Barua Mowuok Kuom Bura Matayo

Owete gi Nyiminewa Mwageno:

Hera ma waherogo Nyasaye kod ji chwalowa mondo waluw chik ma ne Yesu ochiwo kowacho niya: “Dhiuru e ogendni duto mondo ulok ji obed jopuonjrena, kubatisogi.” (Mat. 28:19, 20; Mar. 12:28-31) Hera madier nigi teko. Onyalo mulo “ji duto ma chunygi . . . ni kare ne ngima mochwere.”—Tich 13:48.

E kinde mokalo, ne waketo pachwa e mako weche ma wanyalo chako wuoyogo gi ji kod miyogi bugewa. Koro sani dwarore ni wamed bero yo ma wawuoyogo gi ji. Wadwaro ni wanyis ni wahero jomamoko ka wawuoyo kodgi e wi gik ma morogi. Mano nyiso ni onego wabed joma oikore timo lokruok kendo wanon chal kod gik ma moro ng’ato ka ng’ato. Ere kaka brosuani biro konyowa timo kamano?

Brosuani nigi sula 12 ma wuoyo e wi kido monego wabedgo, ma nyalo konyowa hero ji kendo lokogi gibed jopuonjre. Sula ka sula wuoyo e wi weche moko manie Muma ma nyiso kido ma Yesu kata achiel kuom Jokristo mokwongo nonyiso e tij lendo. Dwarowa maduong’ en manyo yore ma wanyalo nyisogo ni wahero ji, to ok mana mako e wiwa weche mwanyalo chako wuoyogo kodgi. Kata obedo ni kidogo duto dwarore e tij lendo, wabiro nono kido moko ma dwarore moloyo e chako mbaka gi ji, e dok timo limbe, kata e tayo puonjruok Muma.

Sama inono kido miwuoye e sula ka sula, par ane matut kaka inyalo nyiso kidono sama iwuoyo gi joma nie alworau. Tem matek mondo imed hero Jehova kod ji. Herano e gima duong’ ma biro konyi chopo dwaro ma in-go mar konyo ji mondo gibed jopuonjre.

Wamor ahinya gi thuolo makende ma wan-go mar tiyo kanyachiel kodu. (Zef. 3:9) Jehova mondo oguedhu sama udhi nyime hero ji kendo konyogi mondo gibed jopuonjre!