Ng’wono Kweyo Chuny Malit

KANE George gi Manon ma gin Joneno mawuok e piny Netherlands, odhi lando wach maber mar Pinyruoth ne miyo moro ma hike ng’eny, miyono ne ok orwakogi. Ne gifwenyo ni ne oseiko chwo ariyo koda wuode kendo ne en gi tuwo marach miluongo ni arthritis. Kata obedo ni notemo hore sama mbaka ne dhi nyime, chunye wuon to ok norwako jonenogo.

Kata kamano, George nonyiso Manon ni chieng’ ma gidwogo limo miyono, to giting’ne maua nikech miyono ne nenore ni okuyo kendo en gi lit ahinya. Kane gitimo mano, miyono ma nyinge Rie, nowuoro ahinya. To pod ok noikore ne mbaka, omiyo ne gichano lime odiechieng’ machielo. Kane George gi Manon odwogo kaka ne giwinjore, ne ok giyudo ng’ato. Kata bed ni ne gitemo lime kinde mopogore opogore, pod ok ne giyude. Ne gichako paro kata ni mita dipo ni miyono pondonegi.

Chieng’ moro, George noyudo Rie pacho. Miyono nokwayo ng’wono kuom bedo ni jogo ne ok yude, kendo nonyiso George ni nosebedo ka en e osiptal. Nonyiso George kama: “Ang’eyo ni ok diyie kanyisi gima ne achako timo bang’ kane usewuok. Nachako somo Muma! ” Ne gibedo gi mbaka mamit ahinya, mi Rie oyie puonjore Muma.

Kaka Rie ne medo puonjore Muma, mos mos noweyo bedo gi chuny malit, mobedo miyo mamor kendo mang’won. Kata obedo ni ok nonyal wuok e ot, mapiyo nochako wuoyo gi ng’ato ang’ata ma ne lime e wi gik ma nopuonjore. Kata obedo ni tuwono ne mone chopo e chokruoge mag kanyakla kinde ka kinde, pod ne omor ahinya rwako owete gi nyimine ma ne lime. E odiechieng’ mane orwakoe higini 82, ne odhi e chokruok mar alwora mi nonyiso ayanga chiwruokne ne Nyasaye kokalo kuom batiso.

Dweche moko matin bang’ thone, noyud wechene moko ma nondiko. E wechego nolero kuyo mabedoe ka ng’ato oseti kendo nojiwo ahinya gimomiyo ng’wono dwarore. Manon wacho niya: “Somo weche ma Rie nondikogo nomulo chunya ahinya, kendo amor ahinya ni Jehova nokonyowa mondo wanyise ng’wono.”

Ee, ranyisi ma Jehova owuon oseketo jiwowa mondo wanyis jomoko hera gi ng’wono. (Efe. 5:⁠1, 2) Tijwa mar lendo biro bedo gi nyak sama watiyo gi ‘ng’wono kaka jotich Nyasaye.’​​—⁠2 Kor. 6:​4, 6.