Penjo Moa Kuom Josombwa

E 2 Jo-Korintho 6:14, gin jomage ma Paulo noluongo ni “jo ma ok ni e yie”?

Ndiko mar 2 Jo-Korintho 6:14 wacho kama: “Kik utueru e jok achiel gi jo ma ok ni e yie.” Ka wanono weche molworo wesno, nenore maler ni Paulo ne wuoyo kuom joma ok ni e kanyakla mar Jokristo. Parono bende iriwo lwedo gi ndiko mamoko ma Paulo noluongoe jomamoko ni “jo ma ok oyie.”

Kuom ranyisi, Paulo nosiemo Jokristo ma ne tero Jokristo wetegi e od bura mondo oyalgi “e nyim jo ma ok oyie.” (1 Jo-Korintho 6:6) E wesno, joma Paulo noluongo ni joma ok ni e yie ne gin jong’ad bura ma ne tiyo e ute ng’ado bura mag Korintho. E barua mar ariyo ma Paulo nondiko ne Jo-Korintho, nowacho ni Satan “osedino pach jo ma ok oyie.” Wenge joma ok oyiego nigi ‘rageng’’ ma monogi neno wach maber. Joma ok oyiego, ne pok okawo okang’ moro amora ma nyiso ni ne gidwaro tiyo ne Jehova, nimar Paulo nowacho kama: “To ka ng’ato olokore oyie kuom Jehova, igolone rageng’no.”​—2 Jo-Korintho 3:16; 4:4.

Moko kuom joma ok ni e yie kethoga chike kendo gilamo sanamu. (2 Jo-Korintho 6:15, 16) Kata kamano, moko kuomgi to ok kwedga jotich Jehova. Moko kuomgi ohero adiera. Moko kuomgi to ni e kend gi Jokristo wetewa kendo giyie dak kodgi. (1 Jo-Korintho 7:12-14; 10:27; 14:22-25; 1 Petro 3:1, 2) Kata kamano, Paulo notiyo gi wach mar “ng’at ma ok ni e yie” ding’eny kowuoyo kuom ng’at ma ok ni e kanyakla mar Jokristo mana kaka ne waseneno malo kanyo. Joma “oketo yie kuom Ruoth” e ma losoga kanyakla mar Jokristo.​—Tich Joote 2:41; 5:14; 8:12, 13.

Puonj ma yudore e 2 Jo-Korintho 6:14 en puonj maduong’ ma tayoga Jokristo e kit ngimagi duto, kendo itiyoga gi puonjno ding’eny sama Jakristo moro manyo ng’at ma ginyalo kendorego. (Mathayo 19:4-6) Jakristo mosechiwo ngimane ne Jehova mobatise, nyisoga rieko ka ok omanyo ng’at ma doher kendorego e kind joma ok ni e yie. Mano en nikech chike, chenro, kod yie mar joma kamago opogore ahinya gi mag Jokristo madier.

To nade joma puonjore Muma kendo ma riworega gi kanyakla mar Jokristo? To nade jolendo ma pok obatisi? Be joma kamago bende inyalo luong ni joma ok ni e yie? Ooyo. Joma oserwako adiera kendo ma timo dongruok mondo gichop e batiso ok onego oluong ni joma ok ni e yie. (Jo-Rumi 10:10; 2 Jo-Korintho 4:13) Ka ne pok obatis Kornelio, Muma wacho ni ne “en ng’at mochiwore ne Nyasaye kendo moluore.”​—Tich Joote 10:2.

Kuom mano, be en gima nyiso rieko ka Jakristo mosebatisi ochako kisera gi jalendo ma pok obatisi mana nikech weche ma Paulo nowacho e 2 Jo-Korintho 6:14 ok tigo kuom ng’at ma kamano? Ooyo, chako kisera gi ng’at ma kamano ok nyis rieko. Nikech ang’o? En nikech siem ma achiel kachiel ma Paulo nochiwo ne mond liete ma Jokristo. Paulo nondiko kama: “To ka chwore otho, ng’at mohero nyalo kende, to mana kuom Ruoth.” (1 Jo-Korintho 7:39) Ka luwore gi siemno, Jokristo mosechiwo ngimagi ne Jehova ijiwoga mondo gimany joma gidwaro kendorego “mana kuom Ruoth.”

