Ripot Mowuok kuom Joyal Wach Pinyruoth
Nofwenyo Ngima Maber kod Geno Madier
YESU nowacho ni ong’eyo rombene. (Johana 10:14) Ka ng’ato nigi chuny maber kendo ohero kuwe kod tim makare, ng’atno biro hero jolup Yesu. Obiro yudo ngima maber mana kaka miyo moro ma nodak e piny Belgium. Ma e sigande:
“Ka ne Joneno mag Jehova olima, ne giyudo ka an gi parruok mang’eny kendo nadwaro dera. Namor gi gima Jonenogo nopuonja ni chandruoge duto biro rumo, kata kamano, ne ok arwako ahinya paro ma ne gin-go ni Nyasaye e ma biro tieko chandruogego. Noyudo aseweyo dhi lemo higni aboro mokalo nikech wuondruok ma naneno e kanisa. Kata kamano, adiera ma Jonenogo nopuonja nomiyo achako fwenyo ni ng’ato ok nyal dak maber ka Nyasaye ok otaye.
“Gima rach en ni bang’ limbe moko matin, nitie lokruok moko ma notimore ma nomiyo koro ne ok anyal dhi nyime tudora gi Joneno mag Jehova. Chunya nonyosore ahinya. Nachako madho ndawa pakede ariyo odiechieng’ kodiechieng’, kendo tiyo gi yedhe ma mero ji. Nikech nagombo wuoyo gi kwarwa ma nosetho, nachako tudora gi jochiende. To mano kaka ne aluorga sama nochopo gotieno ka ne an kenda nikech jochiende ne monjaga! Mano notimore kuom dweche mogwaro. Ne aluorga bedo kar kenda ka nochopo seche mag odhiambo.
“Chieng’ moro ka nawuotho, naluwo yo mopogore gi ma najaluwoga, kendo ne aneno ot moro maduong’ ma ne igero. Nabwok ahinya ka naneno ka ji mang’eny ochokore kanyo. Ka nasudo machiegni, nafwenyo ni ne gin Joneno mag Jehova. Ne gigero Od Romo margi. Mano noparona kinde ma Joneno mag Jehova ne limaga, kendo nachako paro kaka piny ne nyalo bedo maber ka ji duto odak kaka Joneno mag Jehova.
“Nikech nagombo ahinya ni Joneno olima kendo, nawuoyo gi moko kuom joma ne gedogo. Nalamo Nyasaye, kendo ndalo apar bang’e, Janeno ma ne okwongo limacha ne odwong’o dhooda. Nojiwa ni wadhi nyime puonjore Muma, kendo nayie. Gikanyono bende, nogwela e chokruoge. Ne ayie mapiyo. Pok nanenoga joma chal kamano! Kuom kinde malach nasegagombo bet e kind joma oherore kendo mamor. Amor ni nayudogi!
“Bang’ kanyo, nachako dhi e chokruoge duto ma ok abara. Jumbe adek bang’e, naweyo madho ndawa. Naketho buge kod thumbe ma ne miyo atudora gi jochiende, kendo namor ni koro jochiende ma ne jachanda nowere koda. Nachako dak ka luwore gi chike Jehova, kendo bang’ dweche adek nabedo jalendo. Nobatisa bang’ dweche auchiel, kae to ndalo ariyo bang’ ka nosebatisa, nabedo painia makonyo.
“Adwoko ne Jehova erokamano kuom gik mabeyo duto mosetimona. Nafwenyo ngima maber kod geno madier. Kuom adier, nying Jehova en ohinga motegno kama nayudoe resruok kod rit. (Ngeche 18:10) Awinjo mana kaka jandik-zaburi moro nowinjo e chunye ka nondiko e Zaburi 84:10 ni: ‘Odiechieng’ achiel e laru magi, ber moloyo higni aluf achiel ka machielo! Daher bedo jarit dhoot e od Nyasacha kar dak e hema mar joricho.’”
Miyoni ne nigi chuny mar winjo wach, kendo gikone nofwenyo ngima maber kod geno madier. Omiyo, ng’ato ang’ata ma nigi chuny makare ma manyo Jehova nyalo yudo ngima maber.