Yiero Matek Ma Japuonjre Onego Otim
Peter obet e kom e klas, kata kamano, chunye ridore ahinya. Japuonjne ma omiyo luor ahinya osetieko lero kaka puonj mar Charles Darwin ni gik moko nosieko asieka kendgi osekonyo e weche sayans, kendo konyo ji mondo kik wuondgi gi sigendni manono. Koro, japuonjno okwayo jopuonjre mondo oler pachgi e wi puonjno.
Peter nyaka tim yiero matek ahinya. Jonyuolne osepuonje ni Nyasaye nochueyo piny kod gik mangima duto manie iye. Ne ginyise ni onyalo geno weche manie Muma ma wuoyo e wi kaka nochue gik moko, kar yie ayiea ni gik moko nosieko kendgi nikech onge nonro moro amora ma siro puonjno. Jonyuol Peter kaachiel gi japuonjne dwarone ber. Kata kamano, Peter biro yie gi weche mag ng’a?
Higa ka higa, gima kamano timorega e skunde mang’eny. Ang’o ma Peter kaachiel gi jopuonjre mamoko onego otim? Donge ber mondo ginon wachno kae to gitim yiero gin giwegi? Onego ginon ka be gik moko nosieko asieka kendgi koso nochuegi, kae to gin giwegi e ma giyier puonj ma gibiro yiego.
Muma siemowa ni ok onego wayie ayiea gi gik ma jomamoko puonjo ka ok wanono ka be puonjgo gin adier. Achiel kuom jondik Muma nowacho niya: “Ng’at ma riekone tin yie gi gimoro amora, to ng’at mariek paro ka pok okawo okang’ moro amora.” (Ngeche 14:15) Muma jiwo Jokristo mondo oti gi ‘nyalogi mar paro’ e nono gik ma ipuonjogi.—Jo-Rumi 12:1, 2.
Brosuani ok ogo mondo oriw lwedo kinda ma grube mag din osebedo ka timo mondo opuonj e skunde ni gik moko nochue. Kar mano, ogoye mondo okonywa nono ka be en adier ni ngima nosieko asieka kende, kata ka be weche ma Muma wacho e wi chuech gin mana sigendni mochuogi.
Wabiro wuoyo kuom gima iluongo ni cell nikech en e gima duong’ ma siro ngima. Wabiro nono weche moko ma wuoyo e wi kaka olose. Bende, wabiro nono gik ma ji osewacho mondo gisirgo puonj mar ni gik moko nosieko asieka kendgi.
Waduto nyaka watim yiero ka be wabiro yie ni nochue ngima koso nosieko asieka kende. Nyaka bed ni iseparo wachni matut. Brosuani biro wuoyo e wi moko kuom gik ma osekonyo jomoko yie ni ngima ne ok osieko asieka kende, kar mano ne ochueye.