Ngima Jokristo Mokwongo

‘Girito Pacho’

“Ka ne pod gin e wuoth, nodonjo e dala moro; kendo dhako moro ma nyinge Maritha norwake e ode. Ne en gi nyamin mare miluongo ni Mariam, ma nobet piny e tiend Ruoth kendo ne winjo wachne. To Maritha ne chandore gi tich mang’eny ka tiyonigi. Nodhiyo ire mowacho ni, ‘Ruoth, ok idew ka nyamera oweya atiyo kenda? Wachne mondo okonya.’ Ruoth nowachone niya, ‘Maritha, Maritha, iparori kendo ithagori gi weche mang’eny; to gimoro achiel ema dwarore. Mariam oyiero gi maber ma ok nomaye.’”​—LUKA 10:38-42.

NYAKA bedni Maritha ne en dhako ma jakinda. Onge kiawa ni joma moko bende nomiye luor. Kaluwore gi tim Jo-Yahudi mokwongo, ber mar ng’ama dhako ne ineno kaluwore gi chiwruokne e tiyo tije mag pacho kod nyalo ma ne en-go e chopo dwaro mag joode.

Mon ma nodak e kinde Jokristo mokwongo bende nojiw ni ‘orit pacho.’ (Tito 2:5) Kata kamano, ne gin gi migawo kod ting’ momedore mar puonjo jomoko kuom yiegi mar Jokristo. (Mathayo 28:19, 20; Tich Joote 2:18) Gin ‘tije’ mage ma ng’ama dhako ma Ja-Yahudi e kinde Jokristo mokwongo ne dwarore ni otim? To ang’o mwanyalo puonjore kuom weche ma Yesu nowacho kuom Mariam?

‘Tiyo Tije Mang’eny’ Dhako ma Ja- Yahudi ne chako tijene gokinyi ka chieng’ pok owuok. (Ngeche 31:15) Bang’ nudo ne joode nyuka, nonyalo kowo yawuote e skul ma ne yudore e sunagogi. Nyithinde ma nyiri ne dong’ pacho mondo opuonjgi gik ma ne dwarore e bedo mon mabeyo.

Miyo kaachiel gi nyige ne chako odiechienggi kuom tiyo tije ma ne dwarore ni otim e pacho kaka olo mafuta e teyini (1), yweyo udi (2), kod nyiedho diel (3). Bang’e ne giloso makate modiechieng’no. Nyiri ne kwongo chungo mogo (4), kae to girege e pong’ mondo obed mayom (5). Miyo ne ruwo mogono gi pi kod thowi. Nodwalo mogono (6) kae to oweye mondo okwodi ka odhi nyime gi tije mamoko. E sechego, nyiri to ne puoyo chak mondo giyud mo mabuo (7).

Bang’e kar onyango, miyo kaachiel gi nyige ne dhi chiro. Kanyo, nowinjo tik gik miuso kaka ng’we mamit, nowinjo le ma ywak, kod koko mag jouso, nong’iewo gik ma ne dwarore (8). Alot kod rech ne gin moko kuom gik ma ne ging’iewo. Kane en miyo ma Jakristo, nonyalo tiyo gi thuolono bende e wuoyo e wi yie mare gi joma ne nie chiro.​—Tich Joote 17:17.

Miyo ne nyalo tiyo gi thuolo mag wuotho ka gidhi kendo ka gia e chiro e puonjo nyithinde mondo oher puonj manie Ndiko. (Rapar mar Chik 6:6, 7) Bende nonyalo wuoyo gi nyige e weche ma ne nyalo konyogi bedo jong’iewo ma kungo.​—Ngeche 31:14, 18.

Tich machielo ma joma mine ne timo ne en dhi umbo e soko (9). Ne giumbo pi ma ne ibiro tiyogo e pacho, samoro ne gitimo kamano ka gigoyo mbaka gi mine ma bende nodhi umbo. Ka giseduogo pacho, miyo kaachiel gi nyige ne chako loso makate. Mokwongo, ne gilosogi molworore, kae to iketogi e kendo (10), ma ng’enyne ne jabedo e laru. Ne gigoyo mbaka sama giwinjo suya mar makate seche ma girite mondo ochiegi.

Bang’ mano, ne gidhi lwoko lewni e aora (11). Mine ne lwoko lewni gi sabun molos gi buch yien moro. Bang’ lawo lewni kendo biyogi, ne gimoyogi e wi chiel kod lwanda.

Bang’ ka giseduogo gi lewni pacho, miyo kod nyige ne twang’o (12) lewni moyiech kapok gikanogi. Bang’e nonyalo puonjo nyige tweng’o kod chwecho (13). Koro mine ne chako tedo chiemb odhiambo (14). Rwako welo ne en kitgi, omiyo joot duto kaachiel gi wendgi ne ikore chamo chiemo ma ne oriwo makate, alot, mo mabuo, rech mobambi, kod pi mang’ich.

Kane ochopo otieno, ka nyithindo koro ne ikore mar dhi nindo, joma ne chongegi lit ne irwayonegi gi mo. Seche ma taya pod liel, jonyuol ne nyalo wuoyo kuom wach moro mowuok e Ndiko kae to gilamo kanyachiel gi nyithindgi. Kapok ginindo, dichwo ne nyalo pako chiege kotiyo gi weche mong’ere ahinyagi: “Ng’a manyalo yudo wuon ot ma timne beyo? Ni mar nengone tek moloyo kidi ma nyinge rubi.”​—Ngeche 31:10.

Yiero “Gima Ber” Onge kiawa ni mon ma jokinda ma ne odak e kinde Jokristo mokwongo ne nigi “tich mang’eny” ma ne miyo gibedo modich. (Luka 10:40) Mon masani bende, to moloyo ma nigi nyithindo, odich ahinya. Masinde masani osemiyo tije moko mag ot obedo mayot. Kata kamano, ngima masani osechuno mine mang’eny mondo oti tije andika e wi tijegi mag ot.

Mon mang’eny ma Jokristo e kindegi luwo ranyisi mar Mariam mowuo kuome e chakruok sulani kata obedo ni giyudo pek moko. Gihero weche mag Nyasaye ahinya. (Mathayo 5:3) Girito joodgi e yo maber, mana kaka Ndiko jiwogi mondo gitim. (Ngeche 31:11-31) Bende gidak kaluwore gi puonj ma Yesu ne omiyo Maritha. Kaka dhako ma ne okawo winjruokne gi Nyasaye mapek, Maritha noyie gi gima Yesu nonyise. Mon ma Jokristo ok we tijegi mag ot omon-gi puonjore kuom Nyasaye (15) kata wuoyo gi jomoko kuom yiegi. (Mathayo 24:14; Jo Hibrania 10:24, 25) Omiyo giyiero “gima ber.” (Luka 10:42) Kuom timo mano, Nyasaye, Kristo, kaachiel gi joodgi mor kodgi.​—Ngeche 18:22.