoni. To mano biro bedoni masira maduong’ moloyo moro amora ma iseneno chakre tinni.” 8 Omiyo, ruoth nowuok mobet e dho rangach, mi nonyis ji duto niya: “Ruoth obet e rangach.” Eka ji duto nodhi e nyim ruoth.

To Jo-Israel mamoko* noseringo modok e miechgi.+ 9 Wach nowuok e kind dhoudi duto mag Israel ka gipenjore niya: “Ruoth e ma noresowa e lwet jowasikwa+ kendo e lwet Jo-Filistia, to koro ruoth oseringo pinywa nikech Absalom.+ 10 Absalom ma ne waketo jatelo+ bende osetho e lweny.+ Koro ang’o momiyo waling’ aling’a ma ok wadhi waom ruoth?”

11 Ruoth Daudi nooro wach ne Zadok+ gi Abiathar+ jodolo kama: “Penjnauru jodong Juda+ niya: ‘Ang’o momiyo un e ma dubi mogik dwoka e oda ka Jo-Israel mamoko duto to oseorona wach? 12 Un owetena, ringrena, kendo chokena. Ang’o momiyo un e ma dubi mogik dwoka e oda?’ 13 Nyisnauru Amasa+ niya: ‘Donge ing’eyo ni wan owete?* Nyasaye mondo okwana jaketho ka ok aketi jatend jolweny kar Joab.’”+

14 Kamano, Jo-Juda duto noyie mi gioro ne ruoth wach niya: “Duogi kaachiel gi jogi duto!”

15 Ruoth nochako wuoth mar dok mochopo Jordan, to Jo-Juda nobiro romone Gilgal+ mondo ging’ad kode Jordan. 16 Eka Shimei+ wuod Gera, Ja-Benjamin ma Bahurim nodhi piyo gi Jo-Juda mondo orom ne Ruoth Daudi, 17 Jo-Benjamin 1,000 ne ni kode. Ziba+ jatij Saulo gi yawuote 15, kod wasumbnine 20 nokwongo ne ruoth chopo Jordan. 18 Nong’ado aora mondo oom ruoth gi joode kendo otimne gimoro amora modwaro. To Shimei wuod Gera nokulore e nyim ruoth ka nochiegni ng’ado Jordan. 19 Nowacho ne ruoth niya: “Kik ikwana jaketho, kendo kik ipar gik maricho ma ne awachoni+ ka ne ia Jerusalem. Kik ikan wechego e chunyi, 20 nimar ang’eyo ni naketho. Omiyo, kuom jood Josef duto an e ma akwongo biro mondo arom ne ruoth kawuononi.”

21 Gikanyono, Abishai+ wuod Zeruya+ nopenjo niya: “Donge owinjore oneg Shimei nikech noyanyo ng’at ma Jehova owiro?”+ 22 To Daudi nodwoko kama: “Ang’o ma chandou koda un yawuot Zeruya+ momiyo udoko wasika kawuononi? Be owinjore oneg ng’ato e Israel kawuononi? Donge kawuono ang’eyo ni an ruodh Israel?” 23 Eka ruoth nonyiso Shimei kama: “Ok bi negi.” Kendo nosingorene kuom wachno.+

24 Mefibosheth+ nyakwar Saulo bende nobiro romo ne ruoth. Ne pok olwoko tiende, kata lielo tike, kata mana lwoko lepe chakre chieng’ ma ruoth nowuok nyaka chieng’ ma noduogo gi kuwe. 25 Ka noromo gi ruoth Jerusalem, ruoth nopenje niya: “Mefibosheth, marang’o ne ok idhi koda?” 26 Nodwoke kama: “Ruodha, jatichna+ e ma nowuonda. Nimar nanyise kama: ‘We akaw punda mondo adhi gi ruodha,’ nikech an rang’ol.+ 27 Kata kamano, ne othuwa kodi.+ To ruodha riek ka malaika mar Nyasaye, omiyo, inyalo timo gima ineno ni ber. 28 Ang’eyo ni ruoth ne nyalo nego jood wuora duto, to e ma pod ne iketa achiel kuom jo ma chiemo e mesani.+ Koro, ere gima chielo ma damed kwayi ruodha?”

