WECHE MACHON MA POD KONYO E KINDEGI
Kik Uparru
PUONJ MAR MUMA: “Weuru bedo gi parruok e ngimau.”—Mathayo 6:25.
Tiend wechego en ang’o? Yesu nowacho wechego e twak ma nogolo e got. Kaluwore gi diksonari moro ma lero weche Muma, wach mitiyogo e dho Grik molok ni “bedo gi parruok” inyalo tigo kilero kaka “ng’ato winjoga nikech odhier, kata sama kech kaye, kata sama onyagre gi chandruoge moko moromogo e ngimane ma pile.” Wajoparorega ahinya sama waparo gik ma nyalo timore e kinde ma biro. Onge richo paro e wi gige ringruok mochuno kata e wi ngima joodwa kod osiepewa. (Jo-Filipi 2:20) Kata kamano, ka ne Yesu onyiso jolupne ni ‘kik giparre,’ ne otemo nyisogi ni kik giparre mokalo tong’, tiende ni ka waparre ahinya e wi ngimawa ma kiny, to ok wanyal bedo gi mor e ngimawa ma kawuono.—Mathayo 6:31, 34.
Be puonjno konyo e kindewagi? Wabedo mariek sama waluwo paro ma Yesu nochiwono. Nikech ang’o? Jotim nonro moko wacho ni sama ng’ato nigi parruok ahinya yot mondo oyud tuoche mag adundo, ulcers, kata asthma.
Yesu nowacho gimomiyo ok onego waparre mokalo tong’. Parruok ok kony kata matin. Nopenjo niya, “Ng’ano kuomu ma kuom parruok nyalo medo bor mar ngimane kata mana gi bat achiel?” (Mathayo 6:27) Parruok ahinya e wi ngimawa ok nyal konyo kata medonwa gimoro amora e ngima. E wi mano, kinde mathoth gik moko ok dhiga kaka waparo ni biro bedo. Jasomo moro nowacho kama kuom wachno: “Parruok e wi kinde ma biro chal ka nono, nikech gik maricho mwaparoga ni biro yudowa ok yudwaga kinde mang’eny.”
Ere kaka wanyalo weyo bedo gi parruok? Mokwongo, nyaka wagen kuom Nyasaye. Ka Nyasaye pidhoga winy, kendo rwakoga yien me pap gi ber kamano, donge obiro miyo joma lame gadier gik ma gichando e ngima? (Mathayo 6:25, 26, 28-30) Mar ariyo, odiechieng’ kodiechieng’ ru gi mage. Yesu nowacho ni, “Kik uparru kuom kiny, nikech kiny nobed gi parruokne owuon.” Donge en adier ni “Odiechieng’ kodiechieng’ nigi chandruokne morome”?—Mathayo 6:34.
Sama waluwo paro ma Yesu nomiyowago, wageng’o hinyruok mwanyalo yudo. E wi mano, wabedo gi paro mokuwe, ma Muma luongo ni “kuwe mar Nyasaye.”—Jo-Filipi 4:6, 7.