DWOKO PENJO MAG MUMA

Be Muma en Wach Nyasaye Adier?

Muma opogore gi buge mamoko, to mano ok kawwa gi wuoro nikech en Wach Nyasaye. Osego Mumbe bilionde gi bilionde e dhok miche. Rieko ma yudore e Muma nigi teko mar loko kit ngima ji obed maber.​—Som 1 Jo Thesalonika 2:13; 2 Timotheo 3:16.

Wang’eyo ni Muma owuok kuom Nyasaye nikech weche mokoro timore gadier. Onge dhano moro amora ma nyalo koro gadier gima dhi timore kinde ma biro maok Nyasaye otaye. Kuom ranyisi, kaw ane bug Isaiah. Kopi moro mar bug Isaiah ma ne ondik higni mia achiel kane pok onyuol Yesu noyud e bur moro machiegni gi Dead Sea. Bugno ne wacho ni dala mar Babulon ne dhi dong’ gunda. Mano ne okwongo timore higni mang’eny bang’ ka Yesu osea e piny ka modok e polo.​—Som Isaiah 13:19, 20; 2 Petro 1:20, 21.

Ne ondik Muma nade?

Muma duto ne ondik kuom higni 1,600 kama. Ji 40 ema nondiko Muma, to giduto ne gimakore gi wach achiel maduong’ ma Muma wuoyoe maok gituomore. Ere kaka mano ne onyalore? Mano notimore nikech Nyasaye ema ne tayo gik ma ne gindiko.—Som 2 Samuel 23:2.

Kinde moko Nyasaye ne miyo jondiko weche monego gindiki kokalo kuom malaike, fweny, kata lek. Kinde mang’eny Nyasaye ne miyo jondikogo wach monego gindiki. Kata kamano, noweyonegi thuolo mar yiero weche ma ne gidwaro tiyogo e ndiko ote ma ne omiyogi.​—Som Fweny 1:1; 21:3-5.