29 Kata kamano, ruoth nowachone niya: “Koro we wuoyo kamano, nimar aseng’ado ni udhi pogoru gi Ziba lowo.”+ 30 Mefibosheth nonyiso ruoth kama: “We okawe duto nikech koro iseduogo e odi gi kuwe.”

31 Barzilai+ Ja-Gilead bende nobiro koa Rogelim mondo okow ruoth nyaka Jordan. 32 Barzilai noseti ahinya kendo ne en jahigni 80. Noteronega ruoth chiemo ka ruoth ne ni Mahanaim+ nikech ne en jamwandu ahinya. 33 Ruoth nowacho ne Barzilai kama: “Wang’ad kodi loka, kendo abiro pidhi gi chiemo Jerusalem.”+ 34 Barzilai to nodwoke niya: “Ruoth, an aseti. Ere kaka dadhi kodi Jerusalem? 35 Koro an jahigni 80.+ Be anyalo pogo kind ber gi rach. Be anyalo winjo mit gima achamo kata ma amadho? Be iparo ni wende chwo gi mon pod nyalo miya mor?+ Ok owinjore amedni ting’ kayiem nono. 36 Ruodha, kowi nyaka Jordan kae oroma aroma. Be ochuno ni nyaka ichula pok ma kama? 37 Yiena ayiea adog dala mondo oyika but liend wuonwa gi minwa.+ To eri Kimham jatichni,+ dhi kode kendo itimne kaka idwaro.”

38 Omiyo ruoth nodwoke kama: “Kimham biro dhi koda, kendo abiro timone kaka idwaro kendo gimoro amora midwaro kuoma, natimni.” 39 Eka ji duto nochako ng’ado Jordan, to ruoth nodong’ ka ogoyo ne Barzilai oriti.+ Ne onyodhe mi oguedhe kae to Barzilai nodok dalane. 40 Ruoth nodhi nyaka Gilgal+ ka en gi Jo-Juda duto kod dhout Israel moko. Kimham bende nodhi kode.+

41 Eka Jo-Israel duto nodhi mopenjo ruoth niya: “Marang’o Jo-Juda nokawi ling’ ling’ gi joodi kaachiel gi jogi mamoko duto mi ging’ado kodi Jordan?”+ 42 Eka Jo-Juda nodwoko Jo-Israelgo kama: “Ne watimo kamano nikech ruoth en watwa.+ Marang’o iu wang’ nikech wachni? Be uwinjo ni ruoth osemiyowa gimoro mi wachamo, kata ni osemiyowa mich moro?”

43 To Jo-Israel nodwoko Jo-Juda kama: “Wan dhoudi apar, omiyo wan gi dwol moloyou kuom Daudi. Obet nade ni uchayowa kama? Donge wan e ma ne owinjore wapar wach duoko ruodhwa mokwongo?” Kata kamano, wach Jo-Juda nobedo gi teko moloyo mar Jo-Israel mamoko.

20 Koro ne nitie Ja-Benjamin moro ma nyinge Sheba.+ Ne en wuod Bikri kendo nohero thuwo ji. Nogoyo tung’+ kowacho niya: “Daudi ok en watwa kendo waonge pok kuom wuod Jesse.+ Wan Jo-Israel, ng’ato ka ng’ato odog ne nyasache!”+ 2 Gikanyono, Jo-Israel duto noweyo luwo Daudi mi gichako luwo Sheba wuod Bikri,+ Jo-Juda to nomakore gi ruodhgi mi gidhi kode nyaka Jerusalem ka gia Jordan.+

3 Ka Daudi nochopo dalane Jerusalem,+ nokawo monde apar ma noweyo ka rito dala+ mi oketogi e ot moro miritogie. Kata obedo ni ne omiyogi chiemo, ne ok onindo kodgi kendo.+ Ne oketogi kanyo nyaka thogi kendo ne gidak mana ka mond liete kata obedo ni chworgi ne ngima.