Wach motigo ni “kuom Ruoth” kata “kuom Kristo” tiende en ang’o? Paulo nowuoyo kuom joma ne gin jowetene “kuom Kristo” kata “kuom Ruoth” e Jo-Rumi 16:8-10 kod Jo-Kolosai 4:7. Kisomo ndikogo, ibiro fwenyo ni jogo ne gin ‘jotich wetene,’ ‘owetene ma nohero,’ ‘joma long’o kuom Kristo,’ kod ‘wasumbni wetene kuom Ruoth.’

En kinde mage minyalo luong ng’ato ni ‘misumba kuom Ruoth’? Mano en kinde ma ng’atno otimo gima misumba jatimoga, tiende ni, okwerre owuon. Yesu nolero wachno kama: “Ka ng’ato dwaro luwa, to mondo okwerre owuon kendo oting’ yadh-sandne, kae to odhi nyime luwa.” (Mathayo 16:24) Ng’ato chakoga luwo Kristo kendo timo dwach Nyasaye mana bang’ kosechiwore ne Nyasaye. Kae to bang’ mano, ibatise mi obed jatich Jehova Nyasaye moyiego.a Kuom mano, donjo gi ng’ato e kend “kuom Ruoth” tiende en, kendore gi ng’at mosenyiso ni en gi yie madier, kendo mosechiwore mobedo “misumba Nyasaye kod Ruoth Yesu Kristo.”​—Jakobo 1:1.

Ng’at ma puonjore Muma gi Joneno mag Jehova kendo ma timo dongruok maber e weche Nyasaye dwarore ni opwo. Kata kamano, pok ochiwo ngimane ne Jehova mondo otine chuth. Bende, pod nitie lokruoge moko ma pod otimo. Dwarore ni otiek timo lokruogego kae to ochiw ngimane ne Jehova mokwongo, ka pok ochako paro weche mamoko kaka donjo e kend.

Be dibed gima nyiso rieko ka Jakristo moro ochako kisera gi ng’at ma nenore ka gima timo dongruok e puonjruokne mar Muma​—samoro ka odwaro rito mondo ng’atno obatisi mondo gikendre kode? Ooyo. Gimomiyo ng’atno timo dongruok mondo obatise ok bi ng’ere ayanga ka po ni oseng’eyo ni nitie Jakristo ma rito mondo obatise mondo gikendre.

Thothne, ng’ato bedoga jalendo ma pok obatisi mana kuom kinde machuok. Kuom mano, donjo e kend kuom Ruoth en gima nyiso rieko. To nade chako kisera gi ng’at mosechopo e higni moyienego donjo e kend, ma nodongo e ot ma ji gin Joneno mag Jehova, mosebedo ka riwore gi kanyakla kuom higni mang’eny, kendo ma en jalendo ma pok obatisi? Wanyalo penjore penjo kaka, ‘En ang’o mosemono ng’at ma kamano chiwo ngimane ne Jehova? Ang’o momiyo pod odigni? Dibed ni en gi kiawa moko?’ Kata obedo ni ok wanyal luongo ng’at ma kamano ni “ng’at ma ok ni e yie,” ok wanyal wacho bende ni donjo e kend gi ng’at ma kamano en kendo “kuom Ruoth.”

Puonj ma Paulo nochiwo e wi kend konyowa. (Isaya 48:17) Ka ji ariyo ma dwaro kendore gin Jokristo mosechiwo ngimagi ne Jehova, kend margi bedoga gi mise motegno nikech gin gi winjruok maber gi Jehova. Chike, puonj, kod dwachgi chalre. Mano miyoga kend margi bedo gi mor. E wi mano, donjo e kend gi ng’ato “kuom Ruoth” nyisoga ni ng’ato omakore gi Jehova, kendo mano kelonega gueth ma nyaka chieng’, nikech ‘Jehova makorega gi ng’at momakore kode.’​—Zaburi 18:25.

[Weche moler piny]

[Picha]

‘Jehova makorega gi ng’at momakore kode’