KARE 5

Duog ir “Jakwadhu Kendo Jarit Ngimau”

Bang’ somo bugni, be iyudo ka nitie wach moro kata pek moro mowuoye ma muli in iwuon? Ka en kamano, to kare ber. Thoth joma oluoro Nyasaye osekalo e weche ma chalo kaka mago, bed ni gin joma ne tiyone e kinde machon kata e ndalogi. Mana kaka Jehova nokonyogi loyo pekgo, in bende obiro konyi.

Jehova biro konyi duogo ire

BED gadier ni Jehova biro konyi duogo ire. Obiro konyi nyagori gi parruok, obiro hoyi ka jomoko ochwanyi, kendo obiro konyi bedo gi paro kod chuny mokue sama chunyi ketoni bura. Kae to mano biro miyo ichak tiyo ne Jehova kanyachiel gi joge kendo. Ibiro bedo kaka Jokristo moko ma ne odak e ndalo joote ma Petro nondikonegi niya: “Ne uchalo kaka rombe mobayo yo, to koro useduogo ir jakwadhu kendo jarit ngimau.”—1 Petro 2:25.

Duogo ir Jehova e gima berie moloyo minyalo timo. Ang’o momiyo en kamano? En nikech ibiro moro chuny Jehova. (Ngeche 27:11) Mana kaka ing’eyo, timbewa nyalo miyo Jehova obed mamor kata owinj malit. En adier ni Jehova ok chunwa ni mondo wahere kendo watine. (Rapar mar Chik 30:19, 20) Jal moro molony gi weche Muma nowacho kama: ‘Chuny dhano chalo gi dhoot minyalo mana yaw gi ka iye to ok gi oko.’ Nikech chunyi chalo kaka dhoodno, in e ma inyalo yiero mar yawe kuom tiyo ne Jehova gi chunyi duto nikech ihere. Sama watimo kamano, wamiye mich makende ma en makruok kode, kendo mano miyo wamoro chunye sidang’. Kuom adier, mor mwayudo sama walamo Jehova en gima ber moloyo ma ok dipim gi gimoro amora.—Tich Joote 20:35; Fweny 4:11.

Irwako nyaminwa ma ne oseweyo tiyo ne Nyasaye e Od Romo gi mor

E wi mano, sama ichako chopo ting’ ma in-go kaka Jakristo kendo, ibiro loni riyo mar ng’eyo Nyasaye. (Mathayo 5:3) E yo mane? Ji mang’eny e piny ohero penjore niya: ‘Ang’o momiyo ne ochuewa?’ Joma kamago nigi riyo mar yudo dwoko e wi penjo madongo motudore gi gimomiyo ne ochue dhano. Dhano nigi gombo mar yudo dwoko mar penjono nikech Jehova nochueyogi gi gombo ma kamano. Ne ochueyowa ni mondo wabed mamor sama watiyone. Onge gimoro amora ma nyalo kelonwa mor maduong’ ma loyo ng’eyo ni walamo Jehova nikech wahere.—Zaburi 63:1-5.

Ng’e ni Jehova dwaro ni mondo iduog ire. Ere kaka inyalo bedo gadier kuom wachno? Par ane wechegi: Bugni ne olos gi kinda bang’ lamo matut. Nyalo bedo ni sani koro en e lweti nikech okelnigo gi jaduong’-kanyakla kata Jakristo machielo. Kae to isebedo gi chuny mar some kendo kawo okenge ma luwore gi weche me iye. Magi duto nyiso ayanga ni wi Jehova pok owil kodi. Kar mano, ong’won kodi kendo otemo ywayi mondo iduog ire.—Johana 6:44.

Wanyalo winjo maber kuom ng’eyo ni wi Jehova ok wilga gi jotichne molal. Mano e gima nyaminwa miluongo ni Donna nofwenyo. Nowacho niya: “Mosmos ne achako weyo adiera. Kata kamano, ne ajaparo weche manie Zaburi 139:23, 24, ma wacho kama: ‘A Nyasaye, ranga, ing’e chunya. Tema, ing’e weche ma aparo. Kendo ine ka nitie gimoro marach e chunya, kendo telna e yo ma nyaka chieng’.’ Ne ang’eyo ni ok an mar pinyni, kendo ni ne ok awinjora bedo kuno kata matin. Bende, ne ang’eyo ni riwruok mar oganda Jehova e ka ma ne dwarore ni abedie. Kuom mano, ne achako fwenyo ni adier Jehova ne pok oweya. An e ma ne dwarore ni adog ire. Kendo koro amor sidang’ ni ne akawo okang’ mar dok ire!”

“Ne achako fwenyo ni adier Jehova ne pok oweya. An e ma ne dwarore ni adog ire”

Lamowa en ni in bende iduog mondo iyud “mor mar Jehova” kendo. (Nehemia 8:10) Ok iniywag ang’e ngang’ ka iduogo ir Jehova.

Dwoko mag Penjo ma Ng’ato Nyalo Bedogo e Wi Duogo ir Jehova

ACHAK GI KANYE?