4 Daudi nonyiso Amasa+ kama: “Chokna Jo-Juda duto mondo ibi kodgi ira ka pok ndalo adek orumo.” 5 Omiyo, Amasa nodhi choko Jo-Juda, en mana ni ne ok ochopo e sa ma ne giwinjoree. 6 Eka Daudi nowacho ne Abishai+ niya: “Sheba+ wuod Bikri biro timonwa marach moloyo Absalom.+ Omiyo, kaw jolweny ilawe ka pok odonjo e achiel kuom mier mochiel motegno mi otony.” 7 Koro Joab gi lange,+ gi Jo-Kereth, gi Jo-Peleth,+ kod chwo duto mathuondi nowuok Jerusalem mi gilawo Sheba wuod Bikri. 8 Ka ne gichiegni chopo e lwanda maduong’ man Gibeon,+ Amasa+ noromo kodgi. Noyudo Joab orwakore gi lep lweny kendo ne en gi ligangla moliero e nungone. Ka nosudo machiegni gi Amasa, ligangla nowuodhore molwar.

9 Joab nopenjo Amasa kama: “In nade owadwa?” Eka nomako yie tik Amasa gi lwete ma korachwich ka gima odwa nyodhe. 10 Amasa ne ok otang’ gi ligangla ma ne nie lwet Joab, omiyo Joab nochuoyo bund iye+ mi nyimbich othichore oko molwar piny. Ne ok ochwoye mokalo kanyo, dichielno kende nonege. Eka Joab gi Abishai owadgi nomedo lawo Sheba wuod Bikri.

11 Eka ng’at Joab moro nochung’ but Amasa kowacho niya: “Jo ma ni kor Joab kod jo ma ni kor Daudi oluw bang’ Joab!” 12 Gie kindeno duto Amasa to nonindo e rembe e wang’ yo kanyo. Ka ne jalo oneno ka ji duto chung’ but Amasa kanyo, nogole mochwale e bath yo kae to nobolo nanga kuome nikech noneno ka ji chung’ ka ng’iye. 13 Ka ne osegole e yo, ji duto noluwo Joab ka gilawo Sheba+ wuod Bikri.

14 Sheba nokadho e dhout Israel duto mochopo Abel-beth-maaka.+ Jo-Bikri bende nochokore modonjo kode e dalano.

15 Eka Joab gi joge duto noloro ne Sheba e dala mar Abel-beth-maaka kendo ne gigingo pidhe mondo gimonj dalano nimar dalano nochiel motegno. Eka jo ma ne nigi Joab nochako kunyo ohinga mondo gigoye piny. 16 Koro, dhako moro mariek nokok gi e wi ohinga mar dalano niya: “Winjuru, winjuru! Nyisuru Joab ni obi awuo kode.” 17 Joab nosudo machiegni mi dhakono nopenje niya: “In e Joab?” Nodwoke niya: “Ee, an e Joab.” Eka dhakono nowachone niya: “Ruodha, winj gima adwaro wachoni.” Joab nonyise ni, “Wachi.” 18 Nonyise niya: “E kinde machon ne ji wachoga ni, ‘Dhiuru upenj wach e Abel,’ kae to weche ne rumo gi kanyo. 19 Awuoyo e lo Jo-Israel ma onge wach kendo mohero kuwe. Idwaro ketho dala machal min Israel. Marang’o idwaro tieko oganda Jehova?”+ 20 Joab ne odwoke niya: “Ok adwar ketho dalani ngang’! 21 Ok en kamano. Sheba+ wuod Bikri modak e piny gode mag Efraim+ e ma oseng’anyo ne Ruoth Daudi. En e ma ka uchiwonwago, to wabiro weyo dalani.” Dhakono nonyiso Joab niya: “Wabiro dironu wiye piny kono!”

22 Gikanyono, dhakono nodhi mowuoyo gi jodalano duto mi ne ging’ado wi Sheba wuod Bikri, kendo ne gidirogo ne Joab. Eka Joab nogoyo tung’ mi ng’ato ka ng’ato nodok dalane,+ to Joab nodok Jerusalem ir ruoth.

