DWOKO PENJO MAG MUMA
Nyasaye Nyinge Ng’a?
Joodwa te nigi nyinge ma iluongogigo. Kata mana le ma wapidho wajomiyo nying! Donge owinjore ni Nyasaye bende obed gi nyinge? Ei Muma, nyinge mang’eny mag telo miluongogo Nyasaye oriwo: Nyasaye Manyalo Duto, Ruodh piny gi polo, kata Jachwech. Kata kamano, Nyasaye nigi nyinge sie.—Som Isaiah 42:8.
Loko mang’eny mag Muma nigi nying Nyasaye e ndiko mar Zaburi 83:18. Kuom ranyisi, e loko mar The Bible in Luo, 1968, ndikono wacho kama: “Ni mondo ging’e ni in, ma nyingi Jehova, in kendi e ng’a Ma Malo Chutho e piny ngima.”
Ang’o momiyo onego wati gi nying Nyasaye?
Wajotiyo gi nying jogo mwahero kata osiepewa sama wawuoyo kodgi
Nyasaye dwaro ni mondo wati gi nyinge. Wajotiyo gi nying jogo mwahero kata osiepewa sama wawuoyo kodgi—to moloyo ka gidwaro ni wati gi nyingegi. Wuoyo gi Nyasaye onego obed kamano bende. E wi mano, Yesu Kristo nojiwo tiyo gi nying Nyasaye.—Som Mathayo 6:9; Johana 17:26.
Kata kamano, mondo wabed osiepe Nyasaye, nyaka wang’e weche momedore kuome, ok mana nyinge. Kuom ranyisi, Nyasaye en ng’at machalo nade? Be sudo machiegni gi Nyasaye en gima nyalore? Inyalo yudo dwoko mag penjogo ei Muma.