Weche Michakogo

BUGNI en buk moting’o sigendini mag gik ma ne otimore adier. Ogolgi ei Muma, ma en buk mong’ere ahinya moloyo buge mamoko e piny mangima. Sigendinigi nyisi weche piny chakre kinde ma Nyasaye nochako chweyo gik moko, nyaka e ndalogi. Sigendinigi bende nyiso gik ma Nyasaye osingo ni obiro timo e kinde mabiro.

Bugni konyi ng’eyo gima Muma puonjo. Owuoyo kuom ji ma ne odak e kinde mag Muma kaachiel gi gik ma ne gitimo. Onyiso bende geno maduong’ ma Nyasaye osemiyo ji mar bedo gi ngima ma nyaka chieng’ e paradis mar piny.

Nitie sigendini 116 ei bugni. Opoggi kuonde aboro. Nitie weche machuok manyiso gik ma iwuoyoe kapok ochak sigendini man kuonde aborogo. Ochan sigendinigo kaluwore kod kaka ne gitimore adier. Chanogi kamano konyi ng’eyo ni en karang’o ma ne gimoro otimore, kaluwore kod gik mamoko ma bende ne otimore.

Sigendinigi ondiki e dhok mayot winjo. Un nyithindo matindo, ng’eny u biro somo sigendinigi kendu uwegi. Un jonyuol, ubiro nwang’o ni nyithindu matindo biro bedo mamor ka usomonegi sigendinigi nyadinwoya. Ubiro yudo ni bugni oting’o weche mamoro joma tindo gi joma dongo duto.

Nitie ndiko mag Muma monyis e giko mar sigana ka sigana. Ijiwi ni mondo isom kuonde ma sigendinigo yudore ei Muma. Bang’ somo sigana, som penjo mag siganano bende mayudore bang’ Sigana mar 116, kendo item yudo dwoko.