23 Koro, Joab ne jatend jolweny duto mag Israel,+ to Benaya+ wuod Jehoyada+ ne jatend Jo-Kereth kod Jo-Peleth.+ 24 Adoram+ ne otelo ne jo ma nochun mondo oti ne ruoth, to Jehoshafat+ wuod Ahilud ne en jandiko. 25 Sheva ne en jagoro, to Zadok+ gi Abiathar+ ne gin jodolo. 26 Ira Ja-Jair ne en jatelo maduong’* mar Daudi.

21 Koro ne nitie oro+ e kinde Daudi kuom higni adek moluwore. Omiyo, Daudi ne openjo Jehova mi Jehova nodwoke niya: “Nitie buch remo e od Saulo gi joge, nimar ne ginego Jo-Gibeon.”+ 2 Omiyo, ruoth noluongo Jo-Gibeon+ mowuoyo kodgi. (Jo-Gibeon ne ok gin Jo-Israel to ne gin Jo-Amor+ ma ne odong’ ma Jo-Israel ne osingore ni ok bi nego.+ Kata kamano, Saulo noramo mar negogi nikech nodwaro ni Jo-Israel kod Jo-Juda ogurre motegno.) 3 Daudi nopenjo Jo-Gibeon kama: “Datimnu ang’o mondo achul richo ma ne wakelo kuomu, eka mondo gueth mag Jehova oduog ne joge?” 4 Jo-Gibeon nodwoke niya: “Ok wadwar ni mondo ochulwa fedha kata dhahabu+ nikech gima Saulo gi joode notimonwa. Bende, ok dwaher ni oneg ng’ato ang’ata e Israel.” Eka nowachonegi niya: “Abiro timonu gimoro amora ma ukwayo.” 5 Ne giwacho ne ruoth kama: “Ng’at ma nonego jowa kendo ma nochano mondo otiekwa e piny Israel duto+— 6 miwa yawuote abiriyo. Wabiro liero ringregi+ e nyim Jehova e Gibea+ dala Saulo, jal ma Jehova noyiero.”+ Eka ruoth nodwokogi niya: “Abiro miyougi.”

7 Kata kamano, ruoth Daudi ne oneno lit ne Mefibosheth+ wuod Jonathan ma wuod Saulo nikech singruok ma notimo gi Jonathan+ e nyim Jehova. 8 Omiyo, ruoth nokawo Armoni gi Mefibosheth yawuot Rizpa+ nyar Aia ma nonyuolo ne Saulo, kod yawuoyi abich ma Mikal*+ nyar Saulo nonyuolo ne Adriel+ wuod Barzilai Ja-Mehola. 9 Eka ne gichiwogi ne Jo-Gibeon ma nonegogi molierogi e got e nyim Jehova.+ Ji abiriyogo duto ne onegi kinde ma ne keyo mar shairi chakore. 10 Eka Rizpa+ nyar Aia nokawo law gunia mopedho e wi lwanda chakre kinde keyo nyaka ndalo koth. Ne ok oweyo winy piyo kuomgi godiechieng’ kata le mag bungu chopo butgi kanyo gotieno.

11 Ne onyis Daudi gima Rizpa chi Saulo nyar Aia notimo. 12 Omiyo, Daudi ne odhi mokawo choke Saulo gi mag Jonathan wuode kuom jotend Jabesh-gilead.+ Jogo ne okwalo chokego Beth-shan ka ma Jo-Filistia ne olieroe ringregi chieng’ ma ne onegie Saulo Gilboa.+ 13 Ne okawo choke Saulo gi mag Jonathan kod choke ji abiriyo ma ne oneg e got-ka.+ 14 Ne giyiko choke Saulo gi mag Jonathan wuode Zela e piny Jo-Benjamin,+ but liend Kish+ wuon Saulo. Ka ne gisetimo duto ma ruoth nochikogi, Nyasaye nowinjo kwayogi mi oguedho pinygi.+

15 Lweny nomuoch kendo e kind Jo-Filistia gi Jo-Israel.+ Omiyo, Daudi gi joge nodhi mokedo gi Jo-Filistia, to nochopo ka ma Daudi ne ool ahinya. 16 Ne nitie Ja-Refaim+ miluongo ni Ishbibenob ma ne dwaro nego Daudi. Ne en gi ligangla manyien kendo pek mar tonge mar mula ne romo shekel* 300.+ 17 Gikanyono, Abishai+ wuod Zeruya nonego Ja-Filistiano mi oreso ruoth.+ Eka jo Daudi ne okuong’orene kama: “Ok nichak idhi kodwa e lweny kendo,+ di po ka inego taya mar Israel!”+

