NE JO-KOLOSAI

1 An Paulo, jaote Kristo Yesu kokalo kuom dwaro mar Nyasaye, ka an gi Timotheo+ owadwa, 2 andikonu un jo maler man Kolosai kod owete mochung’ motegno e yie kendo manie winjruok achiel gi Kristo:

Ng’wono mogundho kod kuwe moa kuom Nyasaye Wuonwa mondo obed kodu.

3 Kinde duto wagoyo erokamano ne Nyasaye ma Wuon Ruodhwa Yesu Kristo sa ma walamonu 4 nikech wasewinjo yie ma un-go kuom Kristo Yesu kod kaka uhero jo maler duto. 5 Utimo kamano nikech geno mosekannu e polo.+ Ne uwinjo wach genono kokalo kuom adiera mar wach maber 6 mosechoponu. Mana kaka wach maber yudo nyak kendo omedore e piny duto,+ kamano bende e kaka timore e kindu, chakre chieng’ ma ne uwinje mi ung’eyo e yo malong’o wach ng’wono mogundho mar Nyasaye gadier. 7 Mano e gima usepuonjoru kuom Epafra ma en misumba wadwa+ ma wahero, kendo jatich mogen mar Kristo e lowa. 8 Ne onyisowa bende wach hera ma roho osemiyou.

9 Mano bende e momiyo nyaka a chieng’ ma ne wawinjo wachno, pok ne waweyo lamonu+ ka wakwayo mondo opong’u chuth gi ng’eyo malong’o+ kuom dwarone e rieko duto, kod winjo tiend weche kokalo kuom roho maler,+ 10 eka uwuoth e yo mowinjore e wang’ Jehova* mondo ubed malong’one chuth sa ma udhi nyime nyago olemo e tije mabeyo duto, kendo umed bedo gi ng’eyo malong’o chuth kuom Nyasaye;+ 11 bende, ubed gi nyalo gi teko duto kaluwore gi duong’ mar nyalone+ eka mondo unan chuth ka un gi horuok kod mor, 12 ka ugoyo ne Nyasaye Wuonwa erokamano ma nomiyo un bende ubedo jo mowinjore yudo pok kanyachiel gi jo maler+ manie ler.

13 Ne oresowa waa e bwo loch mar mudho+ mi ne orwakowa ei pinyruodh Wuode mohero, 14 ma kuome, osewarowa kokalo kuom nengo ma nochiwo, ma miyo iweyonwa richowa.+ 15 En e kido mineno mar Nyasaye ma ok ne,+ en e jal makayo kuom chuech duto;+ 16 nikech kokalo kuome, ne ochue gik mamoko duto manie polo gi manie piny, gik mineno gi gik ma ok ne,+ gibed kombe ruodhi, kata migepe mag telo, kata pinjeruodhi, kata teko mag loch. Gik mamoko duto osechue kokalo kuome,+ kendo ne en. 17 Bende, en e ma ne okwongo ne gik mamoko duto,+ kendo kokalo kuome ne omi gik mamoko duto obetie, 18 kendo en e wi ringruok, tiende ni kanyakla.+ En e chakruok, jal makayo koa kuom jo motho,+ mondo obed jal mokwongo e gik moko duto; 19 nimar Nyasaye ne dwaro ni gik moko duto odag kuome e okang’ mopong’ chuth,+ 20 kendo kokalo kuome, Nyasaye okel winjruok e kinde gi gik mamoko duto,+ gibed gik manie piny kata gik manie polo, koloso kodgi kuwe kokalo kuom remo+ ma Kristo nochuero ka ne en e yadh-sand.*

21 Kuom adier, un ma chon ne un mabor kendo ne un wasigu nikech pachu ne ni kuom timbe maricho, 22 sani koro oseloso winjruok e kindu kode kokalo kuom thone e del mar ring’o gi remo, mondo ochiwu ka uler ma onge ketho kendo ma onge gima ng’ato donjonugo e nyime+— 23 to mana ka udhi nyime bedo e yie,+ ka uguroru matek e miseno,+ kendo ka uchung’ motegno+ ma ok golu e geno mar wach maber ma ne uwinjo kendo ma oseyal ne chuech duto manie bwo polo.+ An Paulo, ne abedo jatich mar yalo wach maberno.+

