Lit ma Tho Kelo

Ji mang’eny ok ohero wuoyo e wi wach tho. Kendo gitemo baro mabor ne mbaka moro amora e wi tho. Gima lit en ni nyaka chieng’ moro tho mul ngimawa e yo moro. To kuom adier, tho en gima lit.

Onge ikruok moro ma wanyalo timo motelo ne lit mwabedogo ka janyuolwa, jaodwa, kata nyathiwa otho. Masira moro nyalo muomore kuomwa apoya kendo nyalo bedoe kuom kinde malach. Bed ni tho obiro e yo mane, okelo kuyo kendo ok wanyal umo lit ma tho kelo.

Ng’at moro miluongo ni Antonio, ma ne wuon-gi otho e masira mar ndara nowacho kama: “Ka ng’ati otho chalo ka gima ng’ato oloro odi kae to odhi gi ofungu. Onge kaka inyalo donjo e odno kata dichiel. Gik ma yande in go koro ok nyal konyi e yo moro amora. Onge gima inyalo timo, nyaka iyie gi lokruok ma koro intiere kata lit manade.”

Miyo moro miluongo ni Dorothy, ma ne chwore otho moweye ka en gi higni 47, nong’ado mar manyo dwoko mag penjo moko ma ne obedogo. Nikech nopuonjo nyithindo e kanisa, nong’eyo ni tho ok e giko dhano. Kata kamano, ok ne en gadier e wi gima yudo dhano bang’ tho. Nopenjo japuonjgi mar dind Jo-Anglikan niya: “Ang’o ma timore ka ng’ato otho?” Noduoke niya: “Mano wach ma onge ng’ama ding’e. We warit arita, wanane.”

Be onego wan be ‘warit arita mondo wabi wane’? Be nitie yo moro amora ma wanyalo ng’eyogo kabe tho e giko dhano?