18 Bang’e, lweny nomuoch kendo e kindgi gi Jo-Filistia+ e Gob. Gie kindeno, Sibekai+ Ja-Husha nonego Saf Ja-Refaim.+

19 Lweny nomuoch kendo e kind Jo-Israel gi Jo-Filistia+ e Gob mi Elhanan wuod Jaare-oregim Ja-Bethlehem ne onego Goliath Ja-Giti ma ludh tonge ne romre gi ludh jotweng’o.+

20 Lweny nomuoch kendo Gath ka ma ne nitie ng’at ma rabet ma nigi lith lwedo 6 gi lith tielo 6. Lith lwetene gi mag tiendene duto ne gin 24. En bende ne en Ja-Refaim.+ 21 Ne osiko oyanyo Jo-Israel+ mi Jonathan wuod Shimei+ owadgi Daudi ne onege.

22 Ji ang’wen-go duto ne gin Jo-Refaim ma Gath, kendo Daudi gi joge nonegogi.+

22 Daudi nowero ne Jehova wendni+ chieng’ ma Jehova norese e lwet wasike+ duto kendo e lwet Saulo.+ 2 Ne ower kama:

“Jehova e lwandana, en e kar geng’ruokna,+ kendo en e Jal ma resa.+

11 Ne oidho kerubi+ mi obiro kofuyo.

Ne onenore e buomb malaika.+

13 Ler manie nyime nogolo mirni mag mach maliel.

En okumba ne ji duto ma geno kuome.+

32 Ere Nyasaye moro mak mana Jehova?+

Kendo ere lwanda moro mak mana Nyasachwa?+

Jo ma ne ok ang’eyo biro tiyona.+

23 Magi e weche mogik mag Daudi:+

 5 Donge oda chalo kamano e nyim Nyasaye?

8 Koro magi e jolweny mathuondi mag Daudi:+ Joshebashebeth Ja-Takemoni, jatend jolweny adek mathuondi.+ Chieng’ moro ne onego ji mokalo 800 gi tong’. 9 Ng’at ma ne luwe ne en Eleazar+ wuod Dodo+ ma wuod Ahohi ma ne en achiel kuom jolweny adek mathuondi ma ne nigi Daudi ka ne gidhi kedo gi Jo-Filistia. Noyudo gisechokore kanyo ne lweny, to ka ne Jo-Israel oringo, 10 en nodong’ kanyo monego Jo-Filistia nyaka bade nojony kendo lwete notho dhudhno nikech mako ligangla.+ Omiyo, Jehova nomiyogi loch maduong’ chieng’no,+ mi ji noduogo molonyo jo ma nosenegi.

11 Ng’at ma ne luwe ne en Shama wuod Agee Ja-Harar. Jo-Filistia nochokore Lehi ka ma ne nitie puodho mopidhie ng’or mang’eny, kendo jolweny noringo nikech Jo-Filistia. 12 En to ne ochung’ e dier pap mokedo mondo kik gikawe kendo ne onego Jo-Filistia mi Jehova nomiyogi loch maduong’.+

13 Ji adek kuom jotelo 30 ne odhi ir Daudi e rogo mar Adulam+ ndalo keyo, to noyudo jolweny mag Jo-Filistia ogoyo kambi e Paw Refaim.+ 14 Gie kindeno, Daudi nopondo kamoro,+ to jolweny mag Jo-Filistia nogoyo kambi Bethlehem. 15 Daudi ne owacho kama: “Mad ne ayudie pi soko man but ranga Bethlehem mondo amodhi!” 16 Mi thuondi adekgo ne omuomo modonjo e kambi mar Jo-Filistia mi gitwomo pi soko man e ranga Bethlehem kae to gikelo ne Daudi. Kata kamano, notamore modho pigno mopuke ne Jehova.+ 17 Daudi nowacho kama: “A Jehova, ok anyal timo gima kama! Ere kaka damodh remb+ jo ma dine owito ngimagi?” Omiyo, ne otamore modho pigno. Mago e gik mathuondi adekgo ne otimo.