24 Sani koro amor kuom sandruokna nikech un,+ kendo ayudo masiche mag Kristo ma ringrena pok okaloe,+ ka atimo kamano e lo ringrene ma en kanyakla.+ 25 Ne abedo jatich mar kanyaklani kaluwore gi ting’ moa kuom Nyasaye+ ma nomiya nikech un, mondo ayal wach Nyasaye chuth, 26 ma en wach maler+ moum ma ne opand chakre e ndalo*+ machon kendo chakre e tienge machon. To koro sani oseele ne joge maler+ 27 ma Nyasaye oseyiero mondo omi ging’e duong’ mogundho mar wach maler moumno e kind ogendni,+ tiende ni Kristo manie winjruok achiel kodu ma ugeno yudogo duong’ kanyachiel.+ 28 En e jal ma wayalo wachne ka wasayo kendo puonjo ng’ato ka ng’ato e rieko duto, mondo wachiw ng’ato ka ng’ato koromo chuth e winjruok achiel gi Kristo.+ 29 Mano e momiyo atiyo matek, ka akedo kaluwore gi teko ma omiya, ma tiyo kuoma e yo maduong’ ahinya.+

2 Nimar daher ni ung’e kaka an gi lweny maduong’ ma akedoe nikech un kendo nikech jo ma ni Laodikia,+ bende nikech jo ma pok onena wang’ gi wang’. 2 Mano en ni mondo chunygi oyud hoch+ kendo giriwre kanyachiel e hera,+ kendo mondo giyud mwandu duto ma bedoe nikech bedo gi adier chuth e rieko mar ng’eyo tiend weche, mondo eka gibed gi ng’eyo malong’o kuom wach maler moum mar Nyasaye, tiende ni Kristo.+ 3 En e ma opand kuome mwandu duto mag rieko kod mag ng’eyo.+ 4 Awacho mae mondo ng’ato kik wuondu gi mbaka ma nyalo loko pachu. 5 Kata obedo ni sani ok an kodu e ringruok, an kodu e paro, kendo amor neno kaka un-gi chenro maber+ kod kaka uchung’ motegno e yie kuom Kristo.+

6 Kuom mano, mana kaka userwako Kristo Yesu Ruoth, dhiuru nyime wuotho e winjruok achiel kode 7 ka uguroru kendo ka igerou kuome,+ bende ka umedo chung’ motegno e yie+ mana kaka ne opuonju kendo ka upong’ chuth gi gik ma nyiso ni ugoyo erokamano.+

8 Beduru motang’ mondo ng’ato kik omaku gi riekni mag piny kod wuond manono+ ma wuok kuom chike kod timbe mag dhano, kendo kaluwore gi gik ma chiko yore kod paro mag pinyni, to ok kaluwore gi Kristo; 9 nikech kuome e ma kido mag Nyasaye duto odakie.+ 10 Omiyo, usepong’ chuth kokalo kuom jal manie wi loje kod telo duto.+ 11 Kokalo kuom winjruok manie kindu kode, ne oteru nyangu un bende, ma en nyangu ma ok tim gi lwedo king’ado del mar ringruok.+ Ne oteru nyangu mar Kristo.+ 12 Nimar ne oyiku kode e batisone,+ kendo kokalo kuom winjruok manie kindu kode, ne ochieru bende kode+ nikech yie maru kuom tich ma nigi teko maduong’ mar Nyasaye ma ne ochiere koa kuom jo motho.+

13 E wi mano, kata obedo ni ne utho nikech kethou kendo nikech ringreu ne ok oter nyangu, Nyasaye nomiyo udoko mangima kanyachiel kode.+ Ne oweyonwa kethowa duto+ 14 kendo norucho wach ma ne ondik gi lwedo+ ma noting’o chike+ kendo ma ne kwedowa.+ Osegole oko kuom gure e yadh-sand.*+ 15 Kokalo kuome, oselonyo loje kod telo mi oweyogi duk, kendo osenyiso e lela ni oseloyogi,+ ka otayogi kaka oganda ma wuotho gi mor ka jo ma olocho.

16 Kuom mano, kik ng’ato ong’adnu bura kuom gik muchamo, kata mumadho,+ kata kuom rito sawo moro amora, kata sawo mar dwe manyien,+ kata mar sabato.+ 17 Gigo gin mana tipo mar gik ma biro,+ to gima sie en Kristo.+ 18 Nitie ng’at mohero bolruok mar wuondruok kod kit lamo mar malaike, kendo “mochung’ matek”* ne gik moseneno. Kik uwe ng’at ma kamano omonu yudo mich.+ Kuom adier, en ng’at ma sungore kayiem nono nikech oparo e yor ringruok, 19 ok omakore motegno gi jalo ma en wich,+ jal ma kokalo kuome ringruok duto yudo gik ma dwarore ka giriwore kanyachiel kokalo kuom fuondene kod leche, kendo gidongo kaka Nyasaye dwaro ni gidongi.+

20 Ka ne utho kanyachiel gi Kristo muweyo gik ma chiko yore kod paro mag pinyni,+ obet nade ni udak ka gima pod un mag pinyni ka uluwo chike kaka:+ 21 “Kik umak gini, kata kik ubil gini, kata kik umul gini,” 22 to gin gik ma rumo bang’ ka oseti kodgi kaluwore gi chike kod puonj mag dhano?+ 23 Kata obedo ni gik ma kamago nenore gi oko ni gin gi rieko kaluwore gi kit lamo ma ng’ato oketorego owuon kod bolruok mar miriambo kod sando ringruok,+ gin gik ma ok kony e loyo gombo mag ringruok.

3 Kata kamano, ka ne ochieru kanyachiel gi Kristo,+ kara dhiuru nyime manyo gik man malo ka ma Kristo obetie e bad Nyasaye ma korachwich.+ 2 Sikuru ka uketo pachu kuom gik man malo,+ to ok kuom gik man piny.+ 3 Nimar ne utho, kendo ngimau osepand kanyachiel gi Kristo e winjruok achiel gi Nyasaye. 4 E kinde ma Kristo ma en ngimawa+ ibiro el, eka un bende ibiro elu kanyachiel kode e duong’.+

5 Kuom mano, neguru fuonni mag ringreu+ manie piny, ka uweyo terruok,* gi tim ma ok ler, kod owruok gi gombo mag terruok,+ gi gombo ma kelo hinyruok, kod ich-lach, ma en lamo mar sanamu. 6 Mirimb Nyasaye biro nikech gigo. 7 Mano e kaka un bende ne ujotimo* e ngimau machon.+ 8 To koro sani nyaka uket gigi duto mabor kodu: ich-wang’, mirima, tim marach,+ weche mag ayany,+ kendo weche modwanyore+ kik oa e dhou. 9 Kik ng’ato riamb ne nyawadgi.+ Lonyuru kit dhano machon+ kod timbene, 10 kendo urwak kit dhano manyien,+ ma kokalo kuom ng’eyo malong’o, ilose kodhi nyime bedo manyien mondo ochal gi kido mar Jal ma ne ochueye,+ 11 ma chop ka ma ok kwan ni ng’ato en Ja-Grik kata Ja-Yahudi, ng’at moter nyangu kata ng’at ma ok oter nyangu, wendo, Ja-Skithia,* misumba, kata ng’at man thuolo; to Kristo en gik moko duto kuom duto.+

12 Kuom mano, kaka jo ma Nyasaye oseyiero,+ maler kendo mohero, rwakuru hera ma kecho jomamoko,+ ng’wono, bolruok,+ muolo,+ kod horuok.+ 13 Ng’ato ka ng’ato mondo odhi nyime nano gi nyawadgi, kendo wereuru ketho e kindu gi chuny man thuolo+ kata ka ng’ato nigi wach moro gi nyawadgi.+ Mana kaka Jehova* bende ne ni thuolo weyonu richou, un bende nyaka utim kamano.+ 14 To e wi mago duto, rwakuru hera,+ nimar en e motueyo gik moko duto kanyachiel.+

15 Bende, weuru mondo kuwe mar Kristo oloch ei chunyu,+ nimar ne oluongu ne kuwe ma kamano e ringruok achiel. Kendo gouru erokamano. 16 Wach Kristo mondo ogundh e iu gi rieko duto. Sikuru ka upuonjoru kendo ka ujiworu gi zaburi,+ gi wende pak ne Nyasaye, kod wende mag lemo miwero gi erokamano, ka uwer ne Jehova* gi chunyu duto.+ 17 Gimoro amora muwacho kata mutimo, timuru gik moko duto e nying Ruoth Yesu, kugoyo ne Nyasaye Wuoro erokamano kokalo kuome.+

18 Un mon, bolreuru ne chwou,+ nimar en gima owinjore kuom Ruoth. 19 Un chwo, dhiuru nyime hero mondeu+ kendo kik ubed gi mirima mager kodgi.*+ 20 Un nyithindo, winjuru jonyuolu e gik moko duto,+ nimar mano en gima ber ne Ruoth. 21 Un wuone, kik uchwany nyithindu,*+ mondo chunygi kik jogi.* 22 Un wasumbni, winjuru ruodhiu ma dhano e weche duto.+ Kik utim kamano kudwaro lombo wang’ dhano, to timuru gik moko gi chuny matir, ka uluoro Jehova.* 23 Gimoro amora mutimo, timeuru gi chunyu duto kaka ne Jehova,*+ to ok ne dhano, 24 nimar ung’eyo ni kuom Jehova* e ma ubiro yudoe pok.+ Tiuru ne Ruoth ma en Kristo. 25 Kuom adier, ibiro chul ng’at motimo marach kaluwore gi ketho ma osetimo,+ kendo Nyasaye ok dew wang’ ng’ato.+

4 Un ruodhi, timuru ne wasumbniu e yo makare kendo ma ratiro, kung’eyo ni un bende un gi Ruoth e polo.+

2 Timuru kinda e lamo,+ rituru kulamo, kendo kugoyo erokamano.+ 3 Bende, lamnwauru+ mondo Nyasaye oyawnwa dhoot mar lando wach maler moum e wi Kristo, ma e momiyo otueya e jela kae,+ 4 kendo mondo aland wachno e yo malong’o mana kaka onego atim.

5 Dhiuru nyime wuotho gi rieko e kind jo ma ni oko, ka utiyo maber gi kinde ma un-go.*+ 6 Kinde duto, wecheu mondo obed mang’won, ma nigi ndhadhu ka gima otwonie chumbi,+ mondo ung’e kaka onego uchiw dwoko ne ng’ato ka ng’ato.+

7 Tukiko+ owadwa ma ahero, ma bende en jatich mogen kendo misumba wadwa kuom Ruoth, biro nyisou weche ma timorena. 8 Ero koro aore iru mondo ung’e kaka ngimawa dhi mondo oho chunyu. 9 Aore kanyachiel gi Onesimo+ owadwa mogen kendo ma wahero, ma bende noa kuomu; gibiro wachonu gik moko duto ma timore kae.

10 Aristarko+ jal motue koda ooronu mosne. Mariko+ owadgi Barnaba ma bathe bende omosou (nuseyudo wachne ni mondo urwake maber+ ka obiro iru), 11 kod Yesu ma bende iluongo ni Justo, ma giduto gin jo moter nyangu. Jogi kende e jotich wetena ne Pinyruodh Nyasaye, kendo gisehoyo chunya ahinya.* 12 Epafra+ misumba Kristo Yesu ma noa iru ooronu mosne. Kinde duto olamo gi kinda ahinya nikech un mondo gikone ubed jo motegno kendo ka un gadier chuth kuom dwaro duto mag Nyasaye. 13 Nimar an janenone ni osetiyo matek ahinya nikech un kendo nikech jo ma ni Laodikia kod jo ma ni Hieropoli.

14 Luka,+ laktar mwahero ooronu mos gi Dema+ bende. 15 Mosnauru owete man Laodikia, kendo umos Numfa kod kanyakla manie ode.+ 16 Kendo bang’ ka osesom baruani e kindu, chanuru mondo osome bende+ e kanyakla mar Jo-Laodikia, to un bende usom barua moa Laodikia. 17 Bende, nyisuru Arkipo+ niya: “Rit tich ma ne iyiego koa kuom Ruodhwa mondo ichope chuth.”

18 An Paulo, kendo mae e mosna ma andikonu gi lweta awuon.+ Beduru ka uparo wach tuechna e jela.+ Ng’wono mogundho mar Nyasaye obed kodu.