Ng’at mosebedoga ka tuo changoga mosmos ka pok odok e tijene mapile. In bende inyalo bedo motegno kendo kaka Jakristo kuom chamo chiemb chuny mosmos pile. Kik ipar ni dwarore ni itim dongruok dichiel. Inyalo chako kuom somo kata winjo weche Muma kuom dakika machuok, puonjruok bugewa ma lero Muma, dhi e websait mar jw.org, kata ng’iyo program ma yudore e tv.jw.org e Intanet. Bende, tem dhi e chokruoge mag kanyakla mapiyo kaka nyalore. To gima dwarore ahinya moloyo duto, wuo gi Jehova e lamo kikwaye mondo okonyi. ‘Ket parruokni duto kuome, nikech odewi.’—1 Petro 5:7.

Nyaminwa miluongo ni Eeva wacho kama: “Bang’ dok chien ahinya e weche mag lamo, wiya ne kuot kata mana gi lemo. Kane achoko chir mar lemo, jaduong’ moro mar kanyakla ne olima. Ne okonya fwenyo ni Jehova ne pok ojwang’a. Jaduong’no nong’adona rieko ni achak mana gi somo Muma pile ka pile. Kane atimo kamano, ne ayudo teko mar dhi e chokruoge kendo. Bang’ kinde, ne achako dhi e tij yalo kendo. Amor ahinya ni Jehova ne ok ojwang’a.”

ERE KAKA JO KANYAKLA BIRO NENA?

Bed gadier ni jo kanyakla biro rwaki gi mor mogundho. Ok gibi jari kata ng’adoni bura. Kar mano, gibiro nyiso ni giheri ka gidewi kendo timo duto ma ginyalo mondo gijiwi.—Jo-Hibrania 10:24, 25.

Owadwa miluongo ni Javier wacho kama: “Wiya ne kuot dok e Od Romo. Ne aparora ni jo kanyakla biro nena nade. Achiel kuom nyimine ma nosebedo kanyo kuom higni 30 nowachona kama: ‘Arwaki wuoda!’ Wechenego nomulo chunya ahinya. Ne awinjo ni adier kanyo e ma owinjore abedie.”

Owadwa miluongo ni Marco wacho kama: “Ne adhi e Od Romo kae to abet e kom ma chien mogik mondo ji kik fwenya. Kata kamano, thoth ji nochako fwenya nikech ne gin joma noseng’eya ka pod atin kinde ma ne achokoraga kodgi. Ne girwaka gi ilo ka gikwaka gi mor mi awinjo ka kue makende omol kuoma. Ne chalo mana ka gima aduogo pacho kendo.”

ERE KAKA JODONG-KANYAKLA BIRO KONYA?

Jodongo biro bedo mang’won kodi. Gibiro pwoyi nikech gombo ma in-go mar chiero “hera ma ne in-go kar chakruok.” (Fweny 2:4) Gibiro kechi kendo rieyi kuom ketho ma dipo ni ne itimo ka gikonyi gi “chuny mamuol.” (Jo-Galatia 6:1; Ngeche 28:13) Samoro jodongo biro timo chenro mondo ng’ato opuonjre kodi buge kaka Inyalo Dak gi Mor Nyaka Chieng’!, kata Sud Machiegni gi Jehova Bed gadier ni jodongo biro hoyi kendo siri e duto ma dwarore ni itim mondo iduog ir Jehova.—Isaiah 32:1, 2.

Owadwa miluongo ni Victor wacho kama: “Kuom higni aboro ma ne aseweyogo tiyo ne Jehova, jodongo ne siko ka manya mondo gikonya. Nitie chieng’ ma jaduong’ moro ne okelona pichni moko ma nene ogoyowa chon. Pichnigo ne oparona kinde ma jaber ma ne an-go chon kendo mano nomiyo abedo gi siso mar tiyo ne Jehova kendo. Jodongo nonyisa hera mi gikonya chako tiyo ne Jehova e yo ma dwarore kendo.”

“Nyasaye Biro Miyi Teko”

Bugwa mar wer miluongo ni, Wer ne Jehova gi Mor, nigi wende mogwaro ma nyalo hoyi kendo jiwi sama itimo kinda mar loso winjruokni gi Nyasaye obed maber kendo. Kuom ranyisi, non ane weche ma yudore e wer namba 38. Ka luwore gi weche manie 1 Petro 5:10, wi wendno wacho ni: “Nyasaye Biro Miyi Teko.”

Nitie gimomiyo Nyasaye noywayi

Kendo nopuonji adiera mare.

Noneno ni chunyi nigi gombo matut

Mar manye kendo timo dwarone.

Nisingori nilame nyaka chieng’

Nokonyi kendo tegi nyaka chieng’.
Nyasaye nochiwo Wuode mohero ndi,

Mano omiyo odwaroni ber.

Ka nochiwoni michno mar wuode achiel,

Bed gadiera ni obiro siri.

Nopar hera gi yie ma ne in-go;

Obiro rito rombene duto.

(KORAS)

Nong’iewi gi remb Yesu, koro in mwandune.

Obiro tegoi, obiro ritoi.

Nojiwi kendo tayi, kuom ndalo duto te.

Obiro tegoi, obiro ritoi.

Mondo iwinj wendni kod wende mamoko mag Pinyruoth, dhi e jw.org/luo.