18 Abishai+ owadgi Joab ma wuod Zeruya+ bende ne en jatend thuondi mamoko adek; ne onego ji 300 gi tong’ kendo ne en gi huma kaka thuondi adekgo.+ 19 Kata obedo ni ne en gi huma moloyogi, kendo notelonegi, ne ok ochopo e rang’iny mar thuondi adek mokwongoka.

20 Benaya+ wuod Jehoyada ne en jachir ma nokedo e lwenje mang’eny Kabzeel.+ Ne onego yawuoyi ariyo ma ne gin nyithind Ariel Ja-Moab. Chieng’ moro ka piny ng’ich,* ne odonjo e bur ka ma nitie pi monego sibuor kuno.+ 21 Bende, ne onego Ja-Misri moro ma rabet. Kata obedo ni Ja-Misrino ne nigi tong’ e lwete, nodhine gi luth momaye tongeno monegego. 22 Benaya wuod Jehoyada notimo magi duto kendo ne en gi huma mana ka thuondi adekgo. 23 Kata obedo ni ne en gi huma moloyo thuondi piero adekgo, ne ok ochopo e rang’iny mar thuondi adek mokwongoka. Kata kamano, Daudi ne okete e wi jolweny ma ne rite owuon.

24 Asahel+ owadgi Joab bende ne en achiel kuom thuondi piero adekgo. Jomoko ne gin: Elhanan wuod Dodo Ja-Bethlehem,+ 25 Shama gi Elika Jo-Harod, 26 Helez+ Ja-Palti,* Ira+ wuod Ikesh Ja-Tekoa, 27 Abiezer+ Ja-Anathoth,+ Mebunai Ja-Husha, 28 Zalmon Ja-Ahohi, Maharai+ Ja-Netofa, 29 Heleb wuod Baana Ja-Netofa, Itai wuod Ribai Ja-Gibea mar Jo-Benjamin, 30 Benaya+ Ja-Pirathon, Hidai Ja-Gaash piny aoche,+ 31 Abialbon Ja-Arbath, Azmaveth* Ja-Bahurim, 32 Eliaba Ja-Shaalbon, yawuot Jashen, Jonathan, 33 Shama Ja-Harar, Ahiam wuod Sharar Ja-Harar, 34 Elifelet wuod Ahasbai Ja-Maakath, Eliam wuod Ahithofel+ Ja-Gilo, 35 Hezro Ja-Karmel, Paarai Ja-Arbi, 36 Igal wuod Nathan Ja-Zoba, Bani Ja-Gad, 37 Zelek Ja-Amon, Naharai Ja-Beeroth ma jating’ ne Joab wuod Zeruya gige lweny, 38 Ira Ja-Ithri, Gareb Ja-Ithri,+ 39 kod Uria+ Ja-Hiti. Giduto ne gin ji 37.

24 Mirimb Jehova nobedo mager kendo kuom Jo-Israel+ ka ne ng’ato omiyo Daudi otimo gimoro ma dihinygi. Ng’atno nowachone kama: “Dhi ikwan+ Jo-Israel kod Jo-Juda.”+ 2 Omiyo, ruoth nonyiso Joab+ jatend jolweny ma noyudo ni kode niya: “Dhi e dhoudi duto mag Israel, chakre Dan nyaka Beer-sheba+ mondo ikwan ji eka ang’e kar rombgi.” 3 To Joab nodwoko ruoth kama: “Jehova Nyasachi mondo omedni ji nyadi 100 kendo ruodha mondo one mano. To ang’o momiyo idwaro timo gima kama?”

