SOMO MAR 11
Puonj mag Muma Konyowa e Yore Mage?
1. Ang’o momiyo dwarore ni otawa?
Puonj mag Muma nyalo konyowa nade kawo okenge ma geng’o hinyruok?—ZABURI 36:9.
Jachuechwa riek moloyowa. Oherowa nikech en Wuonwa. Ne ok ochueyowa gi nyalo mar tayo yorewa wawegi. (Jeremia 10:23) Omiyo, dwarore ni Nyasaye otawa mana kaka jonyuol tayo nyithindgi. (Isaya 48:17, 18) Puonj ma wayudo e Muma en mich ma Nyasaye chiwo.—Som 2 Timotheo 3:16.
Chike kod puonj mag Jehova konyowa mondo wati gi ngimawa e yo maber moloyo sani kendo nyisowa kaka wanyalo yudo gueth ma nyaka chieng’ e kinde ma biro. Nikech Nyasaye e ma nochueyowa, owinjore waluw kaka otayowa.—Som Zaburi 19:7, 11; Fweny 4:11.
2. Puonj mag Muma gin ang’o?
Puonj mag Muma e mise mag adiera. Chike to nyisowa gik monego watim kata ma ok onego watim achiel kachiel. (Rapar mar Chik 22:8) Nyaka wati gi nyalowa mag paro mondo wang’e kaka puonj moro tiyo e chal moro sie. (Ngeche 2:10-12) Kuom ranyisi, Muma puonjo ni ngima en mich mowuok kuom Nyasaye. Puonjno nyalo tayowa sama wan e tich, e dala, kata e wuoth. Puonjno miyo wakawo okenge ma geng’o hinyruok.—Som Tich Joote 17:28.
3. Gin puonj mage ariyo madongo moloyo?
Yesu ne owuoyo kuom puonj ariyo madongo moloyo. Puonj mokwongo nyisowa ni Nyasaye ne ochueyo dhano mondo ging’eye, gihere, kendo gitine nyaka chieng’. Onego wati gi puonjni sama wadwaro ng’ado paro moro amora. (Ngeche 3:6) Joma luwo puonjni bedo osiepe Nyasaye, yudo mor madier, kod ngima mochwere.—Som Mathayo 22:36-38.
Puonj mar ariyo nyalo tayowa mondo wabed gi kuwe gi jowetewa. (1 Jo-Korintho 13:4-7) Luwo puonjni oriwo luwo ranyisi mar Nyasaye e yo ma otimonego ji gik moko.—Som Mathayo 7:12; 22:39, 40.
4. Puonj mag Muma konyowa e yore mage?
Puonj mag Muma nyiso kaka hera nyalo miyo joot obed gi winjruok e kindgi. (Jo-Kolosai 3:12-14) Wach Nyasaye bende puonjo ni kend onego obed winjruok mosiko, to mano miyo joot dak gi kuwe.—Som Chakruok 2:24.
Luwo puonj mag Muma nyalo konyowa ng’ado paro mowinjore e wi gige ringruok, gik ma waparo, kod kaka wawinjo e chunywa. Kuom ranyisi, joma ndiko ji tich ohero joma gin jo adier kendo ma jo kinda. (Ngeche 10:4, 26; Jo-Hibrania 13:18) Wach Nyasaye bende puonjowa ni wabed joma gik ma gin-go oromo kendo wagen osiep ma wan-go gi Nyasaye moloyo mwandu moro amora.—Som Mathayo 6:24, 25, 33; 1 Timotheo 6:8-10.
Tiyo gi puonj mag Muma nyalo miyo wabed gi ngima maber. (Ngeche 14:30; 22:24, 25) Kuom ranyisi, ka waluwo puonj ma kwero mer, mano nyalo geng’onwa aksident kata tuoche ma nyalo kelo tho. (Ngeche 23:20) Jehova oyienwa madho kong’o ma ok wakal tong’. (Zaburi 104:15; 1 Jo-Korintho 6:10) Chike Nyasaye puonjowa ni warit pachwa kaachiel gi timbewa bende. (Zaburi 119:97-100) Kata kamano, Jokristo madier to ok luw aluwa chike Nyasaye mana mondo giyud ber. Gitimo mano mondo gimi Jehova luor.—Som Mathayo 5:14-16.