Nyathi ma ne Osing Biro Mare

Josef kod Maria medo bedo Bethlehem kar dok Nazareth. Odiechieng’ mar aboro bang’ nyuol Yesu, gitere nyangu kaka chik ma Nyasaye nomiyo Jo-Israel dwaro. (Tim Jo-Lawi 12:2, 3) Bende, chieng’ mar aborono e ma imiyoega nyithindo ma yawuowi nying. Gichako wuodgi ni Yesu, mana kaka malaika Gabriel nosechiko.

Koro ndalo 40 osekalo nyaka ne nyuol Yesu. Iparo ni jonyuolne koro tere kanye? Giidho nyaka e hekalu man Jerusalem, ma en mana kilomita manok wuok kama gintieree. Chik wacho ni ndalo 40 bang’ nyuolo nyathi ma wuowi, min nyathi onego ogol chiwo mar pwodhruok e hekalu.​—Tim Jo-Lawi 12:4-8.

Maria timo kamano. Okelo winy ariyo matindo kaka chiwo mare. Mano konyowa ng’eyo kaka ngima Josef gi Maria ne chalo e weche mag yuto. Ka luwore gi Chik, nyarombo ma yim kod winyo e ma onego ochiw. To ka min nyathi onge gi nyalo mar yudo yim, onyalo chiwo akuche ariyo kata nyithi akuche ariyo. Mano e kaka ngima Maria chalo kendo mano e chiwo mare.

Ka gin e hekalu, ng’at moro ma hike oniang’ dhi ir Josef gi Maria. Nying ng’atno en Simeon. Nyasaye ne oseelone ni ka pok otho, obiro neno Kristo, tiende ni Mesia ma ne osing birone. Kawuononi, roho maler chiko Simeon mondo odhi e hekalu kama oyudoe Josef kod Maria kanyachiel gi nyathigi mayom. Simeon kawo nyathino kendo oting’e e bade.

Sama pod oting’o Yesu, Simeon goyo ne Nyasaye erokamano kowacho niya: “Ruoth Mamalo Chutho, eri koro iseyie mondo misumbani odhi gi kuwe ka luwore gi kaka ne isewacho, nimar wang’a oseneno yori mar kelo warruok ma iseiko e wang’ ji duto, ler mar golo gima geng’o wang’ ogendni, kendo ma kelo duong’ ne jogi Israel.”​—Luka 2:29-32.

Josef kod Maria wuoro ahinya weche ma giwinjogo. Simeon guedhogi kendo owacho ne Maria ni wuodeno “oseket mondo omi ji mang’eny e Israel olwar kendo ochung’,” kendo ni lit ma chalo gi mar ligangla mabith biro chwoye.​—Luka 2:34.

Nitie ng’at moro machielo ma bende ni e hekalu odiechieng’no. Ng’atno en Ana, ma en janabi ma dhako ma jahigni 84. Kuom adier, ok obarega ne hekalu. Gie sechego, odhi ir Josef, Maria, kod nyathi ma Yesu. Ana chako goyo ne Nyasaye erokamano kendo olando wach Yesu ne ji duto ma diher winjo.

Par ane kaka Josef kod Maria mor ahinya gi gik ma timore e hekalugi! Kuom adier, magi duto medo jiwonegi ni wuodgi e Jal ma Nyasaye nosingo ni ne dhi biro.