4 Kata kamano, wach ruoth noloyo mar Joab gi jotend lweny mi ne giwuok mi gidhi kwano Jo-Israel.+ 5 Ne ging’ado Jordan mi gichako kweno Aroer+ kod yo milambo mar dala manie chuny hoho, ka gichiko Gad kae to gidhi Jazer.+ 6 Eka ne gidhi Gilead+ kod Tatim-hodshi kae to gidhi Dan-jaan mi gilworo piny nyaka Sidon.+ 7 Bang’e, ne gidhi Turo+ dala mochiel motegno kod mier duto mag Jo-Hivi+ gi mag Jo-Kanaan kae to gikone, ne gidhi Beer-sheba+ man Negeb+ e piny Juda. 8 Kamano ne giwuotho e piny duto kuom dweche ochiko gi ndalo 20, kae to ne giduogo Jerusalem. 9 Joab nonyiso ruoth kwan mar ji. Jolweny duto mag Jo-Israel ne gin 800,000 to mag Juda ne gin 500,000.+

10 Ka ne Daudi osekwano ji, chunye nochande+ mi oywak ne Jehova niya: “A Jehova, asetimo richo+ maduong’. Asayi, wena richona+ nikech asetimo tim mofuwo ahinya.”+ 11 Ka ne Daudi ochiewo gokinyi, wach Jehova nobiro ne Gad+ janabi ma ne en jakor wach ne Daudi niya: 12 “Dhi inyis Daudi ni Jehova owacho kama: ‘Aketo gik moko adek e nyimi. Yier achiel kuom gima onego atimni.’”+ 13 Omiyo, Gad nodhi ir Daudi mopenje niya: “Diher ni kech omak piny kuom higni abiriyo?+ Koso wasiki olawi kuom dweche adek?+ Koso tuo oneg ji kuom ndalo adek?+ Koro par maber, inyisa gima dadwok Jal ma oora.” 14 Omiyo, Daudi nodwoko Gad kama: “Wachni chanda ahinya. Ber mondo walwar e lwet Jehova+ nikech ng’wonone ogundho.+ To kik walwar e lwet dhano.”+

15 Kuom mano, Jehova nokelo tuo+ monego Jo-Israel chakre okinyi nyaka kinde ma ne oketo, mi ji 70,000 ne otho+ chakre Dan nyaka Beer-sheba.+ 16 Ka ne malaikano orieyo lwete mondo oketh Jerusalem, Jehova noloko pache+ mi onyiso malaikano niya: “Oromo! Koro dwok lweti.” Malaika mar Jehova ne ni machiegni gi kar dino mar Arauna+ Ja-Jebus.+

17 Ka ne Daudi oneno malaikano, nowacho ne Jehova niya: “An e ma aseketho kendo an e ma asetimo marach; to ok rombegi+—ere rach ma gisetimo? Akwayi ni an e ma mondo ikuma kod jood wuora.”+

18 Omiyo, Gad nodhi ir Daudi chieng’no mi owachone niya: “Dhi kar dino mar Arauna Ja-Jebus mondo iger ne Jehova kendo mar misango kanyo.”+ 19 Kamano, Daudi nodhi mana kaka Jehova nochiko Gad mondo owachne. 20 Ka ne Arauna oneno ka ruoth gi jotichne biro ire, nowuok mapiyo modhi romone kendo nogoyo chonge piny e nyim ruoth mi okulore nyaka e lowo. 21 Arauna nopenjo ruoth kama: “Ang’o momiyo ibiro ira ruodha?” Daudi nodwoke niya: “Abiro ng’iewo kari mar dino mondo agernie Jehova kendo mar misango, di po ka masira ma omako oganda orumo.”+ 22 To Arauna nowacho ne Daudi niya: “Kawe akawa mondo itimgo gima idwaro. Dhok eki ma inyalo timogo misango. Kaw bende gir dino kod jok mar dhok mondo obedni yien. 23 Ruoth, magi duto amiyi.” Arauna nomedo nyiso ruoth kama: “Jehova Nyasachi mondo oguedhi.”

24 Kata kamano, ruoth nonyiso Arauna kama: “Ooyo, nyaka achuli nikech ok dachiw ne Jehova Nyasacha misengni miwang’o ma ayudo nono.” Omiyo, Daudi nochulo fedha shekel* 50 kong’iewogo dhok kod kar dino.+ 25 Daudi nogero ne Jehova kendo mar misango+ kanyo mi ochiwoe misengini miwang’o kod misengni mag kuwe. Jehova nowinjo kwayone+ mi tuo ma ne nego Jo-Israel ne orumo.