Nyasaye Pong’o ‘Chunywa gi Mor’

Be Jehova dewo chandruok mag dhano e pinyka, koso ooyo? Dwoko ma Muma chiwo e wi penjono morowa ahinya. Nyasaye dewo oganda dhano kendo odwaro ni dhano obed gi ngima maber. Odiechieng’ kodiechieng’, Nyasaye chiwo gik mabeyo mogundho ne dhano duto moriwo kata mana joma ok duokne erokamano. Ne ane weche ma jaote Paulo nowacho.—Som Tich Joote 14:16, 17.

Kane Paulo wuoyo gi joma ne ok ti ne Nyasaye e dala mar Lustra, nowacho niya: “E tienge machon [Nyasaye] noyie ni ogendini duto mondo oluw yoregi giwegi. Kata kamano ne ok obet maonge ranyisi mage owuon. Notimo maber, kochiwonu koth moa e polo, gi nyak mar mahiga, koromou gi chiemo, kendo kopong’o chunyu gi mor.” Joma ne winjo Paulo ne onego one wechego nade?

Ng’eyo tiend weche ma ne Paulo owachogo ne ok onego obed matek ne Jo-Lustra. Ne gin jopur ma ne odak e piny manyak kendo ma koth chueye. To mana kaka Paulo ne oparonegi, Nyasaye ema ne kelonegi koth kendo ema ne miyo chambgi nyak. Omiyo, ne gineno gweth Nyasaye kinde moro amora ma ne puothgi nyak maber kata gichamo chiemo mabeyo.

Weche ma ne Paulo owacho ne Jo-Lustra puonjowa gik mogwaro e wi Jehova Nyasaye.

Jehova omiyowa mich mar timo yierowa wawegi. Ne ni Jehova ne oweyo joma ok Jo-Yahudi “mondo oluw yoregi giwegi.” Buk moro mondik mondo okony joma timo tij loko Muma, wacho ni tiend wechego nyalo bedo “timo gima gihero” kata “timo gima giparo ni ber.” Jehova ok chun ng’ato ang’ata mondo otine. Omiyowa mich mar timo yierowa wawegi, ma en nyalo mar yiero kaka wadwaro tiyo gi ngimawa.—Rapar mar Chik 30:19.

Jehova dwaro ni wang’eye. Paulo nolero ni Nyasaye ne ok “obet maonge ranyisi mage owuon.” Buk ma konyo joma timo tij loko Muma mosewuoyeno, bende wacho ni tiend wechego nyalo bedo ni “Nyasaye osenyiso ji kite ayanga.” Chwech mag Nyasaye nyiso maler kido mag Nyasaye ‘maok ne,’ moriwo berne, riekone, tekone, koda herane. (Jo Rumi 1:20) Jehova osenyiso weche mang’eny kuome e Muma. (2 Timotheo 3:16, 17) Donge nenore ayanga ni odwaro ni mondo wang’eye?

Jehova dwaro ni wabed mamor. Paulo wacho ni Nyasaye ‘romowa gi chiemo kendo opong’o chunywa gi mor.’ Kata mana jaricho maok ong’eyo Jehova, nyalo chiemo ma yieng’ kendo bedo mamor e ngimane e okang’ moro. Kata kamano, Nyasaye dwaro ni mondo wabed gi mor madier kendo mosiko. Mano nyalore mana kuom puonjruok e wi Nyasaye kendo tiyo gi weche mwapuonjorego e ngimawa.—Zaburi 144:15; Mathayo 5:3.

Nikech odiechieng’ kodiechieng’ waduto waneno ber mar Jehova, donge nyalo bedo maber ka ipuonjori kaka inyalo nyiso ni iduoko erokamano ne Nyasaye ma miyowa ‘chiemo kendo mapong’o chunywa